ប្រជាពលរដ្ឋប្រមាណជិត១០០នាក់បានផ្ទុះការតវ៉ា ខណៈពេលដែលអាជ្ញាធរបានប្រើកម្លាំងចម្រុះចុះទៅអនុវត្តដីកាសម្រេចរក្សាការពារ រុះរើរបងរោង និងវាស់វែងដីប្រមាណជាង២ហិកតា ប្រគល់អោយ
រាជធានីភ្នំពេញ ៖ ប្រជាពលរដ្ឋប្រមាណជិត១០០នាក់បានផ្ទុះការតវ៉ា ខណៈពេលដែលអាជ្ញាធរបានប្រើកម្លាំងចម្រុះចុះទៅអនុវត្តដីកាសម្រេចរក្សាការពារ រុះរើរបងរោង និងវាស់វែងដីប្រមាណជាង២ហិកតា ប្រគល់អោយម្ចាស់បំណុលគ្រប់គ្រងបណ្តោះអាសន្ន ។ ការតវ៉ាបានផ្ទុះឡើង កាលពីវេលាម៉ោងប្រមាណ៨និង៥០នាទីព្រឹក ថ្ងៃទី០១ ខែកក្កដា ឆ្នាំ២០២១ នៅចំណុចភូមិឌួង (កោះឬស្សី) សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ដោយប្រជាពលរដ្ឋទាំងនោះស្មានថា អាជ្ញាធរបានប្រើកម្លាំងចុះរុះរើប៉ះពាល់ផ្ទះ និងដីរបស់ពួកគាត់ដែលបានរស់នៅកាន់កាប់តាំងពីកំឡុងឆ្នាំ១៩៧៩ មកម្ល៉េះ ។
ការចុះអនុវត្តដីកាសម្រេច អាជ្ញាធរបានប្រើប្រាស់កម្លាំងប្រមាណជាង១០០នាក់ ដឹកនាំដោយលោកសុខ សម្បត្តិ អភិបាលខណ្ឌព្រែកព្នៅ និងមានការចូលរួមសម្របសម្រួលពីអាជ្ញាសាលាប្រចាំសាលាដំបូងរាជធានីភ្នំពេញ និងមន្ត្រីជំនាញផងដែរ ។
តាមអាជ្ញាធរខណ្ឌ បានអោយដឹងថា ការប្រើប្រាស់កម្លាំងចុះរុះរើ និងវាស់វែងបោះបង្គោលនេះធ្វើឡើង ទៅតាមដីកាសម្រេចរក្សាការពារលេខ១៥២ «ក១» ដ.រ ចុះថ្ងៃទី២៦ ខែឧសភា ឆ្នាំ២០២១ របស់សាលាដំបូងរាជធានីភ្នំពេញ។
តាមព័ត៌មានបានអោយដឹងថា នៅព្រឹកនោះ គេឃើញកម្លាំងចម្រុះប្រមាណ១០០នាក់ រួមជាកម្មករ ដែលប្រដាប់ទៅដោយកាំបិត ពូថៅ បានកាប់ឆ្ការព្រៃវាស់វែងបោះបង្គោល ដើម្បីប្រគល់ដីទំនាស់នោះ ទៅអោយម្ចាស់បំណុល ។ ខណៈនោះ គេឃើញក៏ប្រជាពលរដ្ឋប្រមាណជិត១០០នាក់ រួមជាកូន បំណុលនៅតំបន់កោះឬស្សី បាននាំគ្នាជួបប្រមូល ដើម្បីតវ៉ាដោយរារាំងសមត្ថកិច្ចដែលដឹកនាំដោយលោកអភិបាលខណ្ឌមិនអោយចុះកាប់ឆ្ការ វាស់វែង បោះបង្គោលនោះទេ ។
តាមប្រជាពលរដ្ឋ បានអោយដឹងថា ដីភូមិនៅតំបន់កោះឬស្សីនេះ ត្រូវបានពួកគាត់បានរស់នៅកាន់កាប់ខ្លះតាំងពីឆ្នាំ១៩៧៩មកម្ល៉េះ ។ កាលពីកំឡុង២ខែមុន ស្រាប់តែមានអាជ្ញាធរ និងមន្ត្រីជំនាញបានចុះទៅវាស់វែង ហើយនៅ២ថ្ងៃមុនពួកគាត់បានទទួលព័ត៌មានថា អាជ្ញាធរបានប្រើកម្លាំងចុះទៅរុះរើផ្ទះ របស់ផ្ទះពួកគាត់ ទើបនាំគ្នាប្រមូលគ្នា ដើម្បីតវ៉ាតែម្តង។
បន្ទាប់ពីមានតវ៉ាហាមកម្មករកាប់ឆ្ការ ដើម្បីវាស់វែងបោះបង្គោលនោះ គេឃើញអាជ្ញាសាលាក៏បានអានដីកាសម្រេចរក្សាការពារអោយប្រជាពលរដ្ឋស្តាប់ ហើយលោកសុខ សម្បត្តិ អភិបាលខណ្ឌព្រែកព្នៅនិងមន្ត្រីជំនាញ ក៏បានសាកសួររកកូនបំណុល ដែលជាអ្នកពាក់ព័ន្ធ ហើយធ្វើការសម្របសម្រួលគ្នាជាមួយម្ចាស់បំណុល ។
តាមព័ត៌មានអោយដឹងថា នៅព្រឹកនោះ កូនបំណុលម្នាក់ឈ្មោះ ឯម ម៉ៅ ភេទស្រី អាយុ៤៣ឆ្នាំ ក្នុងចំណោមកូនបំណុលចំនួន៥នាក់ក៏បានចេញមុខ ហើយបានសម្របសម្រួលស្នើសុំអោយបោះបង្គោល ដោយកាត់ចំណែកដីមួយចំនួនប្រគល់ទៅអោយម្ចាស់បំណុល ។
ចំណែកប្រជាពលរដ្ឋមួយចំនួនទៀតក៏បានរង់ចាំមើលការវាស់បោះបង្គោល ដោយខ្លាចចូលដីរបស់ខ្លួន ។ បន្ទាប់មកគេឃើញមន្ត្រីជំនាញ និងម្ចាស់បំណុល ព្រមទាំងកម្មករ ក៏បានដំណើរការបោះបង្គោលដោយរលូន ។
តាមដីការសម្រេចរក្សាការពារ ម្ចាស់បំណុលឈ្មោះ សុខ ស៊ីថា ភេទស្រី អាយុ៦០ឆ្នាំ និងឈ្មោះ ហេង សុខរស់ ភេទប្រុស អាយុ៤០ឆ្នាំ មានអសយដ្ឋាន ផ្ទះលេខ១៨ ផ្លូវលេខ៤០៨ ភូមិ៣ សង្កាត់ទួលទំពួង២ ខណ្ឌចំការមន ។ ចំណែកខាងកូនបំណុល រួមមាន ១-ឈ្មោះ ឡុង ដារ៉ា ភេទប្រុស បច្ចុប្បន្នកំពុងជាប់ ពន្ធនាគា, ២-ឈ្មោះ ឡុញ រស់ ភេទប្រុស បច្ចុប្បន្នកំពុងជាប់ពន្ធនាគា, ៣-ឈ្មោះ ឡុង ដារ៉ែន ភេទប្រុស, ៤-ឈ្មោះ មុំ លីម ភេទស្រី និង៥.ឈ្មោះ ឯម ម៉ៅ ។
ហើយនៅក្នុងដីកាបានសម្រេច ១- អោយសហកូនបំណុល រុះរើរបង និងរោងដែលសាងសង់ចោល ចេញពីដីម្ចាស់បំណុលសុំចេញដីកាសម្រេច រក្សាការពារមានទីតាំងស្ថិតនៅភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ, ២- អោយសហម្ចាស់បំណុល គ្រប់គ្រងជាបណ្តោះអាសន្ន នូវដីទំនាស់ ទំហំ១៧៧០០ម៉ែត្រការ៉េ និងទំហំ៣០០០ម៉ែត្រការ៉េ ដែលមានទីតាំងស្ថិតនៅភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ បណ្តោះអាសន្ន តែហាមមិនអោយលក់ដូរ ជួល បញ្ចាំ ផ្ទេរសិទ្ធិទៅអោយអ្នកដទៃ រហូតដល់រឿងអង្គសេចក្តីត្រូវបានសម្រេចជាស្ថាពរ ។
ទោះបីជាយ៉ាងណា ការចុះអនុវត្តដីកាសម្រេចរក្សាការពារនេះ ពុំបានរុះរើផ្ទះឡើយ ដោយគ្រាន់តែបោះបង្គោលព្រំតែប៉ុណ្ណោះ។ តាមព័ត៌មានការចុះវាស់វែងបោះបង្គោលព្រំដីនោះ គឺជាន់លើដី២ម្ចាស់ទៀត មានប័ណ្ណកម្មសិទ្ធិ តែម្ចាស់ដីទាំងនោះមិនបានចេញមុខតវ៉ានៅពេលនោះឡើយ គ្រាន់តែមកមើល ។
គួរបញ្ជាក់ថា ដីនោះដើមឡើយ ជាដីបឹងសំរោង ដែលបានទិញលក់តៗជាន់លើកគ្នា នៅក្នុងទឹកពុំមានព្រំពិតប្រាកដឡើយ ។ លុះក្រោយមក អាជ្ញាធរក៏បានលើកទំនប់ព័ទ្ធផ្ទៃបឹង នៅសល់មួយផ្នែកជាន់លើគ្នា ក៏មានទំនាស់គ្នាឈានទៅជាប់គុកជាបន្តបន្ទាប់ នៅសល់តែកូនបំណុល ឈ្មោះឯម ម៉ៅ ដែលអ្នកស្រុកអះអាងថា ជាដីរបស់គាត់ដែលរស់នៅ និងអាស្រ័យផលជាយូរមក ហើយពេលនោះគាត់ក៏បានយល់ព្រមប្រគល់អោយមួយចំណែកទៅអោយម្ចាស់បំណុល ដើម្បីបញ្ចប់រឿង ៕
ចែករំលែកព័តមាននេះ