ផ្ទះក្បឿងចំនួន២ខ្នង ព្រមទាំងសម្ភារៈនៅក្នុងផ្ទះជាច្រើនទៀត ត្រូវបានព្រះអគ្គីលេបត្របាក់ក្លាយទៅជាផេះផង់ក្នុងរយៈពេលតែ១ម៉ោងប៉ុណ្ណោះ ទោះបីមិនបានធ្វើអោយមានគ្រោះថ្នាក់ដល់មនុស្ស ឬសត្វ ប៉ុន្តែម្ចាស់ផ្ទះនាំគ្នាស្រែកយំស្ទើរតែគាំង ដោយសារតែ
ខេត្តព្រៃវែង ៖ ផ្ទះក្បឿងចំនួន២ខ្នង ព្រមទាំងសម្ភារៈនៅក្នុងផ្ទះជាច្រើនទៀត ត្រូវបានព្រះអគ្គីលេបត្របាក់ក្លាយទៅជាផេះផង់ក្នុងរយៈពេលតែ១ម៉ោងប៉ុណ្ណោះ ទោះបីមិនបានធ្វើអោយមានគ្រោះថ្នាក់ដល់មនុស្ស ឬសត្វ ប៉ុន្តែម្ចាស់ផ្ទះនាំគ្នាស្រែកយំស្ទើរតែគាំង ដោយសារតែសោកស្តាយទ្រព្យសម្បត្តិរបស់ខ្លួន។ ហេតុការណ៍គ្រោះអគ្គិភ័យនេះ បានកើតឡើងកាលពីវេលាម៉ោង១២ថ្ងៃត្រង់ ថ្ងៃទី៣០ ខែមិថុនា ឆ្នាំ២០២១ នៅចំណុចភូមិត្នោត ឃុំរកា ស្រុកពារាំង ខេត្តព្រៃវែង។
ផ្ទះដែលត្រូវភ្លើងឆាបឆេះទាំង២ខ្នងខាងលើនេះ ជាប្រភេទផ្ទះក្បឿងដូចគ្នា ដោយផ្ទះទី១ មានទំហំ៨ម៉ែត្រគុណ៨ម៉ែត្រ ធ្វើពីឈើ និងជញ្ជាំងក្តារ ដែលមានម្ចាស់ឈ្មោះ ឌឿន យ៉េក ភេទប្រុស អាយុ៤៩ឆ្នាំ ចំណែកផ្ទះទី២ មានទំហំ ៧ម៉ែត្រគុណ១១ម៉ែត្រ ធ្វើពីឈើ និងជញ្ជាំងក្តារ មានម្ចាស់ឈ្មោះ សឿន ណាត ភេទប្រុស អាយុ៥៤ឆ្នាំ។ ផ្ទះទាំង២នេះ ត្រូវភ្លើងឆេះអស់ទាំងស្រុង។
យោងតាមរបាយការណ៍របស់សមត្ថកិច្ចមូលដ្ឋាន បានអោយដឹងថា អគ្គិភ័យនេះកើតឡើងដោយសារតែផ្ទុះកំប៉ុងហ្គាស ដោយម្ចាស់ផ្ទះឈ្មោះ ឌឿន យ៉េក បានបើកហ្គាសដាំបាយ ហើយកំប៉ុងហ្គាសបានធ្លាយក៏ផ្ទុះកើតជាអគ្គិភ័យឆាបឆេះពេញផ្ទះ ហើយបន្ទាប់មកក៏ឆេះឆ្លងរាលដាលទៅដល់ផ្ទះរបស់ឈ្មោះ សឿន ណាត ដែលនៅជាប់គ្នានោះទៀត។
ប្រភពដដែលនេះ បានបន្តទៀតថា ក្រោយពេលកើតមានហេតុការណ៍នេះភ្លាម ប្រជាពលរដ្ឋក៏បានរាយការណ៍មកខាងសមត្ថកិច្ចភ្លាម ហើយសមត្ថកិច្ចក៏បានទាក់ទងគ្នាហៅឡានទឹកចេញទៅជួយសង្គ្រោះភ្លាមៗផងដែរ ដោយបានប្រើឡានទឹកចំនួន៣គ្រឿង ហើយបានបាញ់ទឹកអស់ចំនួន៥ឡាន ទើបអាចពន្លត់ភ្លើងបាន មិនអោយភ្លើងបន្តឆេះឆ្លងទៅផ្ទះដទៃទៀត ប៉ុន្តែផ្ទះទាំង២ខ្នងនេះ ត្រូវបានភ្លើងឆេះអស់ទាំងស្រុងទៅហើយ។
ប្រភពដដែលបន្តទៀតថា ចំពោះការខូចខាតនៅក្នុងហេតុការណ៍ខាងលើនេះ ត្រូវបានសមត្ថកិច្ចបញ្ជាក់ប្រាប់ថា ផ្ទះទី១ របស់ឈ្មោះ ឌឿន យ៉េក បានបាត់បង់មាស១តម្លឹង៥ជី ប្រាក់រៀល៧លានរៀល ម៉ូតូ១គ្រឿង ស្រូវ៤០បេ ម៉ាស៊ីនបូមទឹក៣គ្រឿង និងខូចខាតសម្ភារៈប្រើប្រាស់ក្នុងផ្ទះជាច្រើនទៀត សរុបជាទឹកប្រាក់អស់ប្រមាណជា៣ម៉ឺន៥ពាន់ដុល្លារ។ ចំណែកផ្ទះទី២ ឆេះលុយអស់១០លានរៀល និងខូចខាតសម្ភារៈប្រើប្រាស់ក្នុងផ្ទះជាច្រើនទៀតសរុបជាទឹកប្រាក់អស់ប្រមាណជា ៤ម៉ឺន៧ពាន់ដុល្លារ៕
ចែករំលែកព័តមាននេះ