ខេត្តតាកែវ ៖ចំនួនអ្នកឆ្លងជំងឺកូវីដ១៩ថ្មី នៅខេត្តតាកែវពេញ១ខែ មិថុនានេះកំពុងតែផ្ទុះរីករាលដាលកាន់តែខ្លាំងៗឡើង មិនមានការថយចុះទាល់តែសោះបញ្ហានេះធ្វើអោយបងប្អូនជាទូទៅមានការភ័យខ្លាចគ្រប់ៗគ្នា ។
លោកនុត ស៊ីណាត ប្រធានមន្ទីរសុខាភិបាលខេត្តតាកែវបានប្រាប់កោះសន្តិភាពយើង នៅថ្ងៃទី៣០ ខែមិថុនា ២០២១នេះថា ក្រុមគ្រូពេទ្យជំនាញរបស់យើងនៅតែបន្តរកឃើញចំនួនអ្នកឆ្លងជំងឺកូវីដ-១៩ បានហក់ឡើងជារៀងរាល់ថ្ងៃ ហើយចំនួនឆ្លងថ្មីនៅថ្ងៃនេះមានចំនួន ៦៦នាក់ ក្នុងនោះស្រី៤១នាក់ ក្នុងចំណោមក្រុងស្រុកទាំង៩ ខណៈដែលស្រុក គិរីវង់ ស្រុកព្រៃកប្បាស និងស្រុកអង្គរបូរី មានតួរលេខខ្ពស់ជាងគេ ។
លោក នុត ស៊ីណាត ប្រធានមន្ទីរសុខាភិបាលខេត្តតាកែវបានបន្តទៀតថា អ្នកឆ្លងជំងឺកូវីដ១៩ ចំនួន៦៦នាក់ ដែលបានត្រូវបានក្រុមគ្រូពេទ្យបានរកឃើញកាលពីថ្ងៃទី២៩ ខែមិថុនា បានឆ្លងជំងឺកូវីដ-១៩នេះ ត្រូវបានមន្ត្រីជំនាញកំពុងតែយកចិត្តទុកដាក់ក្នុងការព្យាបាលជូនពួកគាត់ និងណែនាំអំពីវិធីថែរក្សាសុខភាព ពិសេស គឺអនុវត្តវិធានរបស់ក្រសួងសុខាភិបាលដោយមិនត្រូវ ចេញដើរទៅណាជាដាច់ខាត ។
លោកវេជ្ជបណ្ឌិតប្រធានមន្ទីរ បានបន្តទៀតថា ក្នុងចំណោមក្រុងស្រុកទាំង ១០របស់ខេត្ត មាន៩ ស្រុក ដែលបានឆ្លងជំងឺកូវីដ-១៩នេះ ក្នុងនោះស្រុកសំរោង៥នាក់ ស្រុកត្រាំកក់៤នាក់ ស្រុកព្រៃកប្បាស ១២នាក់ ស្រុកបាទី ៥នាក់ ស្រុកទ្រាំង១នាក់ ស្រុកគីរីវង់ ១២នាក់ ស្រុកអង្គរបូរី១៣នាក់ ស្រុកកោះអណ្តែត៨នាក់ និងមកពីស្រុកបសេដ្ឋ ខេត្តកំពង់ស្ពឺ ០២នាក់ និងមកពីស្រុកគៀនស្វាយ ០២នាក់ ផងដែរ ។
លោកនុត ស៊ីណាត ប្រធានមន្ទីរសុខាភិបាលខេត្តក៏បានអំពាវនាវទៅដល់បងប្អូនប្រជាពលរដ្ឋ ដែលបានដឹងខ្លួនថា បានប៉ះពាលដោយផ្ទាល់ និងដោយប្រយោលជាមួយនឹងអ្នកជំងឺកូវីដ-១៩ សូមប្រញាប់មកយកសំណាក ដើម្បីធ្វើតេស្ត និងធ្វើចត្តាឡីស័កអោយបានត្រឹមត្រូវ ដើម្បីទប់ស្កាត់ការឆ្លងរីករាល ដាលកាន់តែខ្លាំងជាងនេះថែមទៀត ព្រោះខេត្តតាកែវ ចំនួនអ្នកឆ្លងជំងឺកូវីដ១៩ បានរីករាលដាល និងហក់ឡើងជាលំដាប់ ដូច្នេះហើយសូមបងប្អូនយើងត្រូវមានការប្រុងប្រយ័ត្នអោយបានខ្ពស់បំផុតទើបមិនឆ្លងជំងឺកាចសាហាវនេះបាន ។
លោកនុត ស៊ីណាត បានបញ្ជាក់ថា ចំនួនឆ្លងជំងឺកូវីដ-១៩ នៅទូទាំងខេត្តតាកែវ គិតត្រឹមថ្ងៃទី ២៤ ខែមិថុនា ឆ្នាំ២០២១ នេះ មានចំនួនសរុប ២៦៤១នាក់ ស្រី១៧៤២នាក់ កំពុងព្យាបាលមានចំនួន ៦៧៧នាក់ និងជាសះ ស្បើយចំនួន ១៩៦៧នាក់ និងមានអ្នកស្លា.ប់ចំនួន ៣៥នាក់ ដោយឡែកសម្រាប់ពលករធ្វើចត្តាឡីស័កកំរិត២សរុប ៦១៩នាក់ ស្រីចំនួន ២៨១នាក់ ៕
ចែករំលែកព័តមាននេះ