- ភ្នំពេញ
ភ្នំពេញ៖ នៅពេលនេះ អត្រាអ្នកឆ្លងកូវីដ១៩ នៅប្រទេសកម្ពុជា មិនទាន់ថមថយនៅឡើយទេ។ នៅភ្នំពេញ និងនៅតាមបណ្តាខេត្តនានា ក៏ឆ្លងកូវីដជាបន្តបន្ទាប់ ហើយកើនឡើងជារៀងរាល់ថ្ងៃថែមទៀត។ នៅផ្សារបឹងកេងកង…
ភ្នំពេញ៖ នៅពេលនេះ អត្រាអ្នកឆ្លងកូវីដ១៩ នៅប្រទេសកម្ពុជា មិនទាន់ថមថយនៅឡើយទេ។ នៅភ្នំពេញ និងនៅតាមបណ្តាខេត្តនានា ក៏ឆ្លងកូវីដជាបន្តបន្ទាប់ ហើយកើនឡើងជារៀងរាល់ថ្ងៃថែមទៀត។ នៅផ្សារបឹងកេងកង…
ភ្នំពេញ៖ នៅពេលនេះ អត្រាអ្នកឆ្លងកូវីដ១៩ នៅប្រទេសកម្ពុជា មិនទាន់ថមថយនៅឡើយទេ។ នៅភ្នំពេញ និងនៅតាមបណ្តាខេត្តនានា ក៏ឆ្លងកូវីដជាបន្តបន្ទាប់ ហើយកើនឡើងជារៀងរាល់ថ្ងៃថែមទៀត។ នៅផ្សារបឹងកេងកង ក្នុងរាជធានីភ្នំពេញ ផ្ទុះករណីឆ្លងកូវីដ ដែលតម្រូវឲ្យអាជីវករទាំងអស់ ត្រូវទៅធ្វើតេស្តរកកូវីដ ខណៈដែលក្រសួងសុខាភិបាល ក៏បានប្រកាសពីការរកឃើញវីរុសកូវីដបំប្លែងថ្មី លើពលករមកពីថៃ ច្រើនករណី។
កាលពីថ្ងៃទី២៨ ខែមិថុនា ឆ្នាំ២០២១ នៅជុំវិញផ្សារបឹងកេងកង ក្នុងរាជធានីភ្នំពេញ ត្រូវបានបិទខ្ទប់ ក្រោយរកឃើញអាជីវករឆ្លងកូវីដ១៩។ អាជីករក្នុងផ្សារបឹងកេងកងទាំងអស់ ត្រូវបានតម្រូវឲ្យទៅធ្វើតេស្ត យកសំណាក រកមេរោគកូវីដ១៩ នៅក្នុងវិទ្យាល័យ ជាស៊ីម បឹងកេងកង ដែលស្ថិតនៅជិតផ្សារបឹងកេងកង។ ជាលទ្ធផលបណ្តោះអាសន្ន គិតត្រឹមម៉ោង ៣រសៀល ថ្ងៃទី២៨មិថុនា ក្នុងចំណោមអាជីវករផ្សារបឹងកេងកង ដែលបានធ្វើតេស្ត ចំនួន ៨៩១នាក់ គឺមាន ១៩០នាក់ វិជ្ជមានកូវីដ១៩។ ការធ្វើតេស្ត ក៏នៅបន្ត។
នៅល្ងាចថ្ងៃទី២៨ ខែមិថុនា ឆ្នាំ២០២១ រដ្ឋបាលរាជធានីភ្នំពេញ បានប្រកាសនូវសេចក្តីសម្រេចបិទខ្ទប់ផ្សារបឹងកេងកង រយៈពេល ២សប្តាហ៍ គិតចាប់ពីម៉ោងសូន្យ ថ្ងៃទី២៩ ខែមិថុនា ឆ្នាំ២០២១ រហូតដល់ថ្ងៃទី១២មិថុនា ឆ្នាំ២០២១។
ដោយឡែក ក្រសួងសុខាភិបាល ក៏បានចេញសេចក្តីប្រកាសថ្មីមួយទៀត កាលពីថ្ងៃទី២៨ ខែមិថុនា ឆ្នាំ២០២១ ប្រកាសឲ្យពង្រឹងការអនុវត្តន៍វិធានការការពារ ការចម្លងវីរុសកូវីដ១៩ រួមទាំងពពួកបំប្លែងថ្មី ជាពិសេសបុគ្គល ត្រូវចូលរួមជាចាំបាច់ ឲ្យបានត្រឹមត្រូវ ខ្ជាប់ខ្ជួន និងម៉ត់ចត់។
ក្នុងលិខិត ក្រសួងសុខាភិបាល បានជម្រាបជូនសាធារណជន និងបងប្អូនប្រជាពលរដ្ឋនៅទូទាំងប្រទេសថា តាមរយៈការធ្វើតេស្តលើពលករចំណាកស្រុកត្រឡប់មកពីប្រទេសថៃ ឃើញថា មានការនាំចូលនូវជំងឺកូវីដ១៩ បំប្លែងថ្មីប្រភេទ ដែលតា Delta មានច្រើនករណី។ ក្នុងនោះ ដកពិសោធន៍ការចម្លងនៃវីរុសនេះ នៅប្រទេសមួយចំនួន មានភាពសាហាវខ្លាំងជាងវីរុសកូវីដ១៩ បំប្លែងមុនៗ ប្រហែលដល់ទៅ ១៥ដង ខ្លាំងជាងការចម្លងពីពេលកន្លងទៅ។
ក្រសួងសុខាភិបាល ក៏បានប្រកាសថា យើងក៏មិនដឹងថា វីរុសកូវីដ១៩នេះ មានអត្តចរិកបែបណា និងនៅកន្លែងណាដែរ រហូតដល់បច្ចុប្បន្ននេះ ហើយក៏មិនអាចដឹងដែរថា តើបុគ្គល ដែលបានឆ្លងវីរុសនេះ បានប៉ះពាល់អ្វីខ្លះ ដែលមានវត្តមានវីរុសនេះ ហើយបុគ្គល ដែលកើតវីរុសកូវីដ១៩នេះ ក៏ប្រហែលជាមិនដឹងខ្លួនថា ឆ្លងផង។ ក្នុងនោះ វ៉ាក់សាំង គឺជាឧបករណ៍ ដែលអាចជួយកាត់បន្ថយនូវភាពឈឺធ្ងន់ធ្ងរ ការសម្រាកនៅមន្ទីរពេទ្យ និងអត្រាស្លាប់។
ប៉ុន្តែក្រសួងសុខាភិបាល លើកឡើងថា អ្វីដែលអ្នកវិទ្យាសាស្ត្រ បានស្រាវជ្រាវដឹងនោះ គឺបណ្តាលមកពីកង្វះខាតក្នុងការអនុវត្តន៍វិធានការការពារខ្លួនបានត្រឹមត្រូវ និងដោយម៉ត់ចត់ ជាពិសេសហានិភ័យខ្ពស់នៅពេលដែលបុគ្គលចល័ត ធ្វើដំណើរចេញពីផ្ទះ ពីកន្លែងមួយទៅកន្លែងមួយ ដោយភ្លេចអនុវត្តន៍វិធានការការពារខ្លួន ឬអនុវត្តមិនបានខ្ជាប់ខ្ជួន និងគត់មុតនូវវិធានការការពារខ្លួន។
បច្ចុប្បន្ន ក្រសួងសុខាភិបាល ក៏បានសង្កេតឃើញថា បុគ្គលមានការភ្លេចខ្លួន ដែលបណ្តាលឲ្យការអនុវត្តន៍វិធានការការពាររបស់បុគ្គល មានភាពធូររលុង ជាពិសេសនៅតាមទីប្រជុំជន។
ដូច្នេះហើយ បានជាក្រសួងសុខាភិបាល ក្រើនរំលឹកហើយរំលឹកទៀត និងសូមអំពាវនាវដោយទទូចដល់សាធារណជន បងប្អូនប្រជាពលរដ្ឋយើងទាំងអស់ នៅទូទាំងប្រទេសកម្ពុជា ឲ្យបន្តការពារខ្លួន កុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់រស់នៅរបស់ខ្លួន ឲ្យស្របតាមពាក្យស្លោក ដែលថា «រៀនរស់នៅធម្មតាជាមួយកូវីដ១៩ តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ១៩ សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ១៩ ជាពិសេសពពួកមេរោគកូវីដប្រភេទបំប្លែងថ្មីនេះ ឬក៏ប្រភេទថ្មីផ្សេងទៀត ដែលអាចកើតមាននៅក្នុងព្រះរាជាណាចក្រកម្ពុជា ជាយថាហេតុណាមួយ។
តាមក្រសួងសុខាភិបាល ការចូលរួមរបស់បងប្អូនប្រជាពលរដ្ឋទាំងអស់ ដើរតួនាទីសំខាន់ណាស់ ដើម្បីការពារបុគ្គលខ្លួនឯង ក្រុមគ្រួសារខ្លួន និងសហគមន៍របស់ខ្លួន និងអ្នកដទៃ ឲ្យបានរស់នៅប្រកបដោយសុវត្ថិភាព និងអាចរក្សាជីវភាពរស់នៅ ឲ្យអាចប្រព្រឹត្តនូវការប្រកបមុខរបរចិញ្ចឹមជីវិតបាន។ នេះមានន័យថា ប្រជាពលរដ្ឋទាំងអស់ ទាមទារអនុវត្តនូវវិធានការ ៣ការពារ និង ៣កុំ។ ៣ការពារ៖ ១-ពាក់ម៉ាស (ជាពិសេសនៅពេលកំពុងពាក់ម៉ាស់ សូមកុំយកដៃប៉ះផ្ទៃមុខនៃម៉ាស់ ឬទាញម៉ាស់ដាក់ក្រោមចង្ការ និងត្រូវដូរម៉ាស់ថ្មី នៅពេលវាសើម)។ ២-លាងដៃឲ្យញឹកញាប់ ជាមួយសាប៊ូ ក្នុងរយៈពេល ៤០វិនាទី ឬជាមួយអាល់កុល ជែលក្នុងរយៈពេល ២០វិនាទី ៣-រក្សាគម្លាតសុវត្ថិភាពបុគ្គលពីមួយម៉ែត្រកន្លះឡើង៖ ទោះបីជាបងប្អូន សមាជិកគ្រួសារ សាច់ញាតិ ដែលមានការស្នាក់នៅក្នុងគេហដ្ឋានផ្សេងពីអ្នក ឬក៏មិត្តភក្តិជិតស្និទ្ធក៏ដោយ។ ៣កុំ៖ ១-កុំទៅកន្លែងមានមនុស្សកុះករច្រើន ក្នុងន័យនេះ រាប់ទាំងការជួបជុំផឹកស៊ីជាលក្ខណៈគ្រួសារ សាច់ញាតិ ដែលមានការស្នាក់នៅក្នុងគេហដ្ឋានផ្សេងពីអ្នក ឬមិត្តភ័ក្ត្រជិតស្និទ្ធ។ ២-កុំទៅកន្លែងបិទជិតគ្មានខ្យល់ចេញចូល ៣-កុំប៉ះពាល់គ្នា កុំចាប់ដៃគ្នា កុំកៀកស្មាគ្នា សូម្បីតែសមាជិកគ្រួសារ សាច់ញាតិ ដែលមានការស្នាក់នៅក្នុងគេហដ្ឋានផ្សេងពីអ្នក ឬមិត្តភ័ក្ត្រជិតស្និទ្ធ។
ជាសរុប តាមសភាពការណ៍សព្វថ្ងៃនៃការបន្តឆ្លងរាលដាលជំងឺកូវីដ រួមទាំងការនាំចូលកូវីដប្រភេទបំប្លែងថ្មីផងនោះ ទាមទារឲ្យយើងម្នាក់ៗ កុំទាន់ភ្លេចខ្លួន ហើយបន្តចូលរួមអនុវត្តវិធានការ ៣កុំ និង៣ការពារ ឲ្យបានខ្ជាប់ខ្ជួន និងដោយយកចិត្តទុកដាក់ខ្ពស់បន្តទៀត។ មិនមានការចាំបាច់ សូមកុំចេញក្រៅផ្ទះ។
អាជ្ញាធរមូលដ្ឋាន ក៏សូមបន្តជំរុញការអនុវត្តន៍ ៣ការពារ និង៣កុំនេះ ឲ្យបានល្អប្រសើរ រួមជាមួយនឹងការតាមដាន ព្រមទាំងដាក់ចេញនូវការអនុវត្តន៍ច្បាប់ជាធរមាន។ នោះគឺផាកពិន័យអ្នកមិនពាក់ម៉ាស មិនរក្សាគម្លាត ពិសេសអ្នកមិនធ្វើចត្តាឡីស័ក ដែលសំដៅដល់អ្នកគេចវេះ មិនព្រមធ្វើតេស្ត យកសំណាកផង ហើយក្រោយយកសំណាកហើយ ក៏មិនព្រមធ្វើចត្តាឡីស័កឲ្យបានត្រឹមត្រូវ ក៏ត្រូវមានទោសដែរ។ ក្រៅពីនោះទៀត អ្នកគេចវេះ លួចឆ្លងដែនខុសច្បាប់ មិនចូលពិនិត្យសុខភាព និងមិនធ្វើចត្តាឡីស័ក ក៏ត្រូវមានទោសដូចគ្នានឹងមេខ្យល់ដែរ។
ក្នុងកាលៈទេសៈពេលនេះ គ្មានអ្វីក្រៅតែពីការបន្តប្រកាន់ឲ្យបានខ្ជាប់ខ្ជួននូវវិធានការការពារ ៣កុំ និង៣ការពារប៉ុណ្ណោះ។ ការពារ នៅតែប្រសើរជាងការព្យាបាល។ ចូរកុំភ្លេច ត្រឹមតែមួយថ្ងៃ គឺនៅថ្ងៃទី២៧ ខែមិថុនា ឆ្នាំ២០២១ នៅទូទាំងប្រទេសយើង មានអ្នកឆ្លងកូវីដសរុប ៨៨៣នាក់ ជាសះស្បើយ ៦០៧នាក់ និងស្លាប់ ១៦នាក់។ បើគិតសរុប កម្ពុជាយើង មកដល់ថ្ងៃទី២៨ ខែមិថុនា ឆ្នាំ២០២១ មានអ្នកឆ្លងកូវីដ សរុបចំនួន ៤៨៥៣២នាក់ ជាសះស្បើយសរុបចំនួន ៤២៧៦៤នាក់ និងករណីស្លាប់សរុប កើនឡើងដល់ ៥៥៦នាក់ហើយ៕
ចែករំលែកព័តមាននេះ