រាជធានីភ្នំពេញ ៖ ស្ថានភាពប្រកួតប្រជែងក្នុងមុខរបរលក់ភីហ្សាតាមតូបតូចៗ បានធ្វើឲ្យលោកអូត ភូថង និងភរិយា ពិបាកក្នុងការរកប្រាក់ចំណេញយ៉ាងខ្លាំងក្នុងមុខរបរមួយនេះ ដែលបានដំណើរការយ៉ាងរលូនកាលពីប៉ុន្មានខែមុន ។ ដើម្បីរក្សាលំនឹងគ្រួសារ ប្ដីប្រពន្ធមួយគូនេះបានបង្ខំចិត្តប្ដូរកន្លែងទៅលក់នៅទីតាំងផ្សេងដែលមានតម្លៃឈ្នួលកន្លែងខ្ពស់ជាងមុន និងត្រូវបន្ថែមអាជីពលក់កាបូបក្បាលគីបផ្សែផ្សំទៀតផងក្នុងប៉ុន្មានថ្ងៃនេះ ។ អញ្ចឹងហើយទើបគេមើលឃើញថា កីឡាកររូបនេះកំពុងក្ដោបក្ដាប់អាជីព៣ក្នុងពេលតែមួយ គឺអ្នកលក់ភីហ្សាផង ជាអ្នកលក់កាបូបក្បាលគីបផង និងជាគណៈកម្មការផ្ដល់ពិន្ទុនៅប៉ុស្តិ៍លេខ៥ផង ។
អ្នកស្រីម៉ែន ដាលីយ៉ា ភរិយារបស់លោកអូត ភូថង បានប្រាប់កោះសន្ដិភាពថា ប្រមាណ៤ថ្ងៃមកហើយដែលអ្នកស្រី និងស្វាមីបានសម្រេចចិត្តកុម្ម៉ង់ទិញកាបូបក្បាលគីបមកពីប៉ោយប៉ែត យកមកដាក់លក់បន្ថែមពីលើរទេះភីហ្សា ដោយសារតែស្ថានភាពលក់ភីហ្សារបស់ខ្លួនកាន់តែពិបាករកប្រាក់ចំណេញ ។ កាលពីមុនអ្នកស្រី និងស្វាមីដាក់លក់ភីហ្សានៅខាងមុខច្រកម្ដុំស្ដាតចាស់ មិនសូវចោទរឿងជួលកន្លែងគេលក់ក្នុងតម្លៃខ្ពស់ប៉ុន្មានទេ ប៉ុន្តែដោយសារតែមុខរបរនេះមានគេលក់ច្រើន ហើយទីនោះក៏ច្រើនកកស្ទះចរាចរណ៍ពិបាកឲ្យភ្ញៀវឈប់ទិញ ទើបអ្នកស្រី និងស្វាមី សម្រេចចិត្តទៅជួលកន្លែងកែងត្រង់ការ៉ាសសាំងតេឡា ក្បែររង្វង់មូលជ្រោយចង្វា(រង្វង់មូលកាំភ្លើងកួចកាណុង) ដើម្បីលក់វិញ ។
នៅទីតាំងថ្មី អ្នកស្រីប្រាប់ថាស្ថានភាពលក់ដាច់ក៏មិនប្រសើរជាងមុនប៉ុន្មានដែរ ប៉ុន្តែចាត់ទុកថាមិនដូចនៅកន្លែងចាស់ដែលក្នុងថ្ងៃខ្លះគឺស្ទើរនឹងរកចំណេញអត់ឃើញ ។ អ្នកស្រីប្រាប់ថាកន្លែងដែលជួលគេលក់នេះ ត្រូវចំណាយក្នុងមួយខែ៣០ម៉ឺនរៀលដែលធ្វើឲ្យអ្នកស្រីទទួលនូវសម្ពាធកាន់តែខ្លាំងផងដែរ បើទោះជាផលចំណេញអាចចាត់ទុកបានគ្រាន់បើជាងកន្លែងចាស់ ។ អ្នកស្រីនិយាយថា ៖«កាលពីខ្ញុំបើកដំបូងលក់ដាច់ ប៉ុន្តែឥឡូវគេលក់ច្រើនពេកគឺអត់សូវដាច់ទេ សំណាងហើយដែលខ្ញុំប្ដូរមកកន្លែងថ្មីហ្នឹងកុំអីយ៉ាប់ ប៉ុន្តែវាពិបាកត្រង់ជួលកន្លែងគេថ្លៃបន្តិច!» ។ ក្នុងមួយថ្ងៃអ្នកស្រីលក់អស់តែរង្វង់ជាង២០បន្ទះប៉ុណ្ណោះ ខណៈដែលផលចំណេញក៏បានត្រឹមតែប្រមាណជា៣ម៉ឺនរៀល ដោយទូទាត់ថ្លៃកន្លែង និងឲ្យកូនក្មួយដែលជួយលើកនោះទម្រាំបានលក់គឺសឹងមិនគ្រប់ចំណាយឲ្យកូនរៀន និងចំណាយថ្លៃម្ហូបប្រចាំថ្ងៃ ។ អ្នកស្រីបានសម្រេចកុម្ម៉ង់កាបូបក្បាលគីបមកលក់បន្ថែម ដើម្បីទប់ទល់នឹងការធ្លាក់ចុះចំណូលពីមុខរបរលក់ភីហ្សានេះ បើទោះជាការលក់ដូរនៅមិនទាន់ប៉ាន់ស្មានដឹងពីជំហានទៅមុខ ។
ទោះបីយ៉ាងណាអ្នកស្រីប្រាប់ថា មុខរបរថ្មីបានទទួលផ្លែផ្កាកាក់កប ទើបចេះតែធ្វើឲ្យអ្នកស្រី និងស្វាមីមានកម្លាំងចិត្តស្ទុះស្ទា ។ អ្នកស្រីពោលថា មុខរបរលក់កាបូប ក៏ជាចំណូលចិត្តមួយរបស់ខ្លួនផងដែរ ហើយដោយមានការណែនាំផង ទើបអ្នកស្រីសម្រេចចិត្តកុម្ម៉ង់ទិញកាបូបល្អៗក្បាលគីបមកពីប្រទេសថៃ មកលក់ផ្សែផ្សំបែបនេះ ។ កាបូបទាំងអស់ត្រូវបានអ្នកស្រី និងលោកអូត ភូថង ព្យួរលក់រយីងរយោងនៅជាមួយតូបលក់ភីហ្សា ដោយមិនមែនកន្លែងដាក់តាំងសមរម្យនោះទេ ដែលនោះគឺបណ្ដាលមកពីអ្នកស្រីបញ្ជាក់ថា មិនមានលុយជួលកន្លែងបន្ថែមដើម្បីតាំងលក់។ អ្នកស្រីបញ្ជាក់ថា តាំងពីដាក់លក់មកក្នុងមួយថ្ងៃលក់អស់២ទៅ៣កាបូបដែរ គឺមិនស្ងាត់ណាស់ណានោះទេ ។ អ្នកស្រីនិយាយថា ៖«ឥឡូវហ្នឹងមួយថ្ងៃលក់បាន២-៣ដែរ ហើយខ្ញុំទើបនឹងដាក់លក់បាន៤-៥ថ្ងៃហ្នឹង គឺឃើញថាគ្រាន់បើ ព្រោះភាគច្រើនអ្នកចូលមករើសកាបូប គេជួយទិញភីហ្សាយើងអញ្ចឹងដែរ គឺវាដូចជាយោងគ្នាវិញ!» ។
អ្នកស្រីម៉ែន ដាលីយ៉ា បន្តថា ស្វាមីអ្នកស្រីគឺលោកអូត ភូថង ឲ្យតែទំនេរពីការងារបង្វឹកសិស្ស និងពីការងារធ្វើគណៈកម្មការប្រដាល់នៅប៉ុស្ដិ៍លេខ៥ មិនដែលខកខានក្នុងការជួយលក់ភីហ្សា និងកាបូបនោះទេ ដោយលោកគឺជាអ្នកទទួលកាបូបដែលបានដឹកមក និងត្រូវចាត់ចែងយកកាបូបទាំងនោះមកដាក់លក់នោះផង ។ បើថ្ងៃអនាគតអ្នកស្រីមានលុយគ្រប់គ្រាន់ នោះអ្នកស្រីនឹងបើកលក់កាបូបឲ្យបានធំដុំដោយសារតែអាជីពមួយនេះ ក្រៅពីមិនហត់ដូចលក់ភីហ្សាក៏ជាចំណូលចិត្តតាំងពីណាពីណី ។ អ្នកស្រីពោលថា ៖«ទាំងលក់ភីហ្សា និងលក់កាបូបហ្នឹងខ្ញុំស្រឡាញ់ដូចគ្នា ព្រោះមុនលក់ភីហ្សាខ្ញុំធ្លាប់ធ្វើចុងភៅតាមហាងច្រើនដែរ ប៉ុន្តែបើមានលុយខ្ញុំចង់លក់កាបូបជាង ព្រោះកាបូបបើលក់ដាច់ស្រួលចំណេញ!» ។ អ្នកស្រីរំពឹងថា មុខរបរទាំងពីរនឹងជួយឲ្យជីវភាពគ្រួសារមានភាពប្រសើរឡើង បន្ថែមពីលើប្រាក់ចំណូលរបស់ស្វាមីដែលបានពីការធ្វើជាគណៈកម្មការប្រដាល់ ។
គួរបញ្ជាក់ផងដែរថា លោកអូត ភូថង បើទោះជាបានក្លាយខ្លួនជាកីឡាករល្បីឈ្មោះកាលពីមួយរយៈមុន និងមានខ្សែក្រវាត់រាប់មិនអស់មុនពេលឈប់ប្រដាល់ ក៏ស្ថានភាពរស់នៅរបស់លោកមិនខុសពីបងប្រុសនោះឡើយ ។ មកទល់សព្វថ្ងៃ លោកមិនមានផ្ទះផ្ទាល់ខ្លួននោះទេ ដោយត្រូវសហព័ន្ធផ្តល់កន្លែងឲ្យស្នាក់នៅក្នុងបរិវេណស្ដាតចាស់ គ្រាន់សម្រួលបន្ទុកជួលផ្ទះគេនៅ ។ លោកចាប់ផ្ដើមធូរស្រាលបន្ទាប់ពីប៉ុស្តិ៍លេខ៥អនុញ្ញាតឲ្យធ្វើគណៈកម្មការផ្ដល់ពិន្ទុ ហើយភរិយាក៏បែកគំនិតបើកលក់ភីហ្សា និងចុងក្រោយបន្ថែមលក់កាបូប ៕
ចែករំលែកព័តមាននេះ