នាំគ្នាជិះម៉ូតូស្ពាយកាបូប មានលាក់ទុកកាំបិតផ្គាក់ ១ និងដាវសាម៉ូរ៉ៃ ១ដើម ជួបកម្លាំងល្បាត ដេញតាមចាប់ឃាត់ខ្លួន បាន ៣នាក់
- ភ្នំពេញ
ភ្នំពេញ៖ អត់ការងារធ្វើ ក្រុមយុវជនឈាមរាវ ចំនួន ៣នាក់ ដែលមានអាយុប្រមាណជា ១៧ ទៅ ១៨ឆ្នាំ ចំនួន…
ភ្នំពេញ៖ អត់ការងារធ្វើ ក្រុមយុវជនឈាមរាវ ចំនួន ៣នាក់ ដែលមានអាយុប្រមាណជា ១៧ ទៅ ១៨ឆ្នាំ ចំនួន ៣នាក់ ត្រូវបានកម្លាំងល្បាតនៃអធិការដ្ឋាននគរបាលខណ្ឌចំការមន សហការជាមួយនឹងកម្លាំងនគរបាលប៉ុស្តិ៍ផ្សារដើមថ្កូវ និងប៉ុស្តិ៍នគរបាលទួលទំពូងទី១ បានដេញស្ទាក់ចាប់បានភ្លាមៗ និងដកហូតបានកាំបិតផ្គាប់ ១ និងដាវសាម៉ូរ៉ៃ យ៉ាងមុតស្រួច ១ដើម។
ករណីនេះ កើតឡើង នៅពេលដែលកម្លាំងល្បាត កំពុងតែធ្វើកាតដើរល្បាត នៅក្នុងភូមិសាស្ត្ររបស់ខ្លួន ក៏បានប្រទះឃើញពួកគេ ជិះម៉ូតូម៉ាកហុងដា សេ ១២៥មួយគ្រឿង ឌុបគ្នា នៅម្តុំខាងក្រោយកន្លែងហាត់ប្រាណភ្នំពេញស្ព៉តក្លឹប ដោយមានស្ពាយកាបូបមួយខាងក្រោយ ហើយចេញដងដាវ មកខាងក្រៅ។ ដោយមានការសង្ស័យ ប៉ូលិស ក៏ជិះដេញតាមប្រផាប់ចាប់ប្រភីង រហូតដល់ផ្សារទួលទំពូង ទើបចាប់បាន។
ករណីនេះ បានកើតឡើង កាលពីវេលាម៉ោង ៦ និង ០០នាទីល្ងាចថ្ងៃទី២៤ ខែមិថុនា ឆ្នាំ២០២១ នៅផ្លូវលេខ១៦៣ ខាងលិចផ្សារទួលទំពូង ក្នុងសង្កាត់ទួលទំពូងទី១ ខណ្ឌចំការមន។
នគរបាល បានប្រាប់ឱ្យដឹងថា មុនពេលកើតហេតុ ពេលដែលកម្លាំងរបស់នគរបាលនៃអធិការដ្ឋានខណ្ឌចំការមន កំពុងតែជិះម៉ូតូល្បាត នៅក្នុងភូមិសាស្ត្ររបស់ខ្លួន នៅតាមបណ្តោយផ្លូវលេខ ៤៣០ ម្តុំកន្លែងហាត់ប្រាណភ្នំពេញស្ព៉តក្លឹបនោះ ក៏ស្រាប់តែបានប្រទះឃើញក្រុមក្មេងស្ទាវមួយក្រុម មានគ្នា ៣នាក់ ដែលមានអាយុប្រមាណ ចាប់ពី ១៧ ទៅ ១៨ឆ្នាំ ជិះម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ 1HV-0678 មួយគ្រឿង ឌុបគ្នា ដោយយុវជនម្នាក់ ដែលជិះខាងក្រោយ មានស្ពាយកាបូបពណ៌ខៀវមួយ ខាងក្រោយខ្នង និងមានចេញដងដាវសាម៉ូរ៉ៃ មកខាងក្រៅផងដែរ។
ប្រភពដដែល បានប្រាប់បន្តទៀតថា ពេលដែលកម្លាំងល្បាត បានឃើញក្រុមក្មេងស្ទាវមួយក្រុម មានគ្នា ៣នាក់ ជិះម៉ូតូមួយគ្រឿងឌុបគ្នា ស្ពាយកាបូប ចេញដងដាវសាម៉ូរ៉ៃ មកខាងក្រៅច្រង៉ាងនោះ ក៏បានដេញតាមហៅ តែពួកគេបានដឹងខ្លួន ក៏បានបោះកាបូបស្ពាយមួយនោះ ចោល រួចហើយ ក៏ព្យាយាមនាំគ្នាជិះម៉ូតូរត់គេចខ្លួន។ តែប៉ូលិស ក៏បានស្រែកតាម អាយឌី ទាក់ទងតាមវិទ្យុទាក់ទង ទៅកាន់កម្លាំងនគរបាលប៉ុស្តិ៍ផ្សារដើមថ្កូវ និងនគរបាលប៉ូស្តិ៍ទួលទំពូងទី១ អោយជួយដេញ រហូតទៅដល់ផ្លូវលេខ១៦៣ ខាងលិចផ្សារទួលទំពូង ទើបតាមស្ទាក់ចាប់ឃាត់ខ្លួនពួកគេ បានភ្លាមៗ ទាំង ៣នាក់ និងនាំខ្លួនចូលទៅកាន់នគរបាលប៉ុស្តិ៍ទួលទំពូងទី១ ដែលនៅក្បែរនោះតែម្តង។
កម្លាំងសមត្ថកិច្ច បានឃាត់ខ្លួនក្រុមក្មេងស្ទាវទាំង ៣នាក់ខាងលើ រួមទាំងកាបូបស្ពាយមួយ ដែលមានលាក់ទុកកាំបិតផ្គាក់ ចំនួន ១ និងដាវសាម៉ូរ៉ៃ ១ដើម ដែលមានមុខមុតស្រួចសស្ងាច គួរអោយព្រឺរោម និងម៉ូតូម៉ាកហុងដា សេ១២៥ មួយគ្រឿង ដែលពួកគេជិះឌុបគ្នា។
តាមការសួរនាំជាជំហ៊ានដំបូង ក្រុមក្មេងស្ទាវទាំង ៣នាក់ បានសារភាពថា កាំបិតផ្គាក់ និងដាវសាម៉ូរ៉ៃ ទាំង ២នេះ ជារបស់មិត្តភក្តិរបស់ខ្លួនម្នាក់ បានផ្ញើ និងទូរស័ព្ទ អោយយកមកអោយ នៅម្តុំខាងក្រោយភ្នំពេញស្ព៉ត។ តែក៏ត្រូវកម្លាំងសមត្ថកិច្ច ឃើញ និងដេញចាប់បានតែម្តងទៅ។
ក្រោយពីបានសួរនាំដឹងអំពីកន្លែងទីតាំងកើតហេតុ រឿងនេះមិនមែនកើតឡើង នៅក្នុងទឹកដីប៉ុស្តិ៍នគរបាលផ្សារដើមថ្លូវ និងប៉ុស្តិ៍ទួលទំពូងទី១ ទេ គឺកើតឡើងនៅក្នុងភូមិសាស្ត្ររបស់នគរបាលប៉ូស្តិ៍ទួលទំពូងទី២ ទើបសមត្ថកិច្ច បានបញ្ជូនបន្ត ដើម្បីធ្វើការសាកសួរ និងចាត់ការ ទៅតាមនីតិវិធី៕ ភី ផល
ចែករំលែកព័តមាននេះ