រាជធានីភ្នំពេញ ៖ សម្រាប់ប្រទេសកម្ពុជាយើង ដោយសាតែមានទំនៀមទម្លាប់មានការខ្មាសអៀនច្រើន ម្ល៉ោះហើយ ធ្វើកុមារី និងស្ត្រីខ្មែរមួយចំនួន នៅមានការយល់ដឹង ពាក់ព័ន្ធទៅនឹងការមករដូវខែ នៅមានកម្រិតនៅឡើយ…
រាជធានីភ្នំពេញ ៖ សម្រាប់ប្រទេសកម្ពុជាយើង ដោយសាតែមានទំនៀមទម្លាប់មានការខ្មាសអៀនច្រើន ម្ល៉ោះហើយ ធ្វើកុមារី និងស្ត្រីខ្មែរមួយចំនួន នៅមានការយល់ដឹង ពាក់ព័ន្ធទៅនឹងការមករដូវខែ នៅមានកម្រិតនៅឡើយ បើប្រៀបធៀបទៅនឹងប្រទេសដទៃ នេះជាការលើកឡើងពីសំណាក់លោកស្រីវេជ្ជបណ្ឌិត ហួយ ស៊ីខេង ប្រធានគ្រប់គ្រងកម្មវិធីអង្គការមូលនិធិ ថែទាំសុខភាព អ្នកជំងឺអេដស៍ ប្រចាំប្រទេសកម្ពុជា ។
លើកឡើងក្នុងពិធី “ទិវាសុខភាព ពេលមករដូវ ឆ្នាំ២០២៤” នាព្រឹកថ្ងៃទី២៥ ខែឧសភា ឆ្នាំ២០២៤ ដែលរៀបចំឡើងនាអនុវិទ្យាល័យសម្តេចតេជោ ហ៊ុន សែន ចំបក់មាស សង្កាត់បាក់ខែង ខណ្ឌ ជ្រោយចង្វារ រាជធានីភ្នំពេញ លោកស្រីវេជ្ជបណ្ឌិត ហួយ ស៊ីខេង ប្រធានគ្រប់គ្រងកម្មវិធីអង្គការមូលនិធិ ថែទាំសុខភាព អ្នកជំងឺអេដស៍ ឱ្យដឹងថា ៖ ការប្រារពទិវាសុខភាពពេលមករដូវឆ្នាំនេះ ក្នុងគោលបំណងដើម្បីប្រយុទ្ធនឹងការលំបាកនាពេលមានរដូវ និងលុបបំបាត់ការមាក់ងាយ នៅពេលមករដូវ ដែលជាឧបសគ្គរារាំងចំពោះស្ត្រី និងមនុស្សគ្រប់វ័យមិនឱ្យមានការចម្រើនលូតលាស់ ។
អង្គការមូលនិធិ ថែទាំសុខភាព អ្នកជំងឺអេដស៍ នឹងធ្វើការចែកចាយដោយឥតគិតថ្លៃ នូវខោទ្រនាប់នារី ដល់កុមារី ក្មេងស្រី និងស្ត្រីមួយចំនួន ដែលជាមានតម្រូវការចាំបាច់បំផុត សម្រាប់នៅពេលមករដូវ ។
លោកស្រីវេជ្ជបណ្ឌិត ហួយ ស៊ីខេង បានលើកឡើងដោយបញ្ជាក់ថា “ការធ្វើឱ្យប្រសើរឡើងនូវសុខភាពពេលមករដូវចំពោះសិស្សសាលា ក្មេងស្រី អាចនាំឱ្យបានទទួលលទ្ធផលយូរអង្វែងលើការអប់រំ សុខភាព និងសុខុមាលភាពរបស់ស្ត្រីទាំងមូល” ។
លោកស្រីវេជ្ជបណ្ឌិតបានបន្តឱ្យដឹងថា ៖ ជារៀងរាល់ឆ្នាំ ទិវានេះប្រារព្ធឡើងនៅថ្ងៃទី២៨ ខែឧសភា ទិវាសុខភាពពេលមករដូវបង្កើនការយល់ដឹងអំពីសារៈសំខាន់ នៃការអប់រំសុខភាពពេលមករដូវ និងធនធានដូចជា ខោទ្រនាប់ The Period. ដែលនឹងជួយគាត់ឱ្យបន្តរៀននៅសាលា កាត់បន្ថយការមាក់ងាយ និងការរើសអើង និងអនុញ្ញាតឱ្យពួកគេរីកចម្រើនលូតលាស់ នាពេល ដែលពួកគាត់កំពង់មានរដូវ។ ខោទ្រនាប់ The Period ជាខោ ដែលប្រកបដោយភាពច្នៃប្រឌិត ដែលរចនាឡើងដោយក្រុមហ៊ុន The Period និងផលិតឡើងដោយបច្ចេកវិទ្យាកន្សែង ៤ស្រទាប់ ដែលមានសមត្ថភាពស្រូបបានខ្ពស់ និងមានស្រទាប់ពិសេស ដែលអាចបោកគក់បាន ដើម្បីប្រើឡើងវិញបាន និងប្រើប្រាស់បានរយៈ ពេលពី២ ទៅ១០ឆ្នាំ ។
លោក ហែង ស៊ីណាត ប្រធានមន្ទីរអប់រំយុវជន និងកីឡា រាជធានីភ្នំពេញ បានឱ្យដឹងថា ការជំរុញឱ្យមាន ការចូលរួមគ្រប់អ្នកពាក់ព័ន្ធ តាំងពីថ្នាក់ជាតិរហូតដល់ថ្នាក់ក្រោមជាតិ ដែលរួមមាន គណៈកម្មាធិការ សុខភាព ស្ថាប័ន ខេត្ត ស្រុក ខណ្ឌ និងឃុំ សង្កាត់ ទូទាំងប្រទេស រួមជាមួយដៃគូអភិវឌ្ឍន៍ជាតិ អន្តរជាតិ សង្គម ស៊ីវិល ដើម្បីពង្រឹងសុខភាព ស្ត្រី និងក្មេងស្រី ។
ជាមួយគ្នានេះ លោកបានថ្លែងដែរថា “ក្រៅពីនេះយើងត្រូវរួមគ្នា បំបាត់ការមាក់ងាយ និងអ្នកមិនបានយកចិត្តទុកដាក់ចំពោះអ្នកមករដូវរួមទាំងការបង្កើនការយល់ ដឹងអំពីសារៈសំខាន់ នៃការអប់រំសុខភាពពេលមករដូវ និងការគ្រប់គ្រងអនាម័យពេលមករដូវ ដូចជាសំឡីអ នាម័យ ទីកន្លែងសុវត្ថិភាព សម្រាប់សិស្សស្រី នៅពេលដែលពួកគាត់មករដូវ ដែលនឹងជួយគាត់ឱ្យបានចូល រៀន កាត់បន្ថយការមាក់ងាយ និងការរើសអើង និងអនុញ្ញាតឱ្យពួកគេរីកចម្រើន និងលូតលាស់” ។
គួរបញ្ជាក់ថា តាមការប៉ាន់ប្រមាណមានប្រជាជន ប្រមាណ ១.៨ពាន់លាននាក់ មករដូវនៅទូទាំងពិភពលោក ប៉ុន្តែ ៥០០លាននាក់ នឹងជួបប្រទះនឹងភាពក្រីក្រក្នុងពេលមានរដូវ រួមទាំងកង្វះលទ្ធភាពទទួលបានផលិតផលសុខភាពពេលមករដូវ កន្លែងសុវត្ថិភាព និងអនាម័យ និងការទទួលយកសហគមន៍។ ឧបសគ្គទាំងនេះ រួមជាមួយនឹងការមាក់ងាយ អាចនាំទៅរកលទ្ធផលសុខភាពមិនល្អ ការខកខានការសិក្សា ឬការងារ និងផលប៉ះពាល់អវិជ្ជមានលើសុខភាពផ្លូវចិត្ត។ ទិវាសុខភាពរដូវនេះ សូមបញ្ចប់ភាពក្រីក្រ និងបញ្ចប់ការមាក់ងាយ ៕
ចែករំលែកព័តមាននេះ