រាជធានីភ្នំពេញ ៖ នៅទីបំផុត កីឡាករជើងខ្លាំងថៃ Kamlai Phathដែលអ្នកស្នេហាវិស័យប្រដាល់កត់សម្គាល់ពីសមត្ថភាពប្រកួតតាំងពីបានយកឈ្នះកីឡាកររឿង សោភ័ណ្ឌនោះ ពិតជាឈ្នះ ឡុង សុភី ដូចការគ្រោងទុកមែន បើទោះជាឡុង សុភី ប្ដេជ្ញាថាមិនឲ្យអាម៉ាស់មុខនៅគ្រប់ការប្រកួតមុនថ្ងៃរៀបការក្ដី។ ជាមួយគ្នានោះ កីឡាករកម្ពុជាមួយរូបទៀត គឺដុម កែវ ដា ក៏ត្រូវគេឃើញស្មើកីឡាករថៃយ៉ាងត្រដាបត្រដួសបំផុត។
កាលពីចុងសប្ដាហ៍កន្លងទៅនៅលើសង្វៀនទូរទស្សន៍អាស៊ីអាគ្នេយ៍ គឺមានការប្រកួតអន្តរជាតិតែមួយសង្វៀនប៉ុណ្ណោះ ប៉ុន្តែបានទទួលការចាប់អារម្មណ៍ពេញទំហឹងនៅរសៀលថ្ងៃសៅរ៍ទី២៨ វិច្ឆិកា ។ ការប្រកួតអន្តរជាតិនេះ គឺមានសមាសភាពរបស់កីឡាករកម្ពុជា២រូប និងកីឡាករថៃ២រូបដែលសុទ្ធតែមានក្រេឌីតរៀងខ្លួន។ ក្នុងចំណោមគូប្រកួតទាំងពីរ គូប្រកួតឡុង សុភី និងKamlai Phathបានកំដរបរិយាកាសការប្រដាល់អន្តរជាតិក្នុងប្រភេទ៦៩គីឡូក្រាមនាថ្ងៃនោះ កក្រើកខ្លាំងមែនទែន ។ ជំនួបរបស់អ្នកទាំងពីរមានការចាប់អារម្មណ៍ដោយសារតែជើងខ្លាំងរបស់ក្លិបសាលវ័ន្តកីឡា បានប្រកាសថា នឹងយកជ័យជម្នះឲ្យបានដាច់ខាតមុនចូលរោងការនៅដើមឆ្នាំ២០១៦ ប៉ុន្តែបែរជាបរាជ័យយ៉ាងអាម៉ាស់មុខនៅលើសង្វៀន ។
ការប្រកួត៣ទឹកដំបូង កីឡាករឡុង សុភី ត្រូវមហាជនចោទថាមិនវាយ និងទំនងជាមានបញ្ហាមិនចង់ឈ្នះដោយសារតែបានបណ្ដោយឲ្យកីឡាករថៃវាយសន្ធាប់តែម្ខាង ហើយខ្លួនឯងបានត្រឹមវាយទប់កុំឱ្យទ្រមខ្លាំង ។ ប៉ុន្តែក្រោយការព្រមានផ្ទួនៗពីលោករាជ សូផែន មន្ត្រីបច្ចេកទេសប្រចាំនៅទូរទស្សន៍អាស៊ីអាគ្នេយ៍ និងពីលោកអាជ្ញាកណ្ដាលថានឹងដេញចុះ បើនៅតែមិនព្រមវាយ ទើបគេឃើញជើងខ្លាំង ឡុង សុភី ប្ដូរទម្រង់វាយតប់ដើម្បីគេចចេញពីការប៉ាន់ស្មានអវិជ្ជមាន ។
យ៉ាងណាក៏ដោយ គេកត់សម្គាល់ថា ការប្រឹងប្រែងកាន់តែខ្លាំងរបស់គេកាន់តែត្រូវប្រឈមនឹងកម្រិតវាយលុករបស់កីឡាករថៃ KamlaiPheathទ្វេដង ដោយសារតែជើងខ្លាំងឆ្លងដែនរូបនេះ មិនមែនល្អតែជើង និងម៉ាត់ប៉ុណ្ណោះទេ គឺកែង និងស្ទីលរំដោះខ្លួនរបស់គេក៏នាំមុខកីឡាករកម្ពុជាផងដែរ។ ជាមួយនឹងការប្រឹងសម្រុកមិនបានជោគជ័យ របស់ឡុង សុភី ទើបគេមើលឃើញថាហេតុផលដែលកីឡាករកម្ពុជារូបនេះ មិនសូវសម្រុកខ្លាំងកាលពីដើមទឹក គឺមិនមែនដោយសារតែមានអាថ៌កំបាំងពាក់ព័ន្ធរឿងលក់ខ្លួនទេ ប៉ុន្តែទំនងមកពីដឹងថាដៃគូបើហ៊ានតែលូកខ្លាំងគឺរលាក ទើបប្រើយុទ្ធសាស្ត្រស្ទាបស្ទង់ ហើយក៏ត្រូវគូប្រកួតវាយត្រូវខ្ចប់ៗរកតែស្ទីលតវិញអត់បាន ។
Kamlai Phathពិតជាជើងខ្លាំងមិនអន់ជាងប្រវត្តិប្រកួតដែលបានបង្ហាញមែន ហើយជ័យជម្នះលើកីឡាករឡុង សុភី គឺបានបង្ហាញកាន់តែច្បាស់ថា ឱកាសវាយផ្ដួលកីឡាករ រឿង សោភ័ណ្ឌ កាលពីពេលមុន មិនមែនចៃដន្យនោះទេ តែគឺចេញពីសមត្ថភាពពិតៗ។ ការទទួលស្គាល់បែបនេះ ត្រូវគេឃើញកើតឡើងពេញក្នុងស្រទាប់អ្នកទស្សនា បន្ទាប់ពីការប្រកួត៥ទឹករវាងគេ និងឡុង សុភី គឺឡុង សុភី ចាញ់ប្រៀបពេញទំហឹង ដោយមានន័យថាទោះជាកីឡាករកម្ពុជាប្រឹងរំលេចក្បាច់ណា ក៏Kamlai Phath ទប់ជាប់ ហើយវាយបកវិញបានល្អ ។ ឡុង សុភី ទំនងជាត្រូវហ្វឹកហាត់ក្បាច់គុនបន្ថែមទៀត ដើម្បីត្រឡប់មកសងសឹកគូប្រកួតរបស់ខ្លួន ដ្បិតផ្អែកតាមការប្រកួតទាំងជាមួយរឿង សោភ័ណ្ឌ និងឡុង សុភី គឺKamlai Phathមានកណ្ដាប់ដៃខ្លាំងណាស់ ហើយការប្រកួតរបស់គេ ក៏រស់រវើកមិនធម្មតានោះដែរ។
សម្រាប់ការប្រកួតអន្តរជាតិមួយគូទៀត គឺឌុម កែវដា ជើងខ្លាំងរបស់កម្ពុជាមកពីក្លិបមកុដរាជសីហ៍ ត្រូវគេឃើញដណ្ដើមបានពិន្ទុស្មើជាមួយកីឡាករថៃឈ្មោះ Kamlai Yuk យ៉ាងលំបាកបំផុត ដោយលទ្ធផលនេះត្រូវអ្នកទស្សនាយល់ថាដើម្បីជាការយល់មុខចំពោះកីឡាករកម្ពុជានោះផង ។ ការប្រកួតរបស់អ្នកទាំងពីរធ្វើឡើងក្នុងប្រភេទទម្ងន់៦០គីឡូក្រាម ដោយមានអ្នកទស្សនាជក់ចិត្តដិតអារម្មណ៍យ៉ាងខ្លាំង បើធៀបនឹងការប្រកួតរវាងឡុង សុភី និងកីឡាករថៃ។ ជាពិសេសក្នុងពេលកីឡាករកម្ពុជាខំប្រឹងស្ទុះស្ទាស្ទើរអស់សមត្ថភាពតាំងពីដើមទី ប៉ុន្តែបែរជាត្រូវត្រឡប់មកវិញដោយកណ្ដាប់ដៃ និងរន្ទះជើងខ្លាំងដូចញញួរដេញសំពងនៅលើសង្វៀន។ កីឡាករដុម កែវដា ត្រូវបានKamlai Yuk វាយឡើងទ្រមខ្លួនក្នុង៣ទឹកដំបូង ហើយបើកុំតែ២ទឹកចុងក្រោយ គេមានឱកាសវាយឲ្យកីឡាករថៃទ្រមខ្លួនសងវិញ កុំអីលទ្ធផលស្មើនឹងមិនអាចកើតឡើងនោះទេ សម្រាប់ការប្រកួតដ៏គួរឲ្យចាប់អារម្មណ៍នេះ។
ងាកមកកាន់ការប្រកួតកាលព្រឹកថ្ងៃអាទិត្យម្សិលមិញវិញ ក៏មានលទ្ធផលគួរឱ្យចាប់អារម្មណ៍ផងដែរ។ កីឡាករស៊ុម សុខឡេង មកពីក្លិបសាលវ័ន្តកីឡា បានផ្ដួលកីឡាករមឿន ចន្ធី មកពីក្លិបមកុដរាជសីហ៍ឲ្យសន្លប់ក្នុងទឹកទី២ ។ កីឡាករទូច វិរៈ មកពីក្លិបច័ន្ទបុរីវង្សកីឡា វាយឈ្នះកីឡាករផាន រះ មកពីក្លិបតាព្រហ្មមានជ័យដោយពិន្ទុ ។ កីឡាករស៊ឹម ប៊ុនឆៃ មកពីក្លិបព្រៃទទឹងខេត្តបាត់ដំបង ផ្ដួលកីឡាករហួន ស៊ីនេត មកពីក្លិបសំរោងកោងកីឡាខេត្តបាត់ដំបងឲ្យបោះបង់ការប្រកួតក្នុងទឹកទី៥ ។ យ៉ាងណាក៏ដោយ គូនេះ ក៏មានការរិះគន់នៅដើមទឹកផងដែរ ។
ដោយសារតែស៊ឹម ប៊ុនឆៃ ហាក់មិនសូវចង់វាយ ហើយធ្វើឱ្យអ្នកទស្សនាចោទថា បានលក់ខ្លួននិងត្រូវលោកអាជ្ញាកណ្ដាលព្រមានបណ្ដេញចុះមុនប្រឹងប្រែងវាយសម្រុករហូតបានជ័យជម្នះ ។ មួយគូទៀតដែលជាគូឯក ក៏មានសម្រែកហ៊ោកញ្ជ្រៀវកងរំពងណាស់ដែរ ក្នុងពេលកីឡាករជើងខ្លាំង ធី តុងហ៊ី វាយឈ្នះកីឡាករសរ រាជសីហ៍ ដែលជាជើងខ្លាំងដូចគ្នាដោយពិន្ទុនោះ ៕
ចែករំលែកព័តមាននេះ