រាជធានីភ្នំពេញ ៖ ការប្រកួតកីឡាវាយកូនបាល់ ITF Futures ដំណាក់កាលទី១ មានឈ្មោះថា GLF OPEN 2015 ដែលបានធ្វើឡើងលើទីលានមជ្ឈមណ្ឌលជាតិកីឡាវាយកូនបាល់ស្ថិតនៅសង្កាត់ទឹកថ្លាបានបញ្ចប់ជាស្ថាពរហើយ កាលពីថ្ងៃទី២៨ វិច្ឆិកា កន្លងមកនេះ ។
ការប្រកួតនេះត្រូវបានគេរៀបចំធ្វើឡើងចាប់តាំងពីថ្ងៃទី២២ វិច្ឆិកា និងត្រូវបញ្ចប់នៅថ្ងៃទី២៨វិច្ឆិកាកន្លងមកនេះ ។ ការប្រកួតនៅវគ្គជម្រុះដំបូងមានកីឡាករមកពីតាមបណ្ដាប្រទេសជាច្រើនចូលរួម ដូចជាកម្ពុជា ម៉ាឡេស៊ី ចិន តៃវ៉ាន់កូរ៉េ វៀតណាម ជប៉ុន អ៊ូសបេគីស្ថាន ហ្វ៊ីលីពីននិងនូវែលសេឡង់ ។ ជាអកុសល ឆ្លងកាត់ការប្រកួតយ៉ាងស្វិតស្វាញអស់រយៈពេលជាច្រើនថ្ងៃមក កីឡាករកម្ពុជាបានចាញ់តាំងពីនៅក្នុងវគ្គជម្រុះដំបូងមកម៉្លេះ ។
ទោះជាយ៉ាងណា លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ដែលបានអញ្ជើញជាអធិបតីក្នុងពិធីបិទការប្រកួត បានមានប្រសាសន៍ថា ថ្វីដ្បិតតែកម្ពុជាយើងមិនបានឈានមកដល់វគ្គផ្ដាច់ព្រ័ត្រមែន ប៉ុន្តែអាចចាត់ទុកថា នេះជាបទពិសោធន៍មួយទៀត សម្រាប់កីឡាករកម្ពុជា ។ លោកថា ព្រឹត្តិការណ៍នេះកីឡាករបរទេសសុទ្ធសឹងតែជាអ្នកមានជំនាញខ្ពស់ ដូច្នេះការឈានទៅដណ្ដើមជ័យលាភីលើកនេះគឺជារឿងមួយដែលពិបាកបំផុត ។ ជាក់ស្ដែងអ្នកដែលមានសមត្ថភាពក្នុងការប្រកួតដណ្ដើមពាននៅក្នុងពេលនេះ យើងសង្កេតឃើញថា ពួកគេពិតជាអ្នកដែលមានសមត្ថភាពខ្ពស់មែន ។
ជាលទ្ធផល ការប្រកួតនៅក្នុងវគ្គផ្ដាច់ព្រ័ត្រពានរង្វាន់ ITF Futures2015 ដំណាក់កាលទី១នេះ វិញ្ញាសាវាយទោលចំណាត់ថ្នាក់លេខ១បានទៅលើកីឡាករកូរ៉េ KWON Soon Woo ដែលបានយកឈ្នះកីឡាករកូរ៉េដូចគ្នាឈ្មោះSon.JiHoon ២សិតទល់នឹង០ ។ ដោយឡែក សម្រាប់វិញ្ញាសាវាយគូវិញនោះចំណាត់ថ្នាក់លេខ១ បានទៅលើកីឡាករមកពីចិនតៃវ៉ាន់ឈ្មោះ LEE Kwan Yi និង LIU Shao-Fan បន្ទាប់ពីបានយកឈ្នះកីឡាករកូរ៉េ KWON Soon និង Son Ji Hoon ២សិតទល់នឹង០ ៕
ចែករំលែកព័តមាននេះ