កីឡាការិនី ស្រួង ភាវី កាន់តែល្បីក្នុងអាជីពស្នូកឃ័រ
- ភ្នំពេញ
រាជធានីភ្នំពេញ ៖ កីឡាការិនីស្នូកឃ័រឆ្នើមរបស់កម្ពុជា គឺលោកស្រី ស្រួង ភាវី កាន់តែទទួលបានការចាប់អារម្មណ៍ បន្ទាប់ពីបាន
រាជធានីភ្នំពេញ ៖ កីឡាការិនីស្នូកឃ័រឆ្នើមរបស់កម្ពុជា គឺលោកស្រី ស្រួង ភាវី កាន់តែទទួលបានការចាប់អារម្មណ៍ បន្ទាប់ពីបានគ្រងតំណែងជើងឯកលើកដំបូង ក្នុងការប្រកួតកីឡាស្នូកឃ័រ(ការ៉ុម)ដណ្ដើមពានរង្វាន់ Blue One Resort LPBA Championship (ផ្នែកនារី) នៅសាធារណរដ្ឋកូរ៉េ។ ជ័យជម្នះរបស់នាង បានធ្វើអោយពិភពលោក ជាពិសេសអ្នកស្រលាញ់កីឡាស្នូកឃ័រ កាន់តែស្ងើចសរសើរចំពោះស្ត្រីខ្មែររូបនេះ ខណៈដែលតំណែងជើងឯករបស់នាង គឺជាលទ្ធផលដែលគេនៅតែដក់ការចងចាំមកទល់ពេលនេះ។
កីឡាការិនី ស្រួង ភាវី បានក្លាយជាជើងខ្លាំង បន្ទាប់ពីវាយបកយកឈ្នះកីឡាការិនីម្ចាស់ផ្ទះ Kim Gayoung ដោយលទ្ធផល ៣-១សិត នៅក្នុងវគ្គផ្ដាច់ព្រ័ត្រ ដោយជ័យជម្នះរបស់នាងកាលពីថ្ងៃទី២០ ខែមិថុនា ឆ្នាំ២០២១ គឺសូម្បីតែកីឡាករ កីឡាការិនីជនជាតិកូរ៉េ ក៏លាន់មាត់គ្រប់គ្នាផងដែរ ។
តាមការបញ្ជាក់របស់លោកស្រី ស្រួង ភាវី គឺលោកស្រី បានចំណាយពេលប្រកួតទម្រាំតែបានតំណែងនេះ គឺរហូតដល់ ៨ថ្ងៃ តាំងពីថ្ងៃទី១៤ រហូតដល់ថ្ងៃទី២១ ខែមិថុនា ឆ្នាំ២០២១។ នេះក៏ជាលើកដំបូងផងដែរ ដែលលោកស្រីបានចូលរួមប្រកួតព្រឹត្តិការណ៍អន្ដរជាតិដ៏ធំនេះ បន្ទាប់ពីលោកស្រីបានចុះកុងត្រាប្រកួតតំណាងក្រុមហ៊ុន Blue One Resort រយៈពេល ១ឆ្នាំ។ ភាពល្បីល្បាញរបស់លោកស្រី កាលនោះគឺមានកីឡាការិនីចូលរួមសរុប ៦៤នាក់ ដែលនោះគឺសុទ្ធសឹងតែជាជើងខ្លាំងកម្រិតពិភពលោក។ នេះក៏ជាកំណត់ត្រាថ្មីលើទឹកដីកូរ៉េផងដែរ។ លោកស្រីថា គាត់បានឆ្លងកាត់ការប្រកួតជាច្រើនវគ្គ រហូតបានឡើងវគ្គផ្ដាច់ព្រ័ត្រ ហើយបានប៉ះជាមួយកីឡាការិនីមានបទពិសោធយូរឆ្នាំ គឺKim Gayoung ដែលជ័យជម្នះនេះហើយ ទើបធ្វើអោយលោកស្រី ស្រួង ភាវី ក្លាយជាទីចាប់អារម្មណ៍ក្នុងវិស័យកីឡា។
លោកស្រី ស្រួង ភាវី បន្ដថា ការប្រកួតទាំងអស់សុទ្ធតែមានភាពតានតឹង តែលោកស្រី យល់ថា ការប្រកួតដែលទើបបញ្ចប់ គឺជាការប្រកួតប្រជែងខ្លាំង បើធៀបនឹងការប្រកួតផ្សេងៗនៅកូរ៉េ។ នោះគឺដោយសារតែការប្រកួតនោះ គឺជាប្រកួត ដែលសម្រិតសម្រាំងសុទ្ធតែជាជើងខ្លាំង ទាំងកីឡាការិនីក្នុងស្រុក និងក្រៅស្រុក ដោយក្រុមហ៊ុនដែលបានចុះឈ្មោះចូលរួម។ ដូច្នេះ លោកស្រីពិតជាមានមោទនភាព និងបានចាត់ទុកសមិទ្ធផល ដែលកើតចេញពីការខិតខំប្រឹងប្រែងមួយនេះ គឺជាកាដូថ្មីមួយទៀតសម្រាប់ប្រទេស និងប្រជាជនកម្ពុជា រួមទាំងអ្នកគាំទ្ររបស់លោកស្រីនៅប្រទេសកូរ៉េផងដែរ។
ជាមួយការដណ្ដើមបានជើងឯកពានរង្វាន់ Blue One Resort LPBA Championship នេះ កីឡាការិនី ស្រួង ភាវី បានទទួលប្រាក់រង្វាន់ចំនួន ២០លានវ៉ុន ឬស្មើនឹងប្រមាណ ១៧,៥៧៩ដុល្លារ។ លើសពីនេះ ប្រជាជនកូរ៉េជាច្រើន បានសម្ដែងការគោរពស្រលាញ់ ហើយចាត់ទុកលោកស្រី គឺជា “នារីខ្លាំង” ម្នាក់ទៀតផង បន្ទាប់ពីលោកស្រីធ្លាប់ដណ្ដើមបានជើងឯកថ្នាក់ជាតិជាច្រើនសម័យ នៅសាធារណរដ្ឋកូរ៉េ មុននឹងដណ្ដើមបានជើងឯកពានរង្វាន់ Blue One Resort LPBA Championship លើប្រភេទកីឡាដ៏ពេញនិយមនៅកូរ៉េមួយនេះ៕
ចែករំលែកព័តមាននេះ