បុរសស្បែកខ្មៅជាជនជាតិប្រេស៊ីលម្នាក់ដែលមានវិជ្ជមានជំងឺកូវីដ១៩ ត្រូវបានកម្លាំងកងរាជអាវុធហត្ថខណ្ឌបឹងកេងកង សហការជាមួយកម្លាំងកងរាជអាវុធហត្ថចំការមន និងកម្លាំងកងរាជអាវុធហត្ថខណ្ឌ៧មករា ដេញតាមចាប់ឃាត់ខ្លួនបានភ្លាមៗ ក្រោយពេល
រាជធានីភ្នំពេញ ៖ បុរសស្បែកខ្មៅជាជនជាតិប្រេស៊ីលម្នាក់ដែលមានវិជ្ជមានជំងឺកូវីដ១៩ ត្រូវបានកម្លាំងកងរាជអាវុធហត្ថខណ្ឌបឹងកេងកង សហការជាមួយកម្លាំងកងរាជអាវុធហត្ថចំការមន និងកម្លាំងកងរាជអាវុធហត្ថខណ្ឌ៧មករា ដេញតាមចាប់ឃាត់ខ្លួនបានភ្លាមៗ ក្រោយពេលដែលរូបគេឡើងរបងព្យាយាមរត់គេចចេញពីកន្លែងព្យាបាលនៃមន្ទីរពេទ្យរបេងនោះ។
ករណីនេះខាងលើដែរ បានកើតឡើងកាលពីវេលាម៉ោង៣និង៤០នាទីរសៀល ថ្ងៃទី២០ ខែ មិថុនា ឆ្នាំ២០២១ នៅចំណុចមន្ទីរពេទ្យព្យាបាលរបេង និងហង់សិន ផ្លូវលេខ២៨៨ ស្ថិតក្នុងភូមិ១ សង្កាត់បឹងកេងកងទី២ ខណ្ឌបឹងកេងកង។
តាមប្រភពព័ត៌មានពីមន្ត្រីកងរាជអាវុធហត្ថម្នាក់បានប្រាប់ឲ្យដឹងថា បុរសជនជាតិស្បែកខ្មៅម្នាក់ ដែលបានព្យាយាមរត់គេចខ្លួនពីកន្លែងព្យាបាលជំងឺកូវីដ១៩ នៅមន្ទីររបេង និងត្រូវបានចាប់ខ្លួនបានវិញនោះ គឺមានឈ្មោះ គ្រីស្ទីនណូ សាន់តូស ភេទប្រុស អាយុ៣៣ឆ្នាំ ជាជនជាតិប្រេស៊ីល ។
មន្ត្រីកងរាជអាវុធហត្ថខាងលើបន្តថា មុនពេលកើតហេតុ កាលពីវេលាម៉ោង៣និង៤០នាទីរសៀល ថ្ងៃទី២០ ខែមិថុនា ឆ្នាំ២០២១ មានបុរសជនជាតិប្រេស៊ីលដែលជាអ្នកជំងឺកូវីដ១៩ ខាងលើនេះ បានលួចផ្លោះរបងរត់ចេញទៅខាងក្រៅ ទើបបង្កឱ្យមានការភ្ញាក់ផ្អើលកើតឡើង។ លុះដល់វេលាម៉ោង៤និង៣០ល្ងាច ថ្ងៃទី២០ ខែមិថុនា ទើបកម្លាំងកងរាជអាវុធហត្ថខណ្ឌចំការមន ជាម្ចាស់គោលដៅ បានសហការជាមួយនឹងកម្លាំងកងរាជអាវុធហត្ថខណ្ឌបឹងកេងកង និងកងរាជអាវុធហត្ថខណ្ឌ៧មករា បាននាំគ្នាដេញតាមចាប់ឃាត់ខ្លួនបានភ្លាមៗនៅម្តុំខាងមុខរោងកុនគិរីរម្យតែម្ដង។
គួរបញ្ជាក់ថា បុរសស្បែកខ្មៅ ជាជនជាតិប្រេស៊ីល មានវិជ្ជមានជំងឺកូវីដ១៩ខាងលើនេះ បានមកស្នាក់នៅព្យាបាលកូវីដ១៩ កាលពីថ្ងៃទី១៧ ខែមិថុនា ឆ្នាំ២០២១ កន្លងមក គឺបានរយៈពេល៣ថ្ងៃមកហើយៗ ស្រាប់តែរូបគេលួចផ្លោះរបងរត់ចេញទៅ ហើយក៏ត្រូវបានតាមចាប់មកវិញ រួចយកមកប្រគល់ឱ្យក្រុមគ្រូពេទ្យនៅមន្ទីរពេទ្យរបេងវិញផងដែរ។
ក្រោយពីកម្លាំងអាវុធហត្ថខណ្ឌបឹងកេងកង សហការជាមួយអាវុធហត្ថខណ្ឌចំការមន និងអាវុធហត្ថខណ្ឌ៧មករា បំពាក់ដោយអាវការពារជំងឺកូវីដ-១៩ និងសម្ភារៈគ្រឿងបំពាក់សម្រាប់អន្តរាគមន៍ ធ្វើការឃាត់ខ្លួន និងបង្ខំឲ្យបុរសជនជាតិស្បែកខ្មៅរូបនេះឡើងរថយន្ត ទៅកាន់ទីតាំងសម្រាកព្យាបាលជំងឺកូវីដ-១៩ វិញ បន្ទាប់ពីបុរសស្បែកខ្មៅរូបនេះ បានរត់ចេញពីមណ្ឌលសម្រាកព្យាបាលជំងឺកូវីដ-១៩ នៃមន្ទីរពេទ្យព្យាបាលរោគរបេង ស្ថិតនៅក្នុងសង្កាត់បឹងកេងកង២ ខណ្ឌបឹងកេងកង។
ពាក់ព័ន្ធនឹងករណីរត់គេចនេះដែរ បុរសជនជាតិស្បែកខ្មៅខាងលើ នឹងប្រឈមចំពោះមុខច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ផងដែរ។
ចែករំលែកព័តមាននេះ