កីឡាករកាយវប្បកម្ម៤រូប ត្រូវបានមន្ត្រីសហព័ន្ធ រំពឹងថាឈ្នះមេដាយជូនជាតិ
- ភ្នំពេញ
រាជធានីភ្នំពេញ ៖ ទោះបីកាលបរិច្ឆេទប្រកួតកីឡាស៊ីហ្គេម លើកទី៣១ នៅរដ្ឋធានីហាណូយ ប្រទេសវៀតណាម កំពុងមានភាព
រាជធានីភ្នំពេញ ៖ ទោះបីកាលបរិច្ឆេទប្រកួតកីឡាស៊ីហ្គេម លើកទី៣១ នៅរដ្ឋធានីហាណូយ ប្រទេសវៀតណាម កំពុងមានភាព
រាជធានីភ្នំពេញ ៖ ទោះបីកាលបរិច្ឆេទប្រកួតកីឡាស៊ីហ្គេម លើកទី៣១ នៅរដ្ឋធានីហាណូយ ប្រទេសវៀតណាម កំពុងមានភាពស្រពេចស្រពិលដោយសារតែចង់លើកពេលក្ដី ក៏ក្រុមកីឡាកាយវប្បកម្មជម្រើសជាតិកម្ពុជា នៅតែបន្ដខិតខំប្រឹងប្រែងជានិច្ច ដើម្បីពង្រឹងសមត្ថភាពត្រៀមចូលរួមព្រឹត្តិការណ៍ប្រចាំតំបន់មួយ។ មន្ត្រីសហព័ន្ធ ដែលសម្រេចបញ្ជូនកីឡាករ៤រូបអោយតំណាងកម្ពុជា ក៏ហាក់បង្ហាញភាពជឿជាក់សម្រាប់លទ្ធផលដណ្ដើមមេដាយផងដែរ។
លោក សុខ វណ្ណៈ បានឲ្យដឹងថា បច្ចុប្បន្នកីឡាករកាយវប្បកម្មជម្រើសជាតិកម្ពុជា ៤រូប រួមមានកីឡាករ កែវ សំណាង, កីឡាករ ទ្រីង ចាន់, កីឡាករ អ៊ុន បូរ៉ាត់ និង កីឡាករ អ៊ុត សុធា ដែលជាអតីតបុរសឯក កំពុងខិតខំប្រឹងប្រែងហ្វឹកហាត់យ៉ាងយកចិត្តទុកដាក់ ស្របពេលដែលអ្នកទាំង៤ ក៏សុទ្ធតែមានរាងកាយសមស្របតាមការចង់បានរបស់គណៈកម្មការកាយវប្បកម្មអន្តរជាតិ។
កីឡាករ២រូប លោកថា បានហ្វឹកហាត់នៅក្លិបផ្ទាល់ខ្លួន ហើយ២នាក់ទៀត គឺបានហ្វឹកហាត់នៅក្លិបផ្សារសំណង់១២ តែគ្មានអ្នកណាម្នាក់មិនខិតខំប្រឹងប្រែងនោះទេ បើទោះម្នាក់ៗមានរាងកាយត្រូវស្ដង់ដារទៅហើយ។ ក្នុងបរិបទកូវីដ-១៩ នេះ លោកថាកីឡាករទាំងអស់ មិនអាចប្រមូលផ្ដុំជុំគ្នាបាន តែកីឡាករម្នាក់ៗ បានខិតខំរៀងៗខ្លួន ហើយនៅរៀងរាល់ថ្ងៃអាទិត្យ កីឡាករទាំងអស់ តែងណាត់ជួបគ្នា ដើម្បីកែលម្អចំណុចខ្វះខាត ក៏ដូចជាពង្រឹងសមត្ថភាព និងបច្ចេកទេសបន្ថែម។ ការហ្វឹកហាត់របស់កីឡាករទាំង៤ គឺមានរយៈពេលជិត៣ខែហើយ ដោយសហព័ន្ធសង្កេតឃើញកីឡាករម្នាក់ៗ ពិតជាមានការខិតខំប្រឹងប្រែង ហើយកាយសម្បទា ក៏មានការរីកចម្រើនច្រើនពីមួយថ្ងៃទៅមួយថ្ងៃ។
សហព័ន្ធកំពុងបន្ដជំរុញយកចិត្តទុកដាក់ និងតាមដានការហ្វឹកហាត់របស់កីឡាករទាំងអស់ ដើម្បីធានា និងពង្រឹងនូវសមត្ថភាព បច្ចេកទេស ត្រៀមការប្រកួតកីឡាស៊ីហ្គេម ឆ្នាំ២០២១ នៅប្រទេសវៀតណាម ទោះបីព្រឹត្តិការណ៍នេះ អាចមានការប្រែប្រួលកាលបរិច្ឆេទប្រកួត ឬអត់ក៏ដោយ តែលោកថា កីឡាករទាំង៤ ពិតជាមានឱកាសខ្ពស់ដណ្ដើមបានមេដាយ។ កីឡាករ ទាំង៤ រួមមាន កែវ សំណាង, ទ្រីង ចាន់, អ៊ុន បូរ៉ាត់ និង អ៊ុត សុធា សុទ្ធតែមានមហិច្ឆតាខ្ពស់ ។ ក្ដីសង្ឃឹមនេះ គឺដោយសារតែកន្លងមកក្រុមកីឡាកាយវប្បកម្មធ្លាប់បានបញ្ជូនកីឡាករទៅ ហើយធ្លាប់បានឈ្នះមេដាយមាស ៥, ប្រាក់ ៣, និងសំរឹទ្ធ ២ ពីការប្រកួតជើងឯកអាស៊ីអាគ្នេយ៍ និងឈ្នះមេដាយមាស ២, ប្រាក់ ១ និងសំរឹទ្ធ ២ ពីការប្រកួតជើងឯកពិភពលោករួចមកហើយ៕
ចែករំលែកព័តមាននេះ