ខេត្តព្រៃវែង ៖ ផ្ទះបណ្តែតទឹកដែលមានបែត្រីពីក្រោមរបស់ជនជាតិវៀតណាមជាង១០០ដែលអាជ្ញាធររាជធានីភ្នំពេញ បានតម្រូវឱ្យរុះរើចេញពីក្នុងផ្ទៃទឹកទន្លេ កាលពីពេលថ្មីៗនេះ គឺពួកគេមិនព្រមតាមការតម្រូវឱ្យចិញ្ចឹមត្រីលើគោក បែរជាពួកគេសុខចិត្តចាកចេញបណ្តែតពីដងទន្លេក្នុងភូមិសាស្ត្ររាជធានីភ្នំពេញ ទៅតាមដងទន្លេមេគង្គក្រោម ដោយឆ្លងកាត់ស្រុកកៀនស្វាយ និងស្រុកលើកដែក…
ខេត្តព្រៃវែង ៖ ផ្ទះបណ្តែតទឹកដែលមានបែត្រីពីក្រោមរបស់ជនជាតិវៀតណាមជាង១០០ដែលអាជ្ញាធររាជធានីភ្នំពេញ បានតម្រូវឱ្យរុះរើចេញពីក្នុងផ្ទៃទឹកទន្លេ កាលពីពេលថ្មីៗនេះ គឺពួកគេមិនព្រមតាមការតម្រូវឱ្យចិញ្ចឹមត្រីលើគោក បែរជាពួកគេសុខចិត្តចាកចេញបណ្តែតពីដងទន្លេក្នុងភូមិសាស្ត្ររាជធានីភ្នំពេញ ទៅតាមដងទន្លេមេគង្គក្រោម ដោយឆ្លងកាត់ស្រុកកៀនស្វាយ និងស្រុកលើកដែក ខេត្តកណ្តាល ។ ដោយសារ ស្រុកទាំង២ មិនអនុញ្ញាតឱ្យផ្ទះបែត្រីចូលច្រាំងនោះ ពួកគេក៏បន្តអូសដោយម៉ាស៊ីនទូករៀងៗខ្លួនចុះទៅក្រោមទៀត ។ បានបណ្តែតត្រឹមកណ្តាលទន្លេមេគង្គក្រោម ដែលម្ខាងស្រុកពាមជរ ខេត្តព្រៃវែង និងម្ខាងទៀតស្រុកលើកដែក ខេត្តកណ្តាល ។
ក្រុមជនជាតិវៀតណាមដែលជាម្ចាស់បែត្រីទាំងនោះបានឱ្យដឹងថា ពួកគេបានបណ្តែតផ្ទះនិងបែត្រីចេញពីខណ្ឌច្បារអំពៅ តាមដងទន្លេមេគង្គ ចុះមកក្រោមអស់រយៈពេល៤ថ្ងៃ៤យប់ហើយ ដោយមានមនុស្សជាង១ពាន់នាក់ រួមទាំងកូននិងចៅហើយតាមផ្លូវគឺមានសមត្ថកិច្ចប៉ូលិស ជិះទូកតាមកៀងរហូតមិនឱ្យចូលច្រាំងទេ។ រហូតមកដល់កោះពាមរាំង ទើបសមត្ថកិច្ចទៅវិញអស់ ហើយពូកគេក៏ចូលចតច្រាំងបាន នៅចំណុចឃុំខ្ពបអាទាវ ស្រុកលើកដែក ក្នុងទឹកដីខេត្តកណ្តាល ។
ជនជាតិវៀតណាមទាំងនោះបានប្រាប់កោះសន្តិភាពបន្តទៀតថា ក្នុងចំណោមពួកគេទាំងអស់មានជាង១០០បែ មានអ្នកខ្លះចង់ចុះទៅប្រទេសវៀតណាមវិញ តែខ្លះទៀតមិនចង់ទៅវិញទេ ព្រោះនៅទីនោះគ្មានសាច់ញាតិ ហើយទៅដល់ក៏មិនដឹងមានការងាររកស៊ីដែរ ។ ហើយដែលសំខាន់ពេលនេះ គឺនៅព្រំដែនខាងភាគីវៀតណាម បានបិទមិនឱ្យពួកគាត់ឆ្លងដែនចូលក្នុងប្រទេសទេ ដូច្នេះពេលនេះ ពួកគាត់មានតែសំងំរង់ចាំឱ្យខាងសមាគមនិងទូតវៀតណាម ជួយរកដំណោះស្រាយឱ្យតែប៉ុណ្ណោះ ។
ដោយឡែក សមត្ថកិច្ចព្រំដែនច្រកទ្វារអន្តរជាតិកោះរកាវិញ បានឱ្យដឹងផងដែរថា នៅល្ងាចថ្ងៃទី១៤ មិថុនានេះ មានផ្ទះបែត្រីជនជាតិវៀតណាមមួយក្រុម ដែលមានទូកតូចៗចំនួន២៤ទូក និងមនុស្សក្មេងចាស់ប្រុសស្រីចំនួន៦៤នាក់ ស្មើនិង១៥គ្រួសារ បានចូលទៅដល់ក្បែរព្រំដែន ហើយបានចតទូកនៅទីនោះមិនព្រមចាកចេញទេ ទៅមុខមិនរួច ថយក្រោយមិនកើត ។ប្រភពដដែលនេះបានបន្តទៀតថា សមត្ថកិច្ចព្រំដែនច្រកកោះរកា បានព្យាយាមចូលទៅសួរនាំ និងលួងលោមឱ្យជនជាតិវៀតណាមទាំងនោះ បកត្រឡប់ក្រោយទៅចតរង់ចាំជាមួយក្រុមផ្ទះបែត្រីដទៃទៀត នៅចំណុចឃុំខ្ពបអាទាវ ក្នុងស្រុកលើកដែក ដើម្បីងាយស្រួលគ្រប់គ្រង ប៉ុន្តែពួកគេបានប្រកែក ដោយទាមទារឆ្លងព្រំដែន ចូលទៅប្រទេសវៀតណាមឱ្យខាងតែបាន ។ ពួកគេថា បើមិនព្រមឱ្យពួកគេចូលទៅទេនោះ ពួកគេសុខចិត្តស្លាប់នៅចំណុចព្រំដែននេះទាំងអស់គ្នា គឺមិនព្រមបកត្រឡប់ក្រោយឡើយ ។
ប្រភពពីមាត់ច្រកទ្វារព្រំដែនអន្តរជាតិកោះរកានោះ បានបញ្ជាក់ថា ដោយសារតែភាគីខាងវៀតណាមបិទព្រំដែន មិនព្រមទទួលយកជនជាតិរបស់ខ្លួន ចំណែកក្រុមបែត្រីជនជាតិវៀតណាមទាំង៦៤នាក់នេះ អះអាងដាច់ខាតថាត្រូវតែចូលទៅប្រទេសវៀតណាមវិញ ។ ពេលនេះភាគីខ្មែរបានប្រគល់សិទ្ធិឱ្យខាងសមាគមវៀតណាម នៅស្រុកពាមជរ ធ្វើការចរចាសម្របសម្រួលជាមួយភាគីប្រទេសវៀតណាម ដើម្បីរកដំណោះស្រាយហើយ។ ចំណែកជនជាតិវៀតណាមផ្សេងទៀត ដែលកំពុងចតបែរត្រីនៅក្នុងឃុំខ្ពបអាទាវ ក្នុងស្រុកលើកដែកគឺទុកឱ្យស្ថានទូតវៀតណាម ជាអ្នកដោះស្រាយ ។
មុននេះ តាមលិខិតរបស់សមាគមវៀតណាម គឺបានហាមពលរដ្ឋវៀតណាមដែលនៅតាមទូកឬផ្ទះបណ្តែតទឹកកុំទៅវៀតណាមអី ព្រោះខាងវៀតណាមគេមិនឱ្យចូលទៅទេ ខណៈទប់ស្កាត់ការឆ្លងកូវីដ១៩ ធ្វើឱ្យច្រកព្រំដែនរវាងប្រទេសទាំង២ត្រូវបានបិទបណ្តោះអាសន្ន ។ សារព័ត៌មានរដ្ឋវៀតណាមហៅនិគមវៀតណាមនៅកម្ពុជាថា ជនជាតិខ្មែរដើមកំណើតវៀតណាមសារព័ត៌មានរដ្ឋរបស់វៀតណាម កាលពីថ្ងៃទី១៣ មិថុនា បានផ្សាយថា ពលរដ្ឋខ្មែរ-វៀតណាម ដែលរស់នៅលើផ្ទៃទឹកទន្លេនៅកម្ពុជា គឺព្រមអនុវត្តតាមបទបញ្ជារបស់អាជ្ញាធរកម្ពុជា ។ អាជ្ញាធរកម្ពុជាដែលបានដាក់កំហិតឲ្យចាកចេញពីផ្ទៃទឹកឲ្យអស់ត្រឹមរយៈពេល៧ថ្ងៃ ដោយសារតែការរស់នៅបែបនេះរាប់សិបឆ្នាំមកនោះ បានបំពុលបរិស្ថានយ៉ាងធ្ងន់ធ្ងរ ។
នៅក្នុងអត្ថបទក្រោមចំណងជើងថា ជនជាតិខ្មែរ-វៀតណាម គោរពតាមសេចក្តីជូនដំណឹងស្តីពីការផ្លាស់ប្តូរទីលំនៅអណ្តែតទឹក ។ ទីភ្នាក់ងារសារព័ត៌មានរដ្ឋវៀតណាមVNA បានផ្សាយថា ប្រជាជនកម្ពុជាជិត១.០០០គ្រួសារ ដែលមានដើមកំណើតវៀតណាមបានធ្វើតាមសេចក្តីជូនដំណឹងរបស់អាជ្ញាធររាជធានីភ្នំពេញ កាលពីថ្ងៃទី២ ខែមិថុនា ស្តីពីការផ្លាស់ប្តូរទីតាំងផ្ទះអណ្តែតទឹក និងក្បូនចិញ្ចឹមត្រី តាមបណ្តោយទន្លេសាបក្នុងរយៈពេល៧ថ្ងៃ ។
បើតាមកាសែតផ្លូវការរបស់រដ្ឋវៀតណាមដដែលនេះថា ប្រជាជនខ្លួនដែលភាគច្រើនរកស៊ីចិញ្ចឹមជីវិតដោយការនេសាទ និងចិញ្ចឹមត្រី នៅក្នុងខណ្ឌច្បារអំពៅ និងខណ្ឌព្រែកព្នៅ ក្នុងចំណោមទីតាំងផ្សេងទៀត គឺពួកគេបានរុះរើផ្ទះក្បូនរបស់ពួកគេ ចាប់តាំងពីថ្ងៃទី១១ និងទី១២ ខែមិថុនា ដោយរង់ចាំទៅរស់នៅទីតាំងថ្មី ។យ៉ាងណាក៏ដោយ គេមិនទាន់ដឹងថា ប្រជាជនវៀតណាមទាំងនោះទៅរស់នៅទីណានៅឡើយ ខណៈអាជ្ញាធរខេត្តកណ្តាល ដែលនៅជាប់តាមដងទន្លេមេគង្គ និងទន្លេសាប បានដាក់ពង្រាយកម្លាំង តាមឃ្លាំមើលទូករបស់វៀតណាមទាំងនោះមិនឲ្យចូលចតនៅក្នុងភូមិសាស្ត្ររបស់ខ្លួនឡើយ ។
បើតាមទីភ្នាក់ងារសារព័ត៌មានវៀតណាមដដែល ពាក់ព័ន្ធនឹងបញ្ហានេះ គណៈកម្មាធិការកិច្ចការបរទេសនៃក្រសួងការបរទេសវៀតណាម បានពិភាក្សាជាមួយភាគីកម្ពុជា ដោយស្នើឲ្យកម្ពុជាបង្កើតលក្ខខណ្ឌអំណោយផល និងចាត់វិធានការគាំទ្រជាក់ស្តែងសម្រាប់ក្រុមនេះ ដើម្បីតាំងទីលំនៅថ្មី និងធានាផលប្រយោជន៍ស្របច្បាប់របស់ពួកគេ បែចិញ្ចឹមត្រីនិងផ្ទះទឹកបានបាត់ខ្លួនពីកន្លែងដើមទៅប្រមូលផ្តុំនៅព្រំប្រទល់ខណ្ឌព្រែកព្នៅការអនុវត្តវិធានការរុះរើផ្ទះទឹក បែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេនាប៉ុន្មានថ្ងៃនេះ ទទួលបាននូវការគាំទ្រពី មហាជន ខណៈដែលម្ចាស់ផ្ទះទឹកទាំងនេះបានរុះរើជាបន្តបន្ទាប់ដោយខ្លួនឯង និងមួយចំនួន ទៀតត្រូវបានអាជ្ញាធរជួយរុះចេញពីក្នុងទន្លេ ។
ចាប់តាំងពីថ្ងៃទី១២ ខែមិថុនា ឆ្នាំ២០២១ ដែលជាថ្ងៃអនុវត្តវិធានការរុះរើ រហូតមកដល់ថ្ងៃទី១៥ខែ មិថុនា គេសង្កេតឃើញផ្ទះទឹក បែចិញ្ចឹមត្រីទាំងនោះ បានបាត់ខ្លួនស្ទើរអស់ពីកន្លែងដើម និងនៅសល់តែមួយចំនួនតូចកំពុងបន្តរុះរើ ។ទន្ទឹមនឹងការរុះរើនោះ ស្រាប់តែគេឃើញបែត្រី
ផ្ទះទឹកទាំងនោះ ស្ថិតនៅត្រៀបត្រាពេញផ្ទៃទឹកនៅចំណុចព្រំប្រទល់ភូមិក្រួស សង្កាត់សំរោង ខណ្ឌព្រែកព្នៅ ដែលពីមុនមិនធ្លាប់មាននោះទេ ។
ទាក់ទិននឹងការប្រមូលផ្តុំនេះ ត្រូវបានអាជ្ញាធរមូលដ្ឋានឱ្យដឹងថា បែត្រីទាំងនោះសុទ្ធតែជាបែចិញ្ចឹមត្រីតូចៗ ហើយអាជ្ញាធរទុកពេលឱ្យមួយរយៈពេលសិន ។
តាមព័ត៌មានឱ្យដឹងថា នៅក្នុងផែនការរុះរើរយៈពេល៣ថ្ងៃនេះ គេឃើញអាជ្ញាធរបានប្រើកម្លាំងរាប់រយនាក់រុះរើ ហើយម្ចាស់ផ្ទះទឹក បែចិញ្ចឹមត្រី ផ្ទះតូចៗ និងសំណង់មិនរៀបរយលើផ្ទៃទឹក បានបង្ខំចិត្តរុះរើជាបន្តបន្ទាប់ និងមួយចំនួនដែលត្រីនៅតូចត្រូវបានអាជ្ញាធរឱ្យអូសចេញយកទៅប្រមូលផ្តុំគ្នានៅព្រំប្រទល់ស្រុកពញាឮខេត្តកណ្តាល ។ តាមព័ត៌មានឱ្យដឹងទៀតថា ការប្រើវិធានការរដ្ឋបាលនេះបានប្រព្រឹត្តទៅដោយរលូន ហើយ ម្ចាស់ផ្ទះទឹក បែចិញ្ចឹមត្រី និងផ្ទះតូចៗមិនរៀបរយទាំងនោះ បានបន្តរុះរើចេញជាបន្តបន្ទាបដែលរហូតមកដល់ថ្ងៃទី១៥ ខែមិថុនា ឆ្នាំ
២០២១ គេសង្កេតឃើញតាមដងទន្លេចាប់ពីស្ពានជ្រោយចង្វាហូតដល់ស្ពានព្រែកព្នៅ ទាំងផ្នែកខាងកើតក្នុងមូលដ្ឋានខណ្ឌជ្រោយចង្វា និងផ្នែកខាងលិចក្នុងមូលដ្ឋានខណ្ឌឫស្សីកែវ ផ្ទះទឹក បានបាត់មុខ សល់តែទូក បែ ក្បូនឫស្សី ធុងទឹកនិងដំបូល កំពុងតែរុះរើបណ្តើរៗ ។ ចំណែក ចាប់ពីស្ពានព្រែកព្នៅរហូតដល់វត្តក្រួស ក្នុងសង្កាត់ព្រែកព្នៅ និងសង្កាត់សំរោង ខណ្ឌព្រែកព្នៅ ផ្ទះទឹក ក៏បាននិងកំពុងរុះរើស្ទើរតែបាត់រូបរាងពីច្រាំងទន្លេដែរ ។
ដោយឡែក នៅខាងជើងវត្តក្រួស ក្នុងសង្កាត់សំរោង ខណ្ឌព្រែកព្នៅ ដែលពីមុខអត់មានផ្ទះទឹកបែរជាជាកន្លែងប្រមូលផ្តុំទៅដោយបែចិញ្ចឹមត្រី ផ្ទះទឹក ពេញផ្ទៃទន្លេទៅវិញ ។ តាមអាជ្ញាធរ ខណ្ឌព្រែកព្នៅ បានឱ្យដឹងថា ផ្ទះទឹកទាំងនោះសុទ្ធតែជាបែចិញ្ចឹមត្រីនៅតូច ដែលបានចល័តខ្លួនចេញពីខណ្ឌនានានៅក្នុងរាជធានីភ្នំពេញទៅតំបន់នោះតាមការណែនាំរបស់អាជ្ញាធរដែលបានទុកពេលឱ្យមួយរយៈ ។ ទោះបីជាយ៉ាងណា
តាមជំហររបស់រដ្ឋបាលរាជធានីភ្នំពេញ មិនលើកលែងដល់ម្ចាស់បែចិញ្ចឹមត្រីបន្តទៀតឡើយ ទោះបីម្ចាស់ទើបទម្លាក់កូនត្រីចូលបែក៏ដោយ ៕
ចែករំលែកព័តមាននេះ