បន្ទាយមានជ័យ៖ ជនសង្ស័យម្នាក់ សង្ស័យបែកថ្នាំ បានដេញកាប់ឪពុកបង្កើត តែឪពុករត់គេចផុត។ កូនតិរច្ឆាននោះ ក៏បានកាប់បំផ្លាញទ្រព្យសម្បត្តិ ក្នុងផ្ទះខ្ទេចខ្ទី។ ឪពុក បានប្តឹងប៉ូលិស ចាប់កូនតិរច្ឆាននោះ កាលពីម៉ោង ៨ និង៤៥នាទី ថ្ងៃទី១៣ ខែមិថុនា ឆ្នាំ២០២១ ស្ថិតភូមិថ្មី ឃុំ.ស្រុកម៉ាឡៃ។
លោកវរៈសេនីយ៍ឯក បេន សំអាត អធិការនគរបាលស្រុកម៉ាឡៃ បានប្រាប់ថា ជនសង្ស័យ ដែលត្រូវឃាត់ខ្លួន មានឈ្មោះ សោ សិដ្ឋ ភេទប្រុស អាយុ ២២ឆ្នាំ រស់នៅភូមិកើតហេតុខាងលើ។
លោកបានបញ្ជាក់ថា ក្រោយទទួលពាក្យបណ្តឹង ឈ្មោះ សាំង ពែក ភេទប្រុស អាយុ ៦៥ឆ្នាំ ត្រូវជាឪពុក បានប្តឹងជនសង្ស័យ ឈ្មោះ សោ សិដ្ឋ បានញៀនថ្នាំ រឺគ្រឿងញៀន ដល់កម្រិត បានយកកាំបិតខ្វែវ ដេញកាប់គាត់ជាឪពុក សំណាងណាស់ ដែលរត់គេចផុត ហើយជនសង្ស័យកាប់បំផ្លាញទ្រព្យសម្បត្តិក្នុងផ្ទះ ខូចខាតអស់ ទើបលោកប្តឹងសមត្ថកិច្ច ឃាត់ខ្លួន ហើយស្នើអោយចាត់ការតាមច្បាប់ ដោយលែងអាឡោះអាល័យទៀតហើយ។
លោកវរៈសេនីយ៍ឯក បេន សំអាត បានបញ្ជាក់ថា ក្រោយពេលឃាត់ខ្លួន ជនសង្ស័យ ដែលបានដេញកាប់ឪពុកបង្កើតខ្លួន និងកាប់បំផ្លាញទ្រព្យសម្បត្តិក្នុងផ្ទះហិនហោចអស់នោះ គឺជនសង្ស័យប្រើប្រាស់គ្រឿងញៀន ដែលញៀន ដល់កម្រិត គឺបែកថ្នាំ។ បុរសនោះ ត្រូវបានប៉ូលិស កសាងសំណុំរឿង បញ្ជូនទៅសាលាដំបូងខេត្តបន្ទាយមានជ័យ ចាត់ការតាមច្បាប់៕ ប៊ុន ធឿន
ចែករំលែកព័តមាននេះ