- ភ្នំពេញ
ភ្នំពេញ៖ ក្នុងពេលដែលវៀតណាម នៅបន្តឆ្លងរាតត្បាតជំងឺកូវីដ១៩ ពិសេសរកឃើញប្រភេទកូវីដបំប្លែងថ្មី ដែលឆ្លងឆាប់រហ័ស និងកាចសាហាវជាងមុន នៅពេលនេះ កម្ពុជាត្រូវតែទប់ស្កាត់ឲ្យបាននូវការនាំចូលជំងឺនេះ ពីខាងក្រៅ ព្រោះក្នុងប្រទេសយើង…
ភ្នំពេញ៖ ក្នុងពេលដែលវៀតណាម នៅបន្តឆ្លងរាតត្បាតជំងឺកូវីដ១៩ ពិសេសរកឃើញប្រភេទកូវីដបំប្លែងថ្មី ដែលឆ្លងឆាប់រហ័ស និងកាចសាហាវជាងមុន នៅពេលនេះ កម្ពុជាត្រូវតែទប់ស្កាត់ឲ្យបាននូវការនាំចូលជំងឺនេះ ពីខាងក្រៅ ព្រោះក្នុងប្រទេសយើង…
ភ្នំពេញ៖ ក្នុងពេលដែលវៀតណាម នៅបន្តឆ្លងរាតត្បាតជំងឺកូវីដ១៩ ពិសេសរកឃើញប្រភេទកូវីដបំប្លែងថ្មី ដែលឆ្លងឆាប់រហ័ស និងកាចសាហាវជាងមុន នៅពេលនេះ កម្ពុជាត្រូវតែទប់ស្កាត់ឲ្យបាននូវការនាំចូលជំងឺនេះ ពីខាងក្រៅ ព្រោះក្នុងប្រទេសយើង ពេលនេះ ក៏មិនទាន់កាត់ផ្តាច់បាននូវការឆ្លងរាលដាលក្នុងសហគមន៍ ដែលបានអូសបន្លាយ ចាប់តាំងពីថ្ងៃទី២០កុម្ភៈ។
កាលពីថ្ងៃអាទិត្យ វៀតណាមបានរាយការណ៍ករណីកូវីដ១៩ ចំនួន ៩៥នាក់។ រលកថ្មីនៃការឆ្លងបានផ្ទុះឡើង កាលពីថ្ងៃទី២៧ ខែមេសា ឆ្នាំ២០២១។ ចាប់តាំងពីពេលនោះមក វាបានឆ្លងដល់មនុស្ស ៧១៣៥នាក់ និងមិនបានស្ងប់ឡើយ ខណៈដែលវាមានការឆ្លងច្រើន ដោយគេគិតថា បណ្តាលមកពីមេរោគបំប្លែងថ្មី ដែលមានលក្ខណៈឆ្លងខ្លាំងជាងមុន។
ដើម្បីពង្រឹងវិធានការទប់ស្កាត់ការនាំចូលជំងឺកូវីដ១៩ ពីក្រៅប្រទេស ពិសេសប្រទេសវៀតណាម ចូលមកកម្ពុជា កាលពីពេលថ្មីៗនេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំដល់អភិបាលខេត្ត នៅជាប់ព្រំដែនវៀតណាម ត្រូវបង្កើនការត្រួតពិនិត្យការចេញ-ចូល នៅតាមច្រកព្រំដែន ដើម្បីទប់ស្កាត់ការឆ្លងរាលដាលជំងឺកូវីដ-១៩ និងការឆ្លងដែនខុសច្បាប់។
ជាមួយគ្នានោះ សម្តេចក្រឡាហោម ស ខេង ក៏បានណែនាំដល់អភិបាលខេត្តជាប់ព្រំដែនវៀតណាម ត្រូវតែរៀបចំកិច្ចប្រជុំដោយផ្ទាល់ ឬតាមប្រព័ន្ធវីដេអូជាមួយអាជ្ញាធរវៀតណាម ដើម្បីពិភាក្សា និងអនុវត្តវិធានការទប់ស្កាត់កូវីដ-១៩ ឆ្លងដែនរវាងប្រទេសជាប់ព្រំប្រទល់ទាំងពីរ។
ការធ្វើបែបនេះ គឺដើម្បីលើកកម្ពស់កិច្ចសហប្រតិបត្តិការរក្សាសន្តិសុខ សណ្ដាប់ធ្នាប់ និងសុវត្ថិភាពតាម តំបន់ព្រំដែន ហើយលើសពីនេះ គឺទប់ស្កាត់និងបង្រ្កាបបទល្មើសនាំមនុស្សឆ្លងដែនខុសច្បាប់ ក៏ដូចជាការទប់ស្កាត់ការឆ្លងរីករាលដាលជំងឺកូវីដ១៩ ឱ្យបានម៉ឺងម៉ាត់ និងមានប្រសិទ្ធភាព។ ចូរកុំភ្លេចថា កូវីដឆ្លងតាមមនុស្ស។ ដូច្នេះបើទប់ស្កាត់មនុស្សឆ្លងដែន ដោយខុសច្បាប់បាន មិនថា ខ្មែរ ឬវៀតណាម ឬក៏ជនជាតិណាណានោះទេ គឺមានន័យថា យើងអាចទប់ស្កាត់កូវីដ ចូលពីក្រៅប្រទេសបានដែរហើយ។
នៅជាប់ព្រំដែនវៀតណាម គឺកម្ពុជាមាន ៩ខេត្ត រួមមាន៖ ខេត្តរតនគិរី មណ្ឌលគិរី ក្រចេះ ត្បូងឃ្មុំ ព្រៃវែង ស្វាយរៀង កណ្ដាល តាកែវ និងខេត្តកំពត។ កន្លងមក មិនថា កម្ពុជាយើង ឬក៏វៀតណាមទេ គឺព្រួយបារម្ភអំពីការឆ្លងដែនខុសច្បាប់រវាងប្រជាជនទាំងពីរ ក្នុងបរិបទកូវីដ១៩។
បន្ថែមលើការណែនាំរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី១១ ខែមិថុនា ឆ្នាំ២០២១ រដ្ឋមន្ត្រីសុខាភិបាល លោក ម៉ម ប៊ុនហេង ក៏បានចេញលិខិត ក្រើនរម្លឹកបន្ថែមដល់អភិបាលារាជធានីខេត្ត ដើម្បីពង្រឹងការត្រួតពិនិត្យសុខភាពអ្នកដំណើរ ចូលមកកម្ពុជា ដោយការធ្វើតេស្តរហ័ស រកមេរោគកូវីដ១៩។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ក្នុងនាមជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ១៩ បានលើកឡើងថា ដើម្បីពង្រឹងការត្រួតពិនិត្យសុខភាពអ្នកដំណើរចូលមកកម្ពុជា តាមច្រកព្រំដែនទាំងផ្លូវអាកាស ផ្លូវគោក និងផ្លូវទឹក ត្រូវធ្វើតេស្តអង់ទីហ្សែនរហ័ស ឲ្យបានម៉ឺងម៉ាត់។ អ្នកជំងឺ ដែលមានវិជ្ជមានវីរុសកូវីដ១៩ ត្រូវបញ្ជូនទៅកាន់មន្ទីរពេទ្យ ដើម្បីព្យាបាល ចំណែកអ្នកដំណើរផ្សេងទៀត ដែលរួមដំណើរជាមួយ អ្នកវិជ្ជមានវីរុសកូវីដ១៩ ត្រូវបញ្ជូនទៅកាន់មណ្ឌលចត្តាឡីស័ក រយៈពេល ១៤ថ្ងៃ។
ក្នុងលិខិតដដែល លោករដ្ឋមន្ត្រីសុខាភិបាល ក៏បានលើកឡើងថា អភិបាលខេត្ត នៅតាមព្រំដែនថៃ និងវៀតណាម ត្រូវប្រជុំជាមួយសមភាគីថៃ ឬវៀតណាម ដើម្បីស្នើសុំកិច្ចសហការក្នុងការពង្រឹងការធ្វើតេស្តរកមេរោគកូវីដ១៩ ជូនដល់ពលករ និងប្រជាជនទូទៅ មុននឹងអនុញ្ញាតឲ្យឆ្លងដែនមកកម្ពុជាវិញ។
កន្លងមក មុនព្រឹត្តិការណ៍ឆ្លងសហគមន៍២០កុម្ភៈ គឺនៅព្រំដែនថៃ ទោះបីជាមានការលបលួចឆ្លងដែនខុសច្បាប់ ប៉ុន្តែអាជ្ញាធរសមត្ថកិច្ចកម្ពុជាយើង ចាត់ទុកថា បានចាត់វិធានការទប់ស្កាត់ករណីឆ្លងកូវីដ បានល្អប្រសើរ។ នោះគឺច្រកព្រំដែនផ្លូវការ អ្នកឆ្លងដែនចូលពីថៃ មកកាន់ទឹកដីកម្ពុជាយើង ត្រូវឆ្លងកាត់ការពិនិត្យសុខភាព និងយកសំណាក ទៅធ្វើតេស្តរកមេរោគកូវីដ១៩ ហើយអ្នកទាំងនោះ ត្រូវទៅធ្វើចត្តាឡីស័កយ៉ាងត្រឹមត្រូវ រយៈពេល ១៤ថ្ងៃ នៅមណ្ឌលចត្តាឡីស័ក ដែលបានរៀបចំនៅតាមបណ្តាខេត្តជាប់ព្រំដែនថៃទាំងនោះ។ បើរកឃើញវិជ្ជមានកូវីដ ត្រូវបញ្ជូនទៅមន្ទីរពេទ្យសម្រាកព្យាបាល ហើយអ្នកអវិជ្ជមាន ត្រូវបន្តធ្វើចត្តាឡីស័ក ឲ្យគ្រប់ ១៤ថ្ងៃ ហើយធ្វើតេស្តម្តងទៀត បើអវិជ្ជមាន ទើបអនុញ្ញាតឲ្យបន្តដំណើរទៅកាន់ស្រុកកំណើត។
វិធានការនៅតាមព្រំដែនថៃ ត្រូវបានរាជរដ្ឋាភិបាល ពិសេសអាជ្ញាធរខេត្តជាប់ព្រំដែនថៃ បានអនុវត្តយ៉ាងមានប្រសិទ្ធភាព ចាប់តាំងពីប្រទេសថៃ ផ្ទុះការឆ្លងរាលដាលជំងឺកូវីដ១៩ ខ្លាំងជាងកម្ពុជា កាលពីឆ្នាំមុន និងបន្តមកដល់ពេលនេះ។ ក្នុងនោះ ការទប់ស្កាត់ការលួចឆ្លងដែនខុសច្បាប់ ក៏ត្រូវបានរាជរដ្ឋាភិបាល បង្កើតច្បាប់ និងដាក់ទោសធ្ងន់ធ្ងរលើមេខ្យល់ ដែលនាំពលករលួចឆ្លងដែន ចេញចូលប្រទេសថៃ ហើយមកដល់ពេលនេះ ក៏មានមេខ្យល់មិនតិចរយនាក់ទេ ដែលត្រូវបានចាប់បញ្ជូនទៅតុលាការ កាត់ទោស។
នៅខាងព្រំដែនវៀតណាម ក៏ដូចគ្នា។ អាជ្ញាធរខេត្តជាប់ព្រំដែនវៀតណាម អាចយកលំនាំតាមអាជ្ញាធរខេត្តជាប់ព្រំដែនថៃ ក្នុងកិច្ចការងារទប់ស្កាត់កូវីដ១៩ ឆ្លងដែន។ តាមច្រកព្រំដែនផ្លូវការ ត្រូវពិនិត្យសុខភាព យកសំណាក ធ្វើតេស្ត និងនាំទៅធ្វើចត្តាឡីស័ក ១៤ថ្ងៃ។ ចំពោះអ្នកលបលួចឆ្លងដែនខុសច្បាប់ ចាប់បានត្រូវបញ្ជូនទៅធ្វើចត្តាឡីស័ក រីឯមេខ្យល់ ត្រូវបញ្ជូនទៅតុលាការ កាត់ទោសតាមច្បាប់ ដោយគ្មានការលើកលែង។
ទន្ទឹមនឹងវិធានការម៉ឹងម៉ាត់នេះ អាជ្ញាធរសមត្ថកិច្ចណា ដែលហ៊ានឃុបខិត ត្រូវរ៉ូវ បើកដៃឲ្យមានអ្នកឆ្លងដែនខុសច្បាប់ ជាថ្នូរនឹងលុយកាក់ គឺត្រូវចាប់ខ្លួន ដកស័ក្តិ ហើយបញ្ជូនទៅកាត់ទោសនៅតុលាការ។ នៅព្រំដែនថៃ អំឡុងពេលអនុវត្តវិធានការទប់ស្កាត់កូវីដឆ្លងដែន កាលពីខែកុម្ភៈ ឆ្នាំ២០២១ អធិការនគរបាលស្រុកកំរៀង ខេត្តបាត់ដំបង ជាប់ព្រំដែនប្រទេសថៃ ត្រូវបានដកតំណែង និងបញ្ជូនទៅកាត់ទោសនៅតុលាការ ពាក់ព័ន្ធករណីអនុញ្ញាតឲ្យកម្មករឆ្លងដែនខុសច្បាប់។
ខាងព្រំដែនវៀតណាម ក៏ត្រូវតែម៉ឹងម៉ាត់ដូចគ្នាដែរ។ អាជ្ញាធរសមត្ថកិច្ចណាមួយ ហ៊ានអនុញ្ញាតឲ្យមានការឆ្លងដែនខុសច្បាប់ ហើយសម្រួលមិនឲ្យធ្វើចត្តាឡីស័ក យកសំណាកពិនិត្យរកកូវីដ ជាដើម គឺត្រូវតែទទួលខុសត្រូវចំពោះមុខច្បាប់។ ការអនុញ្ញាតឲ្យមានអ្នកឆ្លងដែនខុសច្បាប់ ឬក៏ស្របច្បាប់ ដោយមិនឆ្លងកាត់ការធ្វើតេស្តយកសំណាក រកមេរោគកូវីដ និងមិនធ្វើចត្តាឡីស័ក គឺជាគ្រោះថ្នាក់ធ្ងន់ធ្ងរ នាំដល់ហានិភ័យនៃការឆ្លងរាលដាលជំងឺកូវីដ ខណៈដែលក្នុងផ្ទៃប្រទេសយើង ក៏នៅបន្តឆ្លងរាលដាលកូវីដក្នុងសហគមន៍ធ្ងន់ធ្ងរនៅឡើយ។
ប្រជាពលរដ្ឋ អ្នកឆ្លងដែនយើងទៀតសោត មិនថា នៅព្រំដែនខាងកើត ដែលមកពីវៀតណាម និងនៅព្រំដែនខាងលិច មកពីប្រទេសថៃទេ ក្នុងកាលៈទេសៈកូវីដពេលនេះ ត្រូវតែសហការជាមួយអាជ្ញាធរសមត្ថកិច្ច។ ជៀសវាងឆ្លងដែនខុសច្បាប់។ ផ្ទុយទៅវិញ ត្រូវចូលតាមច្រកព្រំដែនផ្លូវការ ហើយពិនិត្យសុខភាព យកសំណាក ធ្វើតេស្តរកកូវីដ និងធ្វើចត្តាឡីស័ក។ ការធ្វើដូច្នេះ មិនត្រឹមតែការពារខ្លួនឯង និងក្រុមគ្រួសារប៉ុណ្ណោះទេ តែក៏បានចូលរួមទប់ស្កាត់ការឆ្លងរាលដាលកូវីដ១៩ នៅក្នុងសង្គមជាតិយើងថែមទៀត៕
ចែករំលែកព័តមាននេះ