ក្លិប Aston Villa ត្រៀមដាក់សំណើ៨លានផោនទិញកីឡាករឆាលី អូស្ទីន ខ្សែប្រយុទ្ធ ក្លិបQPR ក្នុងអំឡុងពេលបើកទីផ្សារជុំទី២នៅឆ្នាំក្រោយ ។
១២ប្រកួតនៅប្រឺមីញេលីកអង់គ្លេសស្ថិតក្រោមការដឹកនាំរបស់លោករ៉េមី ហ្គាដ គ្រូបង្វឹកជនជាតិបារាំង ក្លិបAston Villa មាន៥ពិន្ទុដែលពេលនេះមានលេចឮដំណឹងថា ចាប់អារម្មណ៍លើកីឡាករឆាលី អូស្ទីន ខ្សែប្រយុទ្ធក្លិបQPR ក្នុងក្របខ័ណ្ឌបាល់ទាត់ឆេមពានស៊ីបអង់គ្លេស ។ កីឡាករឆាលី អូស្ទីន នឹងចប់កុងត្រាក្នុងដំណាច់រដូវកាលនេះ ហេតុដូច្នេះទើបមានឱកាសខ្ពស់ទៅលេងឱ្យក្លិបAston Villa ខណៈកាលពីឆ្នាំមុនខ្សែប្រយុទ្ធអាយុ២៦ឆ្នាំរូបនេះ លេងបានល្អឱ្យក្លិបQPR នៅប្រឺមីញេលីក អាចស៊ុតបញ្ចូលទីបាន១៨គ្រាប់ពីការប្រកួតចំនួន៣៥លើក ។
ក្លិបQPR ក៏ត្រូវត្រិះរិះឱ្យបានល្អក្នុងការបណ្ដោយឱ្យឆាលី អូស្ទីន ចាកចេញដែរ ព្រោះគេជាកម្លាំងសំខាន់ក្នុងការជួយក្លិបដែលអាចស៊ុតបាល់បញ្ចូលទីបាន៧គ្រាប់ពីការប្រកួតចំនួន១២លើក ស្ថិតនៅលំដាប់ទី១៣នៃឆេមពានស៊ីបមាន២០ពិន្ទុ ។
រីឯក្លិប Aston Villa កាលពីរដូវកាលមុនក៏បានលក់កីឡាករគ្រីស្ទៀន បេនតេហ្គេ ខ្សែប្រយុទ្ធក្រុមជម្រើសជាតិប៊ែលហ្ស៊ិកឱ្យ Liverpool ប៉ុន្តែខ្សែប្រយុទ្ធដែលទិញចូលវិញសុទ្ធសឹងជាកីឡាករស្ថិតក្នុងក្ដីអស់សង្ឃឹម ៕
ចែករំលែកព័តមាននេះ