កីឡាករប្រដាល់ទម្ងន់ធ្ងន់របស់អង់គ្លេសថៃសាន់ ហ្វឺរីបាននិយាយកាលពីពេលថ្មីៗនេះថា ខ្លួនគេអាចនឹងចូលនិវត្តន៍បន្ទាប់ពីការប្រកួតដណ្តើមខ្សែក្រវាត់ពិភពលោកពីកីឡាករអ៊ុយក្រែនវ្ល៉ាឌីមៀ ឃ្លីតស្កូ ចុងខែនេះ ។
ថ្លែងប្រាប់BBC Sport ហ្វឺរីបានបញ្ជាក់ថា៖«បន្ទាប់ពីការប្រកួតចុងខែនេះ ខ្ញុំមិនមានកិច្ចការសំខាន់ដែលត្រូវធ្វើឡើយ ហើយខ្ញុំនឹងចាប់យកផ្នែកថ្មីផ្សេងទៀតក្នុងជីវិត ។ ប្រសិនជាខ្ញុំមិនមានការជំរុញនិងលើកទឹកចិត្តបន្ថែមទៀត អញ្ចឹង តើគួរគិតធ្វើអ្វី?»។
សូមបញ្ជាក់ថា កីឡាករប្រដាល់មិនធ្លាប់ចាញ់វ័យ២៧ឆ្នាំរូបនេះនឹងឡើងសង្វៀនប្រកួតដណ្តើមខ្សែក្រវាត់ស្ថាប័ន WBA, IBF និង WBOពីវ្ល៉ាឌីមៀនៅថ្ងៃទី២៨ វិច្ឆិកា ខាងមុខនេះ។ ការប្រកួតនឹងរៀបចំនៅសង្វៀន Esprit Arenaក្រុង Düsseldorf ប្រទេសអាល្លឺម៉ង់ ។
ហ្វឺរី មានឯតទគ្គកម្មប្រកួត២៤លើកមិនធ្លាប់ចាញ់ម្តងណាឡើយ ។ អ្វីដែលគួរឱ្យចាប់អារម្មណ៍ ក្នុងចំនួនជ័យជម្នះនេះគឺមាន១៨លើកដែលគេផ្តួលដៃគូឱ្យសន្លប់ ។ នេះគឺជាចំណុចមួយដែលនាំឱ្យវ្ល៉ាឌីមៀព្រួយបារម្ភ ។
កាលពីសប្តាហ៍កន្លងទៅនេះ វ្ល៉ាឌីមៀបានអះអាងថា ខ្លួនពិតជាបារម្ភពេលជួបជាមួយថៃសាន់ ហ្វឺរី ។ គេនិយាយថា ហ្វឺរីជាគូប្រកួតទី១ដែលមិនងាយផ្តួលបានដោយស្រួលៗ ។ ដៃវែង ជើងវែង និងកម្ពស់២,០៦សង់ទីម៉ែត្រជាអំណោយផល និងប្រៀបឈ្នះ ។ នេះជាការអះអាងរបស់វ្ល៉ាឌីមៀ ។
ជាមួយនឹងឯតទគ្គកម្មប្រកួត៦៧លើក ឈ្នះ៦៤លើក ចាញ់៣លើក វាជាលើកទី១ហើយសម្រាប់វ្ល៉ាឌីមៀដែលពោលពាក្យសរសើរដៃគូមុនឡើងសង្វៀន ។ រយៈពេល១១ឆ្នាំមកនេះគឺគ្មានកីឡាករណាម្នាក់អាចយកឈ្នះរូបគេបាននៅឡើយទេ ៕
ចែករំលែកព័តមាននេះ