បុគ្គលពួកខ្លះក្នុងលោកនេះតែងចង់ស្រណុក សុខស្រួលកាយចិត្ត តែពួកគេខ្វះសេចក្ដីព្យាយាម លះសេចក្តីប្រឹងប្រែងចេញអស់ ពួកអ្នកទាំងនោះនឹងមិនអាចរួចអំពីសេចក្ដីទុក្ខ ជួបសុខស្រណុកស្រួលបានឡើយ ដែលលោកចាត់ថាជាមនុស្សទូលទុក្ខទៅមុខរហូត ។
សេចក្ដីព្យាយាមប្រឹងប្រែងគឺជាពរដ៏ប្រសើរសម្រាប់មនុស្សទាំងអស់ ព្រោះជាហេតុនាំសត្វលោកឲ្យរួចផុតទុក្ខលំបាកបាន ដូចដែលព្រះពុទ្ធជាម្ចាស់ ទ្រង់ត្រាស់សម្ដែងថា វិរិយេន ទុក្ខមច្ចេតិ ឆ្លងចាកសេចក្ដីទុក្ខបានដោយសេចក្ដីព្យាយាម ។
ការងារចិញ្ចឹមជីវិតខ្លះដូចជា ការងារដាំដុះ ការងាររាជការ ការងារតាមអង្គភាពស្ថាប័ននានា មើលពីក្រៅទៅហាក់បីដូចជាការងារសម្រាប់ផ្ទាល់ខ្លួនម្នាក់ៗប៉ុណ្ណោះ ប៉ុន្តែតាមពិតពិនិត្យឲ្យដិតដល់ទៅ គ្រប់ការងារចិញ្ចឹមជីវិតតាមផ្លូវសុចរិតទាំងអស់សុទ្ធតែប្រព្រឹត្តទៅជាប្រយោជន៍ដល់ខ្លួនឯងផង និងជាកិត្តិយសរបស់ប្រទេសជាតិទាំងមូលផង ព្រោះគេអាចដឹងថាប្រទេសមួយដែលរីកចម្រើនទៅបាន លុះណាកម្រិតជីវភាពរស់នៅរបស់ប្រជាជននោះមានលក្ខណៈសមរម្យ បរិបូណ៌ដោយគ្រឿងឧបភោគ បរិភោគ ។
សូមមនុស្សគ្រប់រូបមានការងាររបស់ខ្លួនជាទីពឹង សូមកុំពឹងដង្ហើមអ្នកដទៃដកចេញចូលឱ្យសោះ ត្រូវប្រឹងប្រែងនឹងការងារទាំងអស់គ្នា នោះជីវិតពិតជាមានសុភមង្គល ៕ សាន សារិន
ចែករំលែកព័តមាននេះ