ខេត្តកំពង់ឆ្នាំង ៖ រដ្ឋបាលសាលាខេត្តកំពង់ឆ្នាំង នៅព្រឹកថ្ងៃទី៥ ខែមិថុនា ឆ្នាំ២០២១ បានប្រកាសស្ដីពីការរកឃើញអ្នកឆ្លងកូវីដ ថ្មីចំនួន១៩ នាក់ថ្មីបន្ថែមទៀត ។
ក្នុងសេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំងបានប្រកាសស្ដីពីការរកឃើញអ្នកឆ្លងកូវីដថ្មីបន្ថែមទៀតចំនួន១៩នាក់ គិតពីថ្ងៃទី២ ដល់ថ្ងៃទី៤ ខែមិថុនា ដែលមានក្នុងនោះមាន នៅស្រុកបរិបូណ៌១នាក់ ស្រុកកំពង់ត្រឡាច៦នាក់ និងស្រុកសាមគ្គីមានជ័យ១២ នាក់ ។ អ្នកឆ្លងកូវីដទាំងនោះ ជាពលករមកពីប្រទេសថៃ និងជាកម្មកររោងចក្រ ។
បើគិតមកដល់ថ្ងៃទី៥ ខែមិថុនានេះ ខេត្តកំពង់ឆ្នាំង មានអ្នកឆ្លងជំងឺកូវីដសរុបចំនួន 287 នាក់ ស្រី 221 នាក់ ជាសះស្បើយ 82 នាក់ ស្រី 46 នាក់ ។
ជាមួយនឹងការប្រកាសនៃការរកឃើញអ្នកឆ្លងថ្មីនេះផងដែរ រដ្ឋបាលសាលាខេត្តកំពង់ឆ្នាំងក៏បានប្រកាសស្ដីពីការបើកឲ្យដំណើរការឡើងវិញនូវរោងចក្រ ហិរ៉ាយសិន អៅឌ័រ ដែលមានទីតាំងនៅភូមិផ្សារត្រាច ឃុំលង្វែក ស្រុកកំពង់ត្រឡាច ។
ក្នុងសេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំង ដដែលបានបញ្ជាក់ថា អនុញ្ញាតឱ្យរោងចក្រ ហិរ៉ាយសិន អៅឌ័រ ដំណើរការឡើងវិញ ដោយឲ្យកម្មករចូលធ្វើការចាប់ពីថ្ងៃទី៥ ខែមិថុនានេះតទៅ ។
គួររំឮកថា រោងចក្រ ហិរ៉ាយសិន អៅឌ័រ ដែលមានទីតាំងនៅភូមិផ្សាត្រាច ឃុំលង្វែក ស្រុកកំពង់ត្រឡាច ត្រូវបានបិទមិនអោយដំណើរការចាប់ពីថ្ងៃទី២២ ខែឧសភា បន្ទាប់ពេលរកឃើញកម្មករ មេការ និងថៅកែចិន ក្នុងរោងចក្រមានកូវីដជាង 100 នាក់ ៕
ចែករំលែកព័តមាននេះ