រាជធានីភ្នំពេញ ៖ កាលពីរសៀលថ្ងៃទី១៧ ធ្នូ ២០១០ ថវិកាអំណោយតាមរយៈកោះសន្តិភាពដែលបានទទួលពីសប្បុរសជនខ្មែរនៅរដ្ឋហាវ៉ៃ សហរដ្ឋអាមេរិក ត្រូវបាននាំយកទៅធ្វើការបែងចែកដល់អ្នករងរបួសលើស្ពានពេជ្រ ដែលកំពុងស្ថិតនៅក្នុងមន្ទីរពេទ្យនានាក្នុងរាជធានីភ្នំពេញមានមន្ទីរពេទ្យកាល់ម៉ែតចំនួន៣០នាក់ មន្ទីរពេទ្យព្រះកុសុមៈ៨នាក់ និងមន្ទីរពេទ្យមិត្តភាពខ្មែរ-សូវៀត១នាក់ ដោយម្នាក់ៗត្រូវបានបែងចែកស្មើៗគ្នាចំនួន៥២ដុល្លារ ។ ដោយឡែកនៅមន្ទីរពេទ្យកាល់ម៉ែត ក៏មានការចូលរួមពីលោកវរសេនីយ៍ទោសំ សឿន នាយករងការិយាល័យផែនការនាយកដ្ឋានប្រតិបត្តិការសន្តិភាពនៃក្រសួងការពារជាតិ លោកឡាំ ប្រុស និងតំណាងមន្ទីរពេទ្យកាល់ម៉ែត ។
លោកវរសេនីយ៍ទោសំ សឿន បានថ្លែងថា លោកបាននាំយកថវិកាចំនួន២.៤២៥ដុល្លារដែលជាការបរិច្ចាគរបស់បងប្អូនខ្មែរនៅរដ្ឋហាវ៉ៃជូនដល់អ្នករងគ្រោះក្នុងឧបទ្ទវហេតុលើស្ពានកោះពេជ្រតាមរយៈកោះសន្តិភាព ។ នេះគឺជាថវិកាដែលបងប្អូនប្រជាពលរដ្ឋនៅក្នុងសមាគមមិត្តភាពខ្មែរ-ហាវ៉ៃ និងសមាគមខ្មែរ-ហាវ៉ៃ ក្នុងរដ្ឋហាវ៉ៃ សហរដ្ឋអាមេរិក បានបរិច្ចាគរៀងៗខ្លួនតាមកំលាំងសទ្ធាជួយឧបត្ថម្ភដល់ប្រជាពលរដ្ឋរងគ្រោះក្នុងហេតុការណ៍លើស្ពានពេជ្រ ហើយនេះក៏ជាការចូលរួមរំលែកទុក្ខរបស់បងប្អូនប្រជាពលរដ្ឋរស់នៅរដ្ឋហាវ៉ៃដែលក្នុងនោះនៅក្នុងមន្ទីរពេទ្យកាល់ម៉ែតមានចំនួន៣០នាក់ ។ ជាមួយគ្នានេះ ក៏មានការផ្តល់ថវិកាអំណោយដូចគ្នានេះនៅមន្ទីរពេទ្យព្រះកុសុមៈផងដែរ មានចំនួន៨នាក់ និងមន្ទីរពេទ្យរុស្ស៊ី១នាក់។ អ្នករងគ្រោះម្នាក់ក្នុងចំណោមអ្នកទាំងនោះដែលបានទទួលថវិកាពីលោកសំ សឿន បាននិយាយទាំងអួលដើម.កថា គាត់មានសេចក្តីរីករាយជាពន់ពេក ខណៈពេលទទួលបានថវិកាពីបងប្អូនមីងមារស់នៅរដ្ឋហាវ៉ៃ សហរដ្ឋអាមេរិក តាមរយៈលោកវរសេនីយ៍ ។ នេះបង្ហាញឱ្យឃើញពីទឹកចិត្តចូលរួមជួយរំលែកទុក្ខដល់រូបគាត់ដែលជួបគ្រោះថ្នាក់ដោយការរត់ជាន់គ្នានៅលើស្ពានពេជ្របណ្តាលឱ្យរបួសជើងយ៉ាងធ្ងន់ធ្ងរ ។
សារព័ត៌មានកោះសន្តិភាពសូមបញ្ជាក់ថា ថវិកាដែលបានផ្តល់ជូនអ្នករងរបួសនេះដោយសារចំនួនមិនទៀងទាត់ ការបែងចែកសំរាប់៦៨នាក់ដែលរបួសស្ថិតក្នុងមន្ទីរពេទ្យបានធ្លាក់ចុះមកនៅត្រឹម៣៩នាក់ អាស្រ័យដោយពេលស្រង់ស្ថិតិហើយយកមកធ្វើការបែងចែក អ្នកដែលបានជាសះស្បើយក៏ចាកចេញផុត ទើបចំនួនថយចុះ ។ ចំពោះការបែងចែកថវិការួម២.៤២៥ដុល្លារត្រូវបានផ្តល់ដល់អ្នករងគ្រោះ៣៩នាក់×៥២ដុល្លារ=២.០២៨ដុល្លារ នៅសល់៣៩៧ដុល្លារ ។ ថវិកាដែលនៅសល់ពីការបែងចែកនេះ កោះសន្តិភាពនឹងធ្វើការបរិច្ចាគទៅដល់ជនក្រីក្រដែលកំពុងជួបការលំបាកទាំងអ្នកស្ថិតក្នុងមន្ទីរពេទ្យ ឬស្ថិតនៅតំបន់ណាមួយ។
កោះសន្តិភាព សូមជំនួសមុខឱ្យបងប្អូនរង គ្រោះក្នុងឧបទ្ទវហេតុលើស្ពានពេជ្រនៃមជ្ឈមណ្ឌលកោះពេជ្រ សូមថ្លែងអំណរគុណចំពោះបងប្អូនខ្មែរទាំងអស់ដែលបានធ្វើការបរិច្ចាគធនធានផ្ញើមកជួយអ្នករងគ្រោះ ។ នេះពិតជាបង្ហាញថា ឈាមជ័រជាខ្មែរ ទោះបីស្ថិតនៅដ៏សែនឆ្ងាយពីមាតុភូមិមែនតែក្តីមេត្តាករុណាពិតជាស្ថិតនៅជិតបង្កើយ និងសូមបួងសួងឱ្យអំពើល្អរបស់បងប្អូននេះទទួលបាននូវសេចក្តីសុខគ្រប់ប្រការ កុំបីឃ្លៀងឃ្លាតឡើយ ៕
ចែករំលែកព័តមាននេះ