ខេត្តតាកែវ ៖ រដ្ឋបាលស្រុកកោះអណ្តែត ខេត្តតាកែវ បានរកឃើញ និងបង្ហាញអត្តសញ្ញាណមន្ត្រីគយប្រចាំការនៅច្រកកំពង់អំពិលចំនួន២នាក់ រួមនឹងកម្មករគយម្នាក់បានឆ្លងជំងឺកូវីដ១៩ ។ នេះបើតាមការប្រកាសរបស់រដ្ឋបាលស្រុកកោះអណ្ដែត ផ្ញើជូនអភិបាលខេត្តតាកែវ…
ខេត្តតាកែវ ៖ រដ្ឋបាលស្រុកកោះអណ្តែត ខេត្តតាកែវ បានរកឃើញ និងបង្ហាញអត្តសញ្ញាណមន្ត្រីគយប្រចាំការនៅច្រកកំពង់អំពិលចំនួន២នាក់ រួមនឹងកម្មករគយម្នាក់បានឆ្លងជំងឺកូវីដ១៩ ។ នេះបើតាមការប្រកាសរបស់រដ្ឋបាលស្រុកកោះអណ្ដែត ផ្ញើជូនអភិបាលខេត្តតាកែវ ដែលសារព័ត៌មានកោះសន្តិភាពយើងទទួលបាន នៅថ្ងៃទី០៤ ខែមិថុនា ឆ្នាំ២០២១នេះ ។
រដ្ឋបាលស្រុកកោះអណ្តែត បានបានអោយដឹងថា «អ្នកវិជ្ជមានជំងឺកូវីដ១៩ ទាំង៣នាក់នេះបានជាប់ពាក់ព័ន្ធនឹងឈ្មោះ ឡាយ សុគន្ធ ភេទប្រុស ជាមន្ត្រីគយ នៅស្នាក់ការកំពង់អំពិល មានវិជ្ជមានកូវីដ១៩ ហើយនៅរសៀលថ្ងៃទី០៣ ខែមិថុនា ឆ្នាំ២០២១ នេះមន្ត្រីគយ និងអ្នកដែលមានការពាក់ព័ន្ធជាមួយអ្នកជំងឺខាងលើ បានមកយកសំណាកនៅមន្ទីរពេទ្យបង្អែកកោះអណ្តែត ជាលទ្ធផលរកឃើញវិជ្ជមានកូវីដ១៩ ចំនួន៣នាក់ ដែលមានឈ្មោះដូចខាងក្រោម ៖
ទី១៖ ឈ្មោះ ប្រាក់ ចន្ថា ភេទប្រុស អាយុ៤៨ឆ្នាំ ជាមន្ត្រីគយស្នាក់ការក្រសាំងឯម ទី២៖ ឈ្មោះ ឡេង ឡែន ភេទប្រុស អាយុ៤០ឆ្នាំ ជាកម្មករគយ ស្នាក់ការក្រសាំងឯម និងទី៣ ៖ ឈ្មោះ ស្រេង រតនា ភេទប្រុស អាយុ២៨ឆ្នាំ ជាមន្ត្រីគយស្នាក់ការកំពង់អំពិល» ។
ក្នុងលិខិតរបស់រដ្ឋបាលស្រុកបានញ្ជាក់ថា ឈ្មោះ ប្រាក់ ចន្ថា និង ឈ្មោះ ឡេង ឡែន តែងតែចេញចូលផឹកកាហ្វេនៅផ្ទះឈ្មោះ លី អឿន ក្បែរស្នាក់ការគយក្រសាំងឯម ឃុំរមេញ ។
ក្រុមការងារស្រុក ឃុំ បានបន្តស្រាវជ្រាវ រកអ្នកប៉ះពាល់ផ្ទាល់ និងប្រយោលជាលទ្ធផល ៖ អ្នកប៉ះពាល់ផ្ទាល់សរុបចំនួន ១៦នាក់ ស្រី២នាក់ ។ អ្នកប៉ះពាល់ប្រយោលសរុបចំនួន០៧នាក់ ស្រី១នាក់ និងបានហ៊ុមព័ទ្ធផ្ទះលក់កាហ្វេចំនួន១ខ្នង និងស្នាក់ការគយក្រសាំងឯម ចំនួន១កន្លែងផងដែរ ៕
ចែករំលែកព័តមាននេះ