- ភ្នំពេញ
ភ្នំពេញ៖ អាជ្ញាធររាជធានីភ្នំពេញ បានប្រកាសទុកពេល ១សប្តាហ៍ គិតចាប់ពីថ្ងៃទី២ ខែមិថុនា ឆ្នាំ២០២១ ដើម្បីឲ្យរុះរើ ឬចល័តបែចិញ្ចឹមត្រី ផ្ទះបណ្តែតទឹក…
ភ្នំពេញ៖ អាជ្ញាធររាជធានីភ្នំពេញ បានប្រកាសទុកពេល ១សប្តាហ៍ គិតចាប់ពីថ្ងៃទី២ ខែមិថុនា ឆ្នាំ២០២១ ដើម្បីឲ្យរុះរើ ឬចល័តបែចិញ្ចឹមត្រី ផ្ទះបណ្តែតទឹក ផ្ទះទូកតូចៗ និងសំណង់ មិនរៀបរយលើផ្ទៃទន្លេ ចេញពីភូមិសាស្ត្ររាជធានីភ្នំពេញ។ ប៉ុន្តែករណីនេះ បើសិនជាមិនអនុវត្តគោលនយោបាយ យកអ្នករស់នៅលើទឹក ឡើងមកលើគោក នោះអាចនឹងដូចករណីវែកចកដូច្នោះដែរ។
កាលពីថ្ងៃទី២ ខែមិថុនា ឆ្នាំ២០២១ រដ្ឋបាលរាជធានីភ្នំពេញ បានចេញសេចក្តីជូនដំណឹង ស្តីពី ការរុះរើ ឬចល័តបែចិញ្ចឹមត្រី ផ្ទះបណ្តែតទឹក ផ្ទះទូកតូចៗ និងសំណង់មិនរៀបរយលើផ្ទៃទន្លេ នៅភូមិសាស្ត្ររាជធានីភ្នំពេញ។
ក្នុងសេចក្តីជូនដំណឹង រដ្ឋបាលរាជធានីភ្នំពេញ លើកឡើងថា កន្លងមក មានជនឱកាសនិយមមួយចំនួន បានលប លួចធ្វើបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយនៅលើផ្ទៃទន្លេ ហើយកន្លែងខ្លះ បានប្រែក្លាយ ជាកន្លែងស្នាក់នៅដោយខុសច្បាប់យ៉ាងអាណាធិបតេយ្យ ដែលបង្កឲ្យបាត់បង់សណ្តាប់ធ្នាប់ ប៉ះពាល់ដល់ផ្លូវនាវាចរ ប៉ះពាល់ដល់ប្រព័ន្ធអេកូឡូហ្ស៊ី មានចរន្តទឹកហូរ គោករាក់ ពិសេសការប្រើប្រាស់ចំណី សម្រាប់ ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្លេ ធ្វើឲ្យខូចខាតយ៉ាងធ្ងន់ធ្ងរដល់ជីវៈចម្រុះក្នុងទឹក ខូចគុណភាពទឹក បំណុលបរិស្ថាន និងប៉ះពាល់ដល់សោភ័ណភាពរាជធានីភ្នំពេញ ព្រមទាំងប៉ះពាល់ដល់សុខភាពនៃប្រជាពលរដ្ឋ ដែលបានប្រើប្រាស់ទឹកមិនស្អាតផងដែរ។
ចំពោះមុខ ដើម្បីរក្សាបរិស្ថាន ជីវៈចម្រុះ គុណភាពទឹក និងលុបបំបាត់បាតុភាពអសកម្មខាងលើ រដ្ឋបាលរាជធានីភ្នំពេញ តម្រូវឲ្យម្ចាស់បែចិញ្ចឹមត្រី ផ្ទះបណ្តែតទឹក ម្ចាស់ផ្ទះតូចៗ និងម្ចាស់សំណង់មិនរៀបរយ នៅលើផ្ទៃទន្លេទាំង អស់ ត្រូវរុះរើ ឬចល័តចេញជាបន្ទាន់ ដោយទុករយៈពេល ១សប្តាហ៍ គិតចាប់ពីកាលបរិច្ឆេទចេញ សេចក្តីជូន ដំណឹងនេះតទៅ។ ផុតរយៈពេលនេះ រដ្ឋបាលរាជធានីភ្នំពេញ នឹងចាត់វិធានការរដ្ឋបាល ដោយពុំទទួល ខុសត្រូវរាល់ ការខូចខាត ឬការបាត់បង់ណាមួយឡើយ ហើយក្នុងករណីរឹងរូស អាជ្ញាធរមូលដ្ឋាន និងមន្ត្រីជំនាញ នឹងកសាងសំណុំរឿង បញ្ជូនទៅតុលាការ តាមផ្លូវច្បាប់។
ទន្ទឹមនឹងនេះ រដ្ឋបាលរាជធានីភ្នំពេញ ស្នើបងប្អូនប្រជាពលរដ្ឋ ប្តូរទម្លាប់ពីការចិញ្ចឹមត្រី តាមបែលើផ្ទៃទន្លេ នៅភូមិសាស្ត្ររាជធានីភ្នំពេញ មកចិញ្ចឹមត្រីតាមស្រះវិញ។
គេនៅចាំបានថា កាលពីប៉ុន្មានឆ្នាំមុន ខេត្តកំពង់ឆ្នាំង បានអនុវត្តវិធានការសម្អាតបឹងទន្លេសាប ដោយការរុះរើ និងផ្លាស់ទីលំនៅរបស់អ្នករស់នៅលើទឹក ឲ្យអស់។ ភាគច្រើន អ្នកទាំងនោះ ជាជនជាតិវៀតណាម ដែលនិយមរស់នៅលើទូក និងលើផ្ទះបណ្តែតទឹក។
រដ្ឋបាលខេត្តកំពង់ឆ្នាំង បានរៀបចំដីមួយកន្លែង សម្រាប់ក្រុមអ្នករស់នៅលើទឹក ផ្លាស់ប្តូរទីលំនៅ ពីក្នុងទឹក មកនៅលើគោកវិញ។ យ៉ាងណាក៏ដោយ មកដល់ពេលនេះ នៅខេត្តកំពង់ឆ្នាំង បានរៀបចំអ្នករស់នៅលើទឹកបានច្រើនគ្រួសារ ឲ្យឡើងមករស់នៅលើគោក។ ប៉ុន្តែមិនទាន់សម្រេចបានទាំងស្រុងនូវគម្រោងផ្លាស់ប្តូរអ្នករស់នៅលើទឹកបឹងទន្លេសាប ក្នុងភូមិសាស្ត្រខេត្តកំពង់ឆ្នាំង ឲ្យមករស់នៅលើគោកនៅឡើយទេ មកដល់ពេលនេះ។
ករណីនៅភ្នំពេញ បើគ្រាន់តែរុះរើ ឬចល័តបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយ នៅលើផ្ទៃទន្លេ ឲ្យផុតៗពីទឹកដីភូមិសាស្ត្ររាជធានីភ្នំពេញ នាពេលនេះ ក៏ចេះតែធ្វើបានហើយ។ តែមិនបានជារៀងរហូតឡើយ។
ជាដំណោះស្រាយល្អប្រសើរ អាជ្ញាធររាជធានីភ្នំពេញ និងអាជ្ញាធរខេត្តជាប់ដងទន្លេទាំងអស់ ដែលមានក្រុមអ្នករស់នៅលើទូក ឬផ្ទះបណ្តែតទឹក ត្រូវអនុវត្តវិធានការរួមគ្នា។ លុបបំបាត់សំណង់មិនរៀបរយ បែចិញ្ចឹមត្រី និងផ្ទះបណ្តែតទឹក តាមរយៈការរៀបចំដីកន្លែងសមរម្យណាមួយ ឲ្យពួកគាត់រស់នៅ ហើយរកវិធីប្តូរមុខរបរពីការចិញ្ចឹមត្រីក្នុងទន្លេ ឬក៏នេសាទត្រី ជាដើម មកជាការចិញ្ចឹមត្រីក្នុងស្រះ ឬអាងលើគោក និងរកមុខរបរផ្សេងទៀត ក្រៅពីនេសាទ។
បើជាជនអន្តោប្រវេសន៍វៀតណាម ដែលរស់នៅលើទឹក គួរតែរៀបចំត្រួតពិនិត្យឲ្យបានត្រឹមត្រូវតាមនីតិវិធីច្បាប់។ បើអ្នកទាំងនោះ រស់នៅខុសច្បាប់ ត្រូវបញ្ជូនទៅប្រទេសវៀតណាមវិញ ហើយបើជាជនអន្តោប្រវេសន៍ស្របច្បាប់ ក៏ត្រូវរៀបចំឲ្យរស់នៅលើគោក តាមច្បាប់ ដែលបានកំណត់។
អ្នករស់នៅលើទឹក ក្នុងផ្ទះបណ្តែតទឹក ឬក៏លើទូកទាំងនោះ ក៏គួរតែគិតពីគ្រោះថ្នាក់កូនចៅតូចៗ ដែលមានហានិភ័យ និងប្រឈមនឹងគ្រោះថ្នាក់ដល់ជីវិតខ្លាំងណាស់ បើសិនជាធ្វេសប្រហែស ឬក៏ជួបឧបទ្ទវហេតុ ដូចជា លិចទូក ឬក៏លង់ទឹក ឬឆេះផ្ទះនោះ ជាដើម។
យ៉ាងណាក៏ដោយ ករណីនេះ ទាមទារឲ្យអាជ្ញាធរសមត្ថកិច្ចយើង មានឆន្ទៈពិតប្រាកដក្នុងការអនុវត្ត ហើយរៀបចំគោលនយោបាយច្បាស់លាស់ ដោយមិនត្រឹមរុញឲ្យផុតៗតែពីដែនសមត្ថកិច្ចរបស់ខ្លួននោះទេ គឺអាជ្ញាធររាជធានីភ្នំពេញ រួមទាំងអាជ្ញាធរខេត្តជាប់ដងទន្លេទាំងអស់ ត្រូវស្រង់អ្នកទាំងនោះ ឡើងគោកតែម្តង។ វិធានការម៉ឹងម៉ាត់ ក៏ត្រូវតែអនុវត្ត ត្រួតពិនិត្យ និងហាមឃាត់មិនឲ្យមានអ្នកទៅធ្វើផ្ទះបណ្តែតទឹក ដើម្បីរស់នៅបន្តទៀត ហើយការចិញ្ចឹមត្រី តាមបែក្នុងទន្លេ ក៏ត្រូវហាមឃាត់។ ករណីនេះ អាជ្ញាធរមូលដ្ឋាន ដើរតួសំខាន់ លើការគ្រប់គ្រង ត្រួតពិនិត្យ និងអនុវត្ត។
មកដល់សម័យនេះទៅហើយ មិនមានជនណាម្នាក់ អាចធ្វើអ្វីទៅកើត បើសិនជាអាជ្ញាធរសមត្ថកិច្ចនៅមូលដ្ឋាន ឬនៅថ្នាក់លើៗ មិនអនុញ្ញាតនោះឡើយ។ ខ្លាចតែមានការត្រូវរ៉ូវគ្នារវាងអ្នករស់នៅលើទឹក និងអាជ្ញាធរសមត្ថកិច្ច ទើបអាចបន្តរស់នៅលើទឹក ដែលបង្កផលប៉ះពាល់បរិស្ថាន ទន្លេ និងប្រឈមគ្រោះថ្នាក់តទៅទៀត។
ការរស់នៅលើទឹកនេះទៀតសោត យូរៗទៅ ដូចនៅតាមដងទន្លេសាប ក្នុងខេត្តកំពង់ឆ្នាំង គឺស្ទើរតែមិនមានផ្លូវទឹក សម្រាប់ទូកកាណូតចរាចរណ៍បាន។ ដូច្នេះពេលនេះ នៅពេលភ្នំពេញ ចាប់ផ្តើមអនុវត្តវិធានការសម្អាតទន្លេ គឺនៅខេត្តកណ្តាល រួមទាំងបណ្តាខេត្តជាប់ទន្លេផ្សេងទៀត ក៏គួរតែអនុវត្តព្រមៗគ្នា ដើម្បីរំដោះទន្លេយើងមកវិញ៕
ចែករំលែកព័តមាននេះ