- ភ្នំពេញ
ភ្នំពេញ៖ មេដឹកនាំបក្សប្រឆាំងនៅកម្ពុជា សព្វថ្ងៃ គឺលោក កឹម សុខា ដែលកំពុងរស់នៅកម្ពុជា ហើយស្ថិតនៅក្រោមការត្រួតពិនិត្យរបស់តុលាការ ដោយសារតែជាប់រឿងក្តីនៅតុលាការ។ ក្នុងក្រសែភ្នែកអាមេរិក…
ភ្នំពេញ៖ មេដឹកនាំបក្សប្រឆាំងនៅកម្ពុជា សព្វថ្ងៃ គឺលោក កឹម សុខា ដែលកំពុងរស់នៅកម្ពុជា ហើយស្ថិតនៅក្រោមការត្រួតពិនិត្យរបស់តុលាការ ដោយសារតែជាប់រឿងក្តីនៅតុលាការ។ ក្នុងក្រសែភ្នែកអាមេរិក…
ភ្នំពេញ៖ មេដឹកនាំបក្សប្រឆាំងនៅកម្ពុជា សព្វថ្ងៃ គឺលោក កឹម សុខា ដែលកំពុងរស់នៅកម្ពុជា ហើយស្ថិតនៅក្រោមការត្រួតពិនិត្យរបស់តុលាការ ដោយសារតែជាប់រឿងក្តីនៅតុលាការ។ ក្នុងក្រសែភ្នែកអាមេរិក ក៏មើលឃើញថា លោក កឹម សុខា ជាមេដឹកនាំគណបក្សប្រឆាំង នៅកម្ពុជាផងដែរ។
ក្នុងពេលទស្សនកិច្ច នៅកម្ពុជា កាលពីថ្ងៃទី១ ខែមិថុនា ឆ្នាំ២០២១ ក្រៅពីជួបពិភាក្សាការងារជាមួយសម្តេចតេជោ នាយករដ្ឋមន្ត្រី ហ៊ុន សែន លោកស្រីអនុរដ្ឋមន្រ្តីការបរទេស Wendy Sherman បានជួបជាមួយតំណាងនៃសង្គមស៊ីវិល ព្រមទាំងថ្នាក់ដឹកនាំនៃគណបក្សសង្គ្រោះជាតិកម្ពុជា គឺលោក កឹម សុខា ដើម្បីពិភាក្សាលើបញ្ហានានា ដែលមានសារៈសំខាន់រួមជាមួយសហរដ្ឋអាមេរិក ដែលរួមមាន ការធានាឲ្យប្រទេសកម្ពុជា មានអនាគតមួយ ដែលមានសន្តិភាព វិបុលភាព អធិបតេយ្យភាព និងលទ្ធិប្រជាធិបតេយ្យ។ នេះបើតាមប្រកាសរបស់ក្រសួងការបរទេសអាមេរិក។
សេចក្តីប្រកាសរបស់ក្រសួងការបរទេសអាមេរិក លើកឡើងថា ក្នុងជំនួបជាមួយសម្តេចតេជោនាយករដ្ឋមន្ត្រី ហ៊ុន សែន កាលពីរសៀលថ្ងៃទី១ ខែមិថុនា លោកស្រីអនុរដ្ឋមន្រ្តី Sherman បានថ្លែងសង្កត់ធ្ងន់លើសារៈសំខាន់នៃសិទ្ធិមនុស្ស និងការការពារសេរីភាពជាមូលដ្ឋាន ដែលមានសារៈសំខាន់ចាំបាច់ សម្រាប់ទំនាក់ទំនងទ្វេភាគីរបស់យើង។
លោកស្រីបានសុំឲ្យរដ្ឋាភិបាលកម្ពុជា គោរពតាមការប្តេជ្ញាចិត្តរបស់ខ្លួនផ្នែកសិទ្ធិមនុស្ស ជាអន្តរជាតិ និងនៅក្នុងប្រទេស ដោយរួមទាំងការប្តេជ្ញាចិត្ត ដែលមានចែងនៅក្នុងរដ្ឋធម្មនុញ្ញរបស់ប្រទេសកម្ពុជា ហើយបានសុំឲ្យមានការធានា ចំពោះការពារសិទ្ធិកម្មករ។
លោកស្រី បានអំពាវនាវឲ្យអាជ្ញាធរទម្លាក់ចោលជាបន្ទាន់នូវការចោទប្រកាន់ ដែលមានហេតុផលនយោបាយ ប្រឆាំងនឹងសមាជិកនៃគណបក្សប្រឆាំង អ្នកសារព័ត៌មាន និងសកម្មជននានា។
លោកស្រីអនុរដ្ឋមន្រ្តី Sherman បានទទូចឲ្យរដ្ឋាភិបាលបើកឡើងវិញ នូវលំហនយោបាយ និងលំហសម្រាប់ពលរដ្ឋធ្វើសកម្មភាព នៅមុនការបោះឆ្នោតឃុំសង្កាត់ នៅឆ្នាំ២០២២ និងការបោះឆ្នោតជាតិ ឆ្នាំ២០២៣។
យ៉ាងណាក៏ដោយ នៅថ្ងៃទី២ ខែមិថុនា ពោលគឺ១ថ្ងៃក្រោយដំណើរទស្សនកិច្ចរយៈពេលខ្លីរបស់លោកស្រីអនុរដ្ឋមន្ត្រីការបរទេសអាមេរិក នៅកម្ពុជា គឺរូបថតរបស់លោកស្រីអនុរដ្ឋមន្ត្រី Sherman ដែលបានជួបលោក កឹម សុខា រួមទាំងរូបថតលោកស្រី Sherman ជួបសម្តេចតេជោ ហ៊ុន សែន ត្រូវបានគេបង្ហោះផ្សាយតាមហ្វេសប៊ុក អមដោយសារនយោបាយយ៉ាងច្រើន។ អ្នកចែកចាយ និងបង្ហោះរូបថតទាំងនេះ ជាក្រុមអ្នកគាំទ្រលោកកឹមសុខា។
អ្នកកឹមសុខានិយម លើកឡើងថា ផ្លូវប្រសព្វ នឹងជិតមកដល់ ក្នុងដំណោះស្រាយវិបត្តិនយោបាយនៅកម្ពុជា។ នេះក៏ដោយសារតែគេសំអាងលើខ្លឹមសារជំនួបរវាងលោកស្រីអនុរដ្ឋមន្ត្រីការបរទេសអាមេរិក និងលោក កឹម សុខា កាលពីថ្ងៃទី១មិថុនា។
ជំនួបរវាងលោកស្រីអនុរដ្ឋមន្ត្រីការបរទេសអាមេរិក និងលោកកឹមសុខា ត្រូវបានគេចាត់ទុកថា លោក កឹម សុខា ជាមេដឹកនាំគណបក្សសង្គ្រោះជាតិ។ លោក កឹម សុខា ក៏ជាតំណាងប្រជាពលរដ្ឋខ្មែរ ប្រមាណកន្លះប្រទេស និងជាតំណាងសំឡេងប្រជាធិបតេយ្យពិត ដែលជាមេដឹកនាំគណបក្សប្រឆាំងដ៏ធំនៅកម្ពុជា។
ក្រុមអ្នកគាំទ្រលោកកឹមសុខា លើកឡើងបន្តថា សូម្បីតែអ្នកការទូតនៃប្រទេសផ្សេងៗទៀត ក៏គេចាប់អារម្មណ៍នឹងជំនួបនេះដែរ ព្រោះក្នុងសេចក្តីប្រកាសព័ត៌មាន មិនបានសរសេរលម្អិតលទ្ធផលនៃជំនួបរវាងលោកកឹមសុខា និងលោកស្រីអនុរដ្ឋមន្ត្រីអាមេរិកនោះទេ។ ដូច្នេះហើយប្រហែលជាទូតនានា អាចនឹងសុំជួបលោក កឹម សុខា ដើម្បីចង់ដឹងបន្ថែមទៀត។
ក្រុមអ្នកគាំទ្រលោកកឹមសុខា ក៏បានលើកឡើងថា ពលរដ្ឋខ្មែរទូទៅ ទាំងអ្នកគាំទ្រគណបក្សប្រជាជនកម្ពុជា ទាំងអ្នកគាំទ្រគណបក្សសង្គ្រោះជាតិ សាទរសោមនស្សរីករាយ នៅពេលឃើញលោកស្រីអនុរដ្ឋមន្ត្រីការបរទេសសហរដ្ឋអាមេរិក មានវត្តមាននៅកម្ពុជាបែបនេះ ព្រោះបើស្ថានភាពនយោបាយ ត្រូវបានដោះស្រាយ ស្ថានភាពជីវភាពសេដ្ឋកិច្ចគ្រួសាររបស់ពលរដ្ឋខ្មែរ កាន់តែល្អប្រសើរ លែងព្រួយបារម្ភ។
ក្រុមអ្នកគាំទ្រលោកកឹមសុខា ក៏ឆ្លៀតសូកសៀតថា ក្នុងទិដ្ឋភាពវត្តមានលោកស្រីអនុរដ្ឋមន្ត្រីការបរទេសសហរដ្ឋអាមេរិក នៅកម្ពុជាបែបនេះ អ្នកដែលមិនសប្បាយចិត្តខ្លាំង គឺមានតែអ្នកដែលដើរចេញពីគណបក្សសង្គ្រោះជាតិ ទៅបង្កើតគណបក្សថ្មី រួមទាំងក្រុមលោកសមរង្ស៊ី ព្រោះពួកគេ នឹងអស់ផ្លូវដើរ ហើយថែមទាំងអស់សង្ឃឹមនូវអ្វី ដែលពួកគេយល់ថា «ការបោះឆ្នោតខាងមុខ ឆ្នាំ២០២២ និងឆ្នាំ២០២៣ គេនឹងឱ្យពួកខ្លួន៣-៤កៅអី គ្រាន់បានតំណែង និងប្រាក់ខែនៅរដ្ឋសភា ឬជាសមាជិកនៃឧត្តមក្រុមប្រឹក្សាជាន់ខ្ពស់នោះ។
ចំណែកលោកស្រី Wendy R. Sherman អនុរដ្ឋមន្ត្រីការបរទេសហរដ្ឋអាមេរិច បានបង្ហោះសារតាម Twitter ផ្លូវការផ្ទាល់ខ្លួន ស្តីអំពីជំនួបរវាងលោកស្រី និងលោក កឹម សុខា។ លោកស្រី សរសេរថា លោកស្រីបានជួបជាមួយលោក កឹម សុខា ពិភាក្សាអំពីបញ្ហា ដែលមានសារៈសំខាន់ រួមទាំងការធានាសន្តិភាព វិបុលភាព អធិបតេយ្យភាព និងអនាគតប្រជាធិបតេយ្យ សម្រាប់ប្រទេសកម្ពុជា។ សហរដ្ឋអាមេរិក គាំទ្រប្រជាជនកម្ពុជា សេចក្តីប្រាថ្នារបស់ពួកគេ ចំពោះលទ្ធិប្រជាធិបតេយ្យ និងសិទ្ធិ ក្នុងការអនុវត្តសិទ្ធិសេរីភាពជាមូលដ្ឋានរបស់ពួកគេ។
យ៉ាងណាក៏ដោយ ជំនួបរវាងលោកស្រីអនុរដ្ឋមន្ត្រីការបរទេសអាមេរិក និងលោកកឹមសុខា ក៏បង្ហាញថា ប៉ូលបក្សប្រឆាំងនៅកម្ពុជា មិនមែនជាលោកសមរង្ស៊ីទៀតនោះទេ។ លោកសមរង្ស៊ី និងបក្ខពួក ដែលកំពុងស្ថិតនៅក្រៅប្រទេស មានសេរីភាពដើរហើរ គឺអាមេរិក មិនបានស្កាត់ទៅជួប ឬក៏អនុញ្ញាតឲ្យចូលជួប ក្នុងនាមជាតំណាងបក្សប្រឆាំងនៅកម្ពុជានោះឡើយ។
គេនៅចាំបានថា អំឡុងពេលលោកកឹមសុខា ក្នុងនាមជាប្រធានអង្គការសិទ្ធិមនុស្ស បានជាប់ឃុំឃាំង កាលពីចុងឆ្នាំ២០០៤ និងដើមឆ្នាំ២០០៥ គឺមន្ត្រីជាន់ខ្ពស់សហរដ្ឋអាមេរិកនេះហើយ ដែលបានមកជួបសម្តេចតេជោ នាយករដ្ឋមន្ត្រី ហ៊ុន សែន នៅភ្នំពេញ ហើយក្រោយមក លោកកឹមសុខា ក៏ត្រូវបានដោះលែង ចេញពីពន្ធនាគារព្រៃស។
ក៏ប៉ុន្តែនៅលើកនេះ លោកកឹមសុខា មិនស្ថិតនៅក្នុងពន្ធនាគារទៀតនោះទេ។ តែលោកកឹមសុខា នៅជាប់បណ្តឹងនៅតុលាការ និងជាប់បម្រាម មិនអាចធ្វើនយោបាយបានឡើយ។ ករណីនេះ គេនៅរង់ចាំពេលវេលាបន្តិចទៀត ទើបអាចដឹងពីវាសនានយោបាយរបស់លោក កឹម សុខា ខណៈដែលការបោះឆ្នោតឃុំសង្កាត់ នឹងធ្វើឡើងនៅខែមិថុនា ឆ្នាំ២០២២ និងការបោះឆ្នោតជាតិ នឹងធ្វើឡើងនៅខែកក្កដា ឆ្នាំ២០២៣។ ម្យ៉ាងទៀត ពេលនេះ កម្ពុជា ក៏ដូចជាពិភពលោក ក៏កំពុងជួបប្រទះបញ្ហាឆ្លងរាតត្បាតកូវីដ១៩ ខណៈដែលកម្ពុជា ក៏កំពុងមានសម្ព័ន្ធភាពល្អ និងកាន់តែរឹងមាំដូចដែកថែបជាមួយនឹងមហាមិត្តចិន៕
ចែករំលែកព័តមាននេះ