ខេត្តកណ្តាល ៖ គណនីហ្វេសប៊ុកឈ្មោះ សុភ័ក្រ ចារ៉ាវី ដែលបានបញ្ចេញមតិយោបល់ ចូលក្នុងផេកហ្វេសប៊ុករបស់សម្ដេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា ដែលមានខ្លឹមសារថា «សូមបងៗសមត្ថកិច្ច នៃស្នងការនគរបាលខេត្តកណ្ដាល ជាពិសេសលោក ស្នងការ ឈឿន សុចិត្ត សូមមេត្តាជួយអនុវត្តច្បាប់នៅឃុំស្អាងភ្នំ ស្រុកស្អាង ខេត្តកណ្ដាលផង មានឡានដឹកដីភ្នំជាច្រើនស៊ីផ្លេ ឮខ្លាំងណាស់ ហើយបើកលឿនដូចហោះអញ្ចឹង មិនគោរពសិទ្ធិអ្នកបើកបរដទៃ ដឹកដី មិនគ្របប៉ះពាល់ដល់អ្នកបើកបរដូចជាម៉ូតូ ជាពិសេសនៅចំណុចផ្សារស្អាងភ្នំជាដើម សូមបងសមត្ថកិច្ចជួយចុះអន្តរាគមន៍ផង ពីខ្ញុំបាទប្រជាពលរដ្ឋនៅឃុំស្អាងភ្នំ ស្រុកស្អាង ខេត្តកណ្ដាល ។ ប្រជាពលរដ្ឋគាត់មិនពេញចិត្តនឹងការបើកបររបស់ឡានដឹកដី នៅចំណុចឃុំស្អាងភ្នំ ស្រុកស្អាង ខេត្តកណ្ដាល ជាដើម» ។
ក្រោយពីទទួលបានព័ត៌មាននេះភ្លាម លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានចាត់មន្ត្រីការិយាល័យនគរបាលចរាចរណ៍ផ្លូវគោក សហការជាមួយជំនាញផ្នែកសណ្តាប់ធ្នាប់ នៃអធិការដ្ឋាននគរបាលស្រុកស្អាង ចុះស្រាវជ្រាវចំពោះករណីខាងលើជាបន្ទាន់ ។
នៅថ្ងៃទី០១-០២ ខែមិថុនា ឆ្នាំ២០២១ កម្លាំងការិយាល័យជំនាញខេត្ត សហការជាមួយផ្នែកសណ្ដាប់ធ្នាប់ និងចរាចរណ៍ នៃអធិការដ្ឋាននគរបាលស្រុកស្អាង ចុះស្រាវជ្រាវ ត្រួតពិនិត្យ និងឃាត់រថយន្ត បានចំនួន១៩គ្រឿង ដកហូតស៊ីផ្លេខ្យល់ ៩ដើម នៅលើបណ្តោយផ្លូវជាតិលេខ២១ និងផ្លូវលេខ ១២១០ ស្ថិតនៅក្នុងឃុំស្អាងភ្នំ ស្រុកស្អាង ខេត្តកណ្ដាល ។
ដោយរថយន្តទាំងនោះ ត្រូវបានកម្លាំងជំនាញធ្វើការអប់រំ និងធ្វើកិច្ចសន្យា ដល់អ្នកបើកបរដូចខាងក្រោម ៖
១. ចាប់ពីថ្ងៃនេះតទៅ ខ្ញុំបាទនិងគោរពតាមការ អប់រំ ណែនាំ របស់សមត្ថកិច្ចដោយពេលដឹកជញ្ជូនខ្សាច់ ឬដី ខ្ញុំបាទនិងគ្របឲ្យបានត្រឹមត្រូវ មិនឲ្យហៀរជ្រុះ ឬហូរទឹកធ្លាក់មកលើផ្លូវឡើយ ។
២. ខ្ញុំបាទ និងបំពាក់ស្លាកលេខយាន មានឯកសារយាន មិនបើកបរលឿន មិនបើកវ៉ាជែង មិនស៊ីផ្លេនៅកន្លែងហាមស៊ីផ្លេ និងមិនប្រើប្រាស់ស៊ីផ្លេខ្យល់ ។
៣. បើខ្ញុំបាទមិនគោរពតាមកិច្ចសន្យាខាងលើ ខ្ញុំបាទនឹងទទួលខុសត្រូវទាំងស្រុងចំពោះមុខច្បាប់ ដោយឥតប្រកែកតវ៉ាឡើយ ។
ដោយឡែក ជំនាញផាកពិន័យរថយន្ត ចំនួន០៧គ្រឿង ៖
-ផ្ទុកសំពីងសំពោង ១គ្រឿង
-មិនពាក់ខ្សែក្រវ៉ាត់ ៦គ្រឿង
ស្មើទឹកប្រាក់ចំនួន ១,២០០,០០០រៀល ៕
ចែករំលែកព័តមាននេះ