ខេត្តតាកែវ ៖ រោងចក្រផលិតកាបូប១កន្លែង ត្រូវអគ្គីភ័យឆាបឆេះអស់ទាំងស្រុង បើទោះបីជាមានរថយន្តពន្លត់អគ្គីភ័យរបស់នគរបាលខេត្តជួយពន្តត់ក៏ដោយក៏មិនអាចជួយសង្គ្រោះបានឡើយ ខណៈពេលដែលភ្លើងកំពុងតែឆាបឆេះយ៉ាងសន្ធោសន្ធៅទៅហើយ ទើបមានរថយន្តពន្លត់អគ្គីភ័យទៅដល់ ។
ហេតុការណ៍អគ្គីភ័យឆាបឆេះរោងចក្រផលិតកាបូបនេះបានកើតឡើងនៅថ្ងៃទី២៨ ខែឧសភា ឆ្នាំ២០២១ វេលាម៉ោង១៧និង១០នាទី ភូមិពេជ្រចង្វា ឃុំបឹងត្រាញខាងជើង ស្រុកសំរោង ។
លោក កេត ម៉ៅ អភិបាលស្រុកសំរោងបានអោយកោះសន្តិភាពយើងដឹងថា អគាររោងចក្រដែលត្រូវភ្លើងឆាបឆេះនេះយីហោ (ហ្វូលីយ័ន (S.L.Y) )ជារោងចក្រផលិតកាបូបមួយ អគារមានទំហំ ៦០ម៉ែត្រX ៤៥ម៉ែត្រ ឆេះអស់ទាំងស្រុង និងរងរបួសកម្មករចំនួន ០១នាក់ (ស្រាល) ។
បន្ទាប់ពីភ្លើងឆាបឆេះភ្លាមក៏មានអន្តរាគមន៍ពីរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តទៅជួយបាញ់ទឹកពន្លត់ផងដែរ តែដោយសារអណ្តាតភ្លើងឆាបឆេះលឿនពេកមិនអាចជួយសង្គ្រោះរោងចក្រនេះបានឡើយ ។
លោកអភិបាលស្រុកសំរោងបានអោយដឹងទៀតថា ហើយរថយន្តពន្លត់អគ្គីភ័យប្រើប្រាស់ទឹកចំនួន០៧គ្រឿងទើបរលត់ទាំងស្រុង នៅវេលាម៉ោង២០និង៣០នាទីថ្ងៃដដែលមិនបណ្តាលឱ្យឆេះរាលដាលដល់អគារដ៏ទៃ ឬផ្ទះប្រជាពលរដ្ឋឡើយ ហើយបើតាមការសន្និដ្ឋានមូលហេតុ គឺបណ្តាលមកពីឆ្លងចរន្តអគ្គិសនីទើបធ្វើអោយឆេះលឿនបែបនេះ ណាមួយកាបូបធ្វើពីជ័រផងនោះ ៕
ចែករំលែកព័តមាននេះ