រាជធានីភ្នំពេញ ៖ ក្នុងឆ្នាំ២០២១នេះ ទោះបីជាកម្ពុជាជួបវិបត្តិនឹងជំងឺកូវីដ១៩ដែលមានស្ថានភាពធ្ងន់ធ្ងរជាងឆ្នាំ២០២០ក្ដី តែស្ថាប័នហិរញ្ញវត្ថុអន្តរជាតិជាច្រើននៅតែមានសុទិដ្ឋិនិយមចំពោះកំណើនសេដ្ឋកិច្ចរបស់កម្ពុជាក្នុងឆ្នាំ២០២១និងឆ្នាំ២០២២ខាងមុខ ដោយបានរំពឹងនិងព្យាករថាសេដ្ឋកិច្ចកម្ពុជាពីរឆ្នាំនេះនឹងមានកំណើនជាវិជ្ជមាន ។
បើយោងតាមមូលនិធិរូបិយវត្ថុអន្តរជាតិ ហៅកាត់ថា IMF បានរំពឹងថាសេដ្ឋកិច្ចកម្ពុជាក្នុងឆ្នាំ២០២១នេះនឹងមានកំណើន៤,២ភាគរយ និង៦ភាគរយនៅក្នុងឆ្នាំ២០២២ខាងមុខ ។ ការព្យាករនិងរំពឹងទុករបស់មូលនិធិរូបិយវត្ថុអន្តរជាតិធ្វើឡើងនៅក្នុងវេទិកាថ្នាក់ដឹកនាំធនាគារកាលពីពេលថ្មីៗនេះ តាមរយៈវីដេអូអនឡាញដោយមានការចូលពីថ្នាក់ដឹកនាំធនាគារក្នុងប្រទេសកម្ពុជាជាច្រើនផងដែរ ។
លោក Yasuhisa Ojima សេដ្ឋវិទូជាន់ខ្ពស់នៃមូលនិធិរូបិយវត្ថុអន្តរជាតិ បានថ្លែងថា IMF រំពឹងថាសេដ្ឋកិច្ចកម្ពុជានឹងកើនឡើង៤,២ភាគរយនៅឆ្នាំនេះ និង៦ភាគរយនៅឆ្នាំ២០២២ បន្ទាប់ពីការធ្លាក់ចុះ៣,៥ភាគរយនៅឆ្នាំ២០២០ ។ ការព្យាករអំពីកំណើននឹងត្រូវបានពិនិត្យឡើងវិញ ដោយឆ្លុះបញ្ចាំងពីការកើនឡើងនៃការឆ្លងវីរុសកូវីដ១៩នាពេលថ្មីៗនេះ ជាពិសេសបន្ទាប់ពីមានព្រឹត្តិការណ៍សហគមន៍២០ កុម្ភៈ ។
លោកបន្តថា វិស័យហិរញ្ញវត្ថុមើលទៅមានស្ថិរភាព ដោយសារតែវិធានការណ៍គោលនយោបាយជាមួយនឹងការបន្ធូរបន្ថយលក្ខខណ្ឌហិរញ្ញវត្ថុ រួមមាន (LPCO, ទុនបម្រុងកាតព្វកិច្ចទាប) និងអនុញ្ញាតឱ្យមានការរៀបចំឥណទានឡើងវិញ រហូតដល់ដំណាច់ឆ្នាំ២០២១ ។
ក្រៅពីស្ថាប័នហិរញ្ញវត្ថុ IMF ក៏មានស្ថាប័នហិរញ្ញវត្ថុអន្តរជាតិធំពីរផ្សេងទៀតគឺធនាគារអភិវឌ្ឍន៍អាស៊ី និងធនាគារពិភពលោកក៏បានមើលឃើញពីសញ្ញាវិជ្ជមានចំពោះកំណើនសេដ្ឋកិច្ចកម្ពុជាផងដែរ ទោះបីជាបច្ចុប្បន្នកម្ពុជាកំពុងជាប់ដៃប្រយុទ្ធប្រឆាំងនឹងជំងឺកូវីដ១៩ក្ដី ។
កាលពីចុងខែមុននេះ ធនាគារអភិវឌ្ឍន៍អាស៊ីហៅកាត់ថា ADB បានព្យាករថាសេដ្ឋកិច្ចកម្ពុជាឆ្នាំ២០២១រំពឹងថានឹងមានកំណើន៤ភាគរយ និង៥,៥ភាគរយនៅក្នុងឆ្នាំ២០២២ខាងមុខ ។
ការព្យាករត្រូវបានធ្វើឡើងដោយផ្អែកលើរបាយការណ៍ទស្សនវិស័យអភិវឌ្ឍន៍អាស៊ី ក្នុងនោះ ផលិតកម្មឧស្សាហកម្មត្រូវបានរំពឹងថានឹងកើនឡើង៧,១ភាគរយ ក្នុងឆ្នាំ២០២១ និង៧ភាគរយក្នុងឆ្នាំ២០២២ ដោយសារតែការងើបឡើងវិញ នៃវិស័យកាត់ដេរសម្លៀកបំពាក់ ស្បែកជើងនិងទំនិញសម្រាប់ធ្វើដំណើរក៏ដូចជាកំណើននៃឧស្សាហកម្មធនស្រាលផ្សេងទៀត ដូចជាផលិតផលអេឡិចត្រូនិក និងកង់ជាដើម ។ វិស័យកសិកម្មក៏ត្រូវបានរំពឹងថានឹងកើនឡើង១,៣ភាគរយក្នុងឆ្នាំនេះនិង១,២ភាគរយនៅក្នុងឆ្នាំ២០២២ ។
របាយការណ៍ទស្សនវិស័យអភិវឌ្ឍន៍អាស៊ី ក៏បានបង្ហាញថា វិស័យសេវាម្មនឹងស្ទុះងើបឡើងវិញក្នុងល្បឿនយឺតៗ ពោលគឺប្រមាណ៣,៣ភាគរយក្នុងឆ្នាំ២០២១ ទៅ៦,២ភាគរយក្នុងឆ្នាំ២០២២ ។ តែដោយសារតែការឆ្លងកូវីដ១៩ ក្នុងសហគមន៍២០ កុម្ភៈ២០២១ ធ្វើឱ្យសកម្មភាពវិស័យសេវាកម្មបានធ្លាក់ចុះ ព្រោះតែការរឹតបន្តឹងការធ្វើដំណើរ ហើយវានឹងបន្តស្ទើរតែពេញមួយឆ្នាំ២០២១នេះ ។
នៅក្នុងវិបត្តិនៃជំងឺនេះដែរ កម្ពុជានៅតែបន្តសម្រេចបាននូវការនាំចេញទំនិញរបស់ខ្លួនទៅកាន់ទីផ្សារក្រៅប្រទេសជាបន្តបន្ទាប់ ក្នុងនោះ រយៈពេល៤ខែដើមឆ្នាំ២០២១នេះ ការនាំចេញផលិតផលសម្លៀកបំពាក់ស្បែកជើង និងសម្ភារៈធ្វើដំណើរទៅកាន់ទីផ្សារអន្តរជាតិមានទំហំទឹកប្រាក់ប្រមាណជិត៣ពាន់លានដុល្លារអាមេរិក ។ ក្រៅពីនេះកម្ពុជាក៏បានចាប់ផ្ដើមនាំស្វាយស្រស់ទៅកាន់ទីផ្សារប្រទេសចិនលើកដំបូង ហើយក៏គ្រោងនឹងនាំចេញផលិតផលកសិកម្មសំខាន់ៗជាច្រើនទៀតទៅកាន់ទីផ្សារដ៏ធំមួយនេះផងដែរ ៕
ចែករំលែកព័តមាននេះ