- ភ្នំពេញ
ភ្នំពេញ៖ ចាប់តាំងពីឆ្លងរាលដាលខ្លាំង នៅរាជធានីភ្នំពេញ កាលពីដើមខែមេសា កូវីដ១៩ បានឆ្លងចូលមុនគេ នៅរោងចក្រកាត់ដេរ ឌីន ហាន នៅផ្លូវឌួងងៀប…
ភ្នំពេញ៖ ចាប់តាំងពីឆ្លងរាលដាលខ្លាំង នៅរាជធានីភ្នំពេញ កាលពីដើមខែមេសា កូវីដ១៩ បានឆ្លងចូលមុនគេ នៅរោងចក្រកាត់ដេរ ឌីន ហាន នៅផ្លូវឌួងងៀប ក្នុងសង្កាត់ស្ទឹងមានជ័យទី៣ ខណ្ឌមានជ័យ ជិតក្រសួងកិច្ចការនារី។ ជាបន្តបន្ទាប់ កម្មកររោងចក្រកាត់ដេរនៅរោងចក្រកាន់តែច្រើនឡើងៗ ត្រូវបានរកឃើញឆ្លងកូវីដជាបន្តបន្ទាប់រៀងរាល់ថ្ងៃ ក្នុងអំឡុងពេលបិទខ្ទប់រាជធានីភ្នំពេញ នៅចុងខែមេសា។
នៅក្រោយពេលបើករាជធានីភ្នំពេញ នៅថ្ងៃទី៦ ខែឧសភា ដែលអ្នកនៅភ្នំពេញ អាចធ្វើដំណើរទៅខេត្ត ហើយអ្នកខេត្ត អាចចូលមកភ្នំពេញបានឡើងវិញនោះ ក៏លេចឡើងករណីអ្នកទៅពីភ្នំពេញមួយចំនួន មានទាំងកម្មករកាត់ដេរផង រកឃើញឆ្លងកូវីដជាបន្តបន្ទាប់ នៅតាមបណ្តាខេត្តនានា។
ចាប់តាំងពីដើមខែឧសភា ក៏មានករណីឆ្លងកូវីដ នៅតាមបណ្តារោងចក្រកាត់ដេរ នៅអង្គស្នួល ខេត្តកណ្តាល រាលដាលដល់រោងចក្រកាត់ដេរ នៅខេត្តកំពង់ស្ពឺ នៅខេត្តតាកែវ ខេត្តកំពង់ឆ្នាំង ខេត្តកំពង់ចាម និងផ្ទុះការឆ្លងរាលដាលដល់កម្មករកាត់ដេរ នៅខេត្តព្រះសីហនុ ហើយចុងក្រោយនេះ ក៏លេចករណីឆ្លងកូវីដ នៅរោងចក្រ ក្នុងតំបន់សេដ្ឋកិច្ចពិសេស ក្នុងក្រុងបាវិត ខេត្តស្វាយរៀង ជាប់ព្រំដែនវៀតណាម។
នៅពេលកូវីដ ឆ្លងចូលរោងចក្រ គឺច្បាស់ណាស់ថា ប៉ះពាល់លើសេដ្ឋកិច្ចធ្ងន់ធ្ងរ។ ក្រៅពីប៉ះពាល់សេដ្ឋកិច្ចជាតិ រោងចក្រសហគ្រាសក៏ប៉ះពាល់ផង និងប៉ះពាល់ដល់ជីវភាពកម្មករផង។
នៅភ្នំពេញ អំឡុងពេលបិទខ្ទប់ ដែលមានការរាលដាលឆ្លងជំងឺកូវីដ១៩ ធ្ងន់ធ្ងរ អំឡុងខែមេសា រហូតដល់ដើមខែឧសភា គឺបានជួបប្រទះរួចហើយ។ រោងចក្រកាត់ដេរ ត្រូវបិទទ្វារ ហើយម្នាក់ៗ នៅតែក្នុងបន្ទប់ផ្ទះជួល។ មិនតែប៉ុណ្ណោះ ក៏មានកម្មករកាត់ដេរយើងមិនតិចនាក់ទេ ដែលឆ្លងកូវីដ ត្រូវទៅសម្រាកព្យាបាល ហើយអ្នកធ្វើការជាមួយអ្នករកឃើញវិជ្ជមានកូវីដទាំងនោះ ក៏ត្រូវទៅធ្វើតេស្ត យកសំណាក និងធ្វើចត្តាឡីស័ក នៅក្នុងបន្ទប់ជួល រយៈពេល ១៤ថ្ងៃ។
ក្នុងខែមេសា ឆ្នាំ២០២១ អំឡុងពេលបិទខ្ទប់ និងមានករណីឆ្លងរាតត្បាតកូវីដ ក្នុងរោងចក្រកាត់ដេរ និងនៅតាមតំបន់បន្ទប់ផ្ទះជួល គឺកម្មករកាត់ដេរ ដែលរោងចក្រត្រូវបិទទ្វារទាំងអស់ ទទួលបានប្រាក់ឈ្នួលត្រឹមតែពាក់កណ្តាលប៉ុណ្ណោះ។ នៅផ្ទះជួល បន្ទប់ជួល មានតែចំណាយ។ អ្នកខ្លះ ក៏បានម្ចាស់បន្ទប់ ផ្ទះជួលចិត្តធម៌ បានបញ្ចុះតម្លៃ ហើយខ្លះក៏មានសំណាង ត្រូវម្ចាស់ផ្ទះបន្ទប់ជួល មិនយកថ្លៃតែម្តង។ បន្ថែមលើនោះ កម្មករកាត់ដេរ ក៏ទទួលបានអំណោយជាអង្ករ មី ត្រីខ ទឹកត្រី ទឹកស៊ីអ៊ីវ ពីរាជរដ្ឋាភិបាល ក្នុងតំបន់បិទខ្ទប់ គ្រាន់នឹងសម្រួលដោះទ័លនូវការលំបាកបានមួយគ្រា។
ចំពោះមុខការឆ្លងរាតត្បាតកូវីដ១៩ គឺចាប់ពីចុងខែមីនា រាជរដ្ឋាភិបាល តាមរយៈក្រសួងការងារ និងបណ្តុះបណ្តាលវិជ្ជាជីវៈ បានជំរុញឲ្យកម្មករកាត់ដេរ ពិសេសនៅភ្នំពេញ បានចាក់វ៉ាក់សាំងបង្ការជំងឺកូវីដ១៩។ ពេលបិទខ្ទប់នៅតំបន់ក្រហមទៀតសោត យុទ្ធនាការចាក់វ៉ាក់សាំង ក៏បានធ្វើឡើងជាថ្មីទៀត ចាប់តាំងពីដើមខែឧសភា រហូតដល់ពេលនេះ មិនទាន់ឈប់នៅឡើយ។ ក្នុងតំបន់ក្រហម មានទាំងប្រជាពលរដ្ឋ និងទាំងកម្មករកាត់ដេរ បានទៅចាក់វ៉ាក់សាំងចូលដល់ខ្ទង់ ៧០ម៉ឺន ទៅ ៨០ម៉ឺននាក់ហើយ។
រាជរដ្ឋាភិបាល បានកំណត់យុទ្ធសាស្ត្ររួចហើយ គឺស្រោចវ៉ាក់សាំង នៅតំបន់ក្រហម ដែលមានការឆ្លងរាលដាលធ្ងន់ធ្ងរនៃជំងឺកូវីដ។ នៅពេលនេះទៀត ការចាក់វ៉ាក់សាំងជូនប្រជាពលរដ្ឋ នៅភ្នំពេញ ក៏បានពង្រីកដល់ ១១ខណ្ឌហើយ ពោលគឺនៅសល់តែ ៣ខណ្ឌទៀតប៉ុណ្ណោះ គឺខណ្ឌជ្រោយចង្វារ ខណ្ឌព្រែកព្នៅ និងខណ្ឌដូនពេញ ក្នុងរាជធានីភ្នំពេញ ដែលនឹងត្រូវចាក់ឆាប់ៗនេះ។
តាមផែនការ យ៉ាងយូរត្រឹមខែមិថុនា ការចាក់វ៉ាក់សាំងកូវីដ ជូនប្រជាពលរដ្ឋនៅភ្នំពេញ ដែលមានអាយុ ១៨ឆ្នាំឡើងទៅ ឲ្យបានគ្រប់ៗគ្នា នឹងត្រូវធ្វើឲ្យរួចរាល់ មុននឹងចាប់ផ្តើមយុទ្ធនាការចាក់វ៉ាក់សាំង នៅក្នុងខេត្តកណ្តាល និងខេត្តព្រះសីហនុ។
នៅទូទាំងប្រទេស គិតត្រឹមថ្ងៃទី២៥ ខែឧសភា ឆ្នាំ២០២១ ត្រូវបានក្រសួងសុខាភិបាល ប្រកាសថា ចាក់វ៉ាក់សាំងបានចំនួនជាង ២លាន ៣០ម៉ឺននាក់ហើយ។
នៅពេលនេះ ក្រសួងការងារ ក៏បានប្រកាសលើកទឹកចិត្តឲ្យរោងចក្រសហគ្រាសក្រុមហ៊ុនទាំងអស់ អនុញ្ញាតឲ្យកម្មករនិយោជិត អាចឈប់សម្រាកមួយថ្ងៃ ដោយមានប្រាក់ឈ្នួល ដើម្បីទៅចាក់វ៉ាក់សាំង ដូសទី២។
យ៉ាងណាក៏ដោយ វ៉ាក់សាំង ជាឧបករណ៍ទប់ស្កាត់ការឆ្លងរាតត្បាតជំងឺកូវីដ១៩។ តែវ៉ាក់សាំង តែមួយមុខ មិនគ្រប់គ្រាន់ក្នុងការទប់ស្កាត់ការឆ្លងរាតត្បាតនោះទេ។ ដូច្នេះប្រជាពលរដ្ឋគ្រប់រូប រួមទាំងកម្មករកាត់ដេរទាំងអស់ ត្រូវតែបន្តអនុវត្តនូវវិធានការសុខាភិបាល ពិសេសវិធានការ ៣ការពារ និង៣កុំ ដើម្បីទប់ស្កាត់ និងកាត់បន្ថយការឆ្លងរាតត្បាតកូវីដ១៩។ ជំងឺកូវីដ១៩ ដែលមកដល់ពេលនេះ មិនថា នៅកម្ពុជានិយាយជារួម និង និយាយដោយឡែក នៅភ្នំពេញនោះទេ គឺនៅមានលក្ខណៈធ្ងន់ធ្ងរនៅឡើយ។ មួយថ្ងៃៗ អត្រាអ្នកឆ្លងកើនឡើង នៅកម្ពុជា បានកើនឡើងវិញ ពីជាង ៥០០នាក់ ឡើងដល់ជាង ៦០០នាក់ នៅថ្ងៃទី២៥ ខែឧសភា។
មានតែប្រជាពលរដ្ឋគ្រប់រូប ពិសេសកម្មករកាត់ដេរម្នាក់ៗ ត្រូវចូលរួមទទួលការចាក់វ៉ាក់សាំងឲ្យបានទាំងអស់គ្នា។ ចាក់វ៉ាក់សាំងហើយ ក៏បន្តវិធានការការពារខ្លួន ពាក់ម៉ាស លាងសម្អាតដៃ និងរក្សាគម្លាតសុវត្ថិភាពពីម្នាក់ទៅម្នាក់ យ៉ាងតិច ១ម៉ែត្រកន្លះ ជាដើម។
ចូរកុំភ្លេចថា បើរោងចក្រណាមួយ ផ្ទុះរាលដាលឆ្លងកូវីដ គឺច្បាស់ណាស់ថា រោងចក្រនោះ ត្រូវបិទទ្វារ ហើយកម្មករ ដែលឆ្លងកូវីដ ត្រូវបាននាំទៅព្យាបាល រីឯអ្នកពាក់ព័ន្ធផ្សេងទៀត ត្រូវធ្វើចត្តាឡីស័ក។ បើធ្វេសប្រហែស បណ្តាលឲ្យឆ្លងកូវីដ កម្មករកាត់ដេរ ត្រូវអស់ការងារ ហើយក៏មិនមានប្រាក់ខែឲ្យបានពេញលេញនោះទេ។ ដូច្នេះ មានតែការពារ ទើបប្រសើរជាងព្យាបាល៕
ចែករំលែកព័តមាននេះ