រាជធានីភ្នំពេញ ៖ តម្លៃដីធ្លី ក្នុងខណ្ឌទាំង១៤ នៅរាជធានីភ្នំពេញ នៅតែរក្សាលំនឹងល្អមិនមានការធ្លាក់ឬថយចុះនោះទេ ហើយក្នុងវិបត្តិកូវីដ១៩នេះតម្លៃមិនត្រឹមតែមិនធ្លាក់ឬទ្រឹង បែរជាតំបន់ខ្លះមានសន្ទុះងើបឡើងបើធៀបនឹងឆ្នាំមុនៗ ក្នុងនោះតំបន់ជាយរាជធានីភ្នំពេញគេឃើញថាមានសន្ទុះជាតំបន់នៅកណ្ដាលរាជធានីភ្នំពេញ ។
យោងតាមរបាយការណ៍ក្រុមហ៊ុនអចលនទ្រព្យឃីរៀលអ៊ីស្ទេត បានបង្ហាញថាខណ្ឌដង្កោ គឺមានសន្ទុះតម្លៃដីធ្លីខ្ពស់ជាងគេក្នុងចំណោមខណ្ឌទាំង១៤ក្នុងរាជធានីភ្នំពេញ ដែលជំរុញឱ្យតម្លៃជាមធ្យមក្នុងរាជធានីភ្នំពេញមានកំណើនជាវិជ្ជមានក្នុងពេលបច្ចុប្បន្ននេះ ។
របាយការណ៍របស់ក្រុមហ៊ុនអចលនទ្រព្យបង្ហាញថា កំណើនដីធ្លីក្នុងខណ្ឌដង្កោក្នុងឆមាសចុងក្រោយនេះ ឃើញថា មានសន្ទុះប្រមាណ១៧,៩ភាគរយ ហើយខណ្ឌពីរផ្សេងទៀតក៏មានសន្ទុះខ្ពស់ដែរក្នុងនោះកំបូលមានកំណើន៨ភាគរយ និងខណ្ឌសែនសុខ ។
លោកសន សៀប នាយកប្រតិបត្តិក្រុមហ៊ុនអចលនទ្រព្យឃី រៀលអ៊ីស្ទេតបានឱ្យដឹងថា ហេដ្ឋារចនាសម្ព័ន្ធធំៗចំនួន៣ក្នុងខណ្ឌដង្កោ បានជំរុញឱ្យតម្លៃដីធ្លីក្នុងខណ្ឌនេះហក់ងើបខ្ពស់ ក្នុងនោះទី១ ផ្លូវ៦០ម៉ែត្រ ឆ្លងកាត់ខណ្ឌដង្កោឆ្ពោះទៅកាន់ព្រលានយន្តហោះថ្មី ទី២ ផ្លូវក្រវ៉ាត់ក្រុងតភ្ជាប់ពីផ្លូវកប់ស្រូវរត់កាត់ខណ្ឌដង្កោ និងទី៣ហេដ្ឋារចនាសម្ព័ន្ធជាច្រើនទៀតក្នុងខណ្ឌមួយនេះ ។
លោកបន្តថា តាមរយៈកំណើននៃតម្លៃដីធ្លីក្នុងខណ្ឌដង្កោនេះហើយ ទើបធ្វើឱ្យតម្លៃដីជាមធ្យមក្នុងរាជធានីភ្នំពេញ មានសន្ទុះប្រមាណ១,៩ភាគរយ និងធ្វើឱ្យតម្លៃជាមធ្យមក្នុងរាជធានីភ្នំពេញ មានចន្លោះពី២០០០ដុល្លារអាមេរិកទៅ២១០០ដុល្លារអាមេរិកក្នុងមួយម៉ែត្រការ៉េ ។
ក្រៅពីដីធ្លីក្នុងភូមិសាស្ត្ររាជធានីភ្នំពេញ គេឃើញថាខេត្តព្រះសីហនុ និងខេត្តសៀមរាបក៏មានសក្ដានុពលក្នុងវិស័យដីធ្លីនេះដែរ ប៉ុន្តែនៅរយៈពេលចុងក្រោយនេះតម្លៃដីធ្លីនៅក្នុងតំបន់មួយចំនួនក្នុងក្រុងព្រះសីហនុមានការថមថយបន្តិចបន្តួចធៀបទៅនឹងកាលពីឆមាសឆ្នាំ២០១៩ ។
បើតាមច្រឹកសុខនីមប្រធានសមាគមអ្នក និងភ្នាក់ងារអចលនវត្ថុកម្ពុជា បានមានប្រសាសន៍ផងដែរថា វិនិយោគិន ដែលចង់វិនិយោគលើវិស័យដីធ្លីគួរសម្លឹងទៅមើលតំបន់ដែលនៅឆ្ងាយពីរាជធានីភ្នំពេញឬឆ្ងាយពីទីប្រជុំជន ទើបអាចចំណេញព្រោះ ឱកាសនៃការឡើងថ្លៃបន្តនៅក្នុងតំបន់ទាំងនោះនៅមាន តែបើសិនជាតំបន់ក្នុងក្រុង ឬនៅជិតៗក្រុងឱកាសនៃការកើនឡើងបន្តទៀតមានតិចតួចបំផុត ។
លោកបន្តថាតំបន់ជុំវិញរាជធានីភ្នំពេញត្រូវបានមើលឃើញថាមានសក្ដានុពលដូចគ្នា គ្រាន់តែតំបន់ខ្លះមានសក្ដានុពលទៅលើវិស័យផ្សេងៗគ្នាប៉ុណ្ណោះ ។ សម្រាប់សក្ដានុពលដីធ្លីនៅពេលអនាគត លោកមើលឃើញថាតំបន់ប៉ែកខាងត្បូង និងខាងលិចគឺមានឱកាសក្នុងការទទួលបានចំណេញក្នុងនោះដែរ ខេត្តកំពង់ស្ពឺ ប៉ែកខាងលិចរាជធានី នឹងក្លាយជាតំបន់ទាក់ទាញការវិនិយោគកាន់តែខ្លាំងនៅពេលអនាគត ដែលវិនិយោគិនគួរតែចាប់អារម្មណ៍ចាប់ពីពេលនេះ ៕
ចែករំលែកព័តមាននេះ