រាជធានីភ្នំពេញ៖ កោះកុងបានក្លាយជាតំបន់មួយដែលមានការទាក់ទាញវិនិយោគិនជនជាតិចិនកាន់តែខ្លាំងនៅក្នុងរយៈពេលប៉ុន្មានឆ្នាំចុងក្រោយនេះ ដោយឃើញមានគម្រោងធំៗជាច្រើនក្រោមការបណ្ដាក់ទុនវិនិយោគរបស់ជនជាតិចិនបានលេចរូបរាងជាបណ្ដើរៗផងដែរទោះបីកម្ពុជាស្ថិតនៅក្នុងដំណាក់កាលនៃវិបត្តិក្ដី ហើយនឹងកែប្រែកោះកុងក្លាយទៅជាបណ្ដុំសហគមន៍វិនិយោគិនចិនមួយនៅពេលខាងមុខ។
យោងតាមសេចក្តីប្រកាសព័ត៌មានរបស់រដ្ឋបាលខេត្តកោះកុងបានឱ្យដឹងថា ថ្មីៗនេះ កោះកុងបានទទួលគម្រោងវិនិយោគរមណីយដ្ឋានលំហែកាយខ្នាតធំមួយក្នុងខេត្តនេះ ដែលអាចផ្ដល់ការងារដល់និយោជិតរាប់ម៉ឺននាក់នៅក្នុងរយៈពេល២ឆ្នាំខាងមុខទៀតនេះ ។
លោកឧកញ៉ា តឹង ភីពីងម្ចាស់គម្រោងរមណីយដ្ឋានលំហែកាយខ្នាតធំ (Long Bay) របស់ក្រុមហ៊ុនហ្សេងហេងគ្រុប (ZHENG HENG GROUP) បានឲ្យដឹងថា គម្រោង Long Bay ជាគម្រោងរមណីយដ្ឋាន ទេសចរណ៍វប្បធម៌ខ្នាតធំមានក្រឡាផ្ទៃ និងមានផ្ទៃដីសាងសង់២លានម៉ែត្រការ៉េ។ នាពេលអនាគតគម្រោង Long Bayនេះ នឹងបង្កើតបានជាក្រុមសណ្ឋាគារ ដ៏ប្រណីតបំផុតមួយ ដែលរួមបញ្ចូលគ្នាដោយសណ្ឋាគារលំដាប់អន្តរជាតិជាច្រើន នឹងក្លាយទៅជាមជ្ឍមណ្ឌល សម្រាប់លំហែរកាយ វិស្សមកាល ការថែរក្សាសុខភាព និងការកម្សាន្តជាដើមដែលមានទំហំធំ និងមានប្រព័ន្ធគ្រប់គ្រងល្អ ឈានមុខគេបំផុតនៅក្នុងខេត្តកោះកុង ក៏ដូចជាប្រទេសកម្ពុជាបច្ចុប្បន្ន ព្រមទាំងដើរតួនាទីយ៉ាងសំខាន់ ក្នុងការអភិវឌ្ឍវិស័យឧស្សាហកម្មទេសចរណ៍ ក្នុងខេត្តកោះកុង និងប្រទេសកម្ពុជា ។លោកថា៖« រហូតមកដល់ពេលនេះគម្រោង Long Bay មាននិយោជិតក្នុងស្រុកជាង៨០០នាក់ ហើយនាពេលអនាគត ប្រមាណ២ឆ្នាំទៀតតម្រូវការនិយោជិត ក្នុងស្រុកនឹងមានចំនួនកើនដល់រាប់ម៉ឺននាក់ ។
លោកជំទាវ មិថុនា ភូថង អភិបាលនៃគណៈអភិបាលខេត្តកោះកុង បានមានប្រសាសន៍ថា នេះជាការផ្លាស់ប្តូរ និងសមិទ្ធិផល នៃការវិនិយោគធនធានទេសចរណ៍ និងការដោះស្រាយបញ្ហាកង្វះខាតការងារ ក្នុងស្រុកដែលគម្រោង Long Bay បានផ្តល់សម្រាប់ខេត្តកោះកុង ដែលចំណាយតែពីរឆ្នាំប៉ុណ្ណោះ ហើយបានកោតសរសើរ ចំពោះលោកឧកញ៉ា តឹង ភីពីង សម្រាប់ការយល់ឃើញដ៏ឈ្លាសវៃ និងការសំរេចចិត្តដ៏ត្រឹមត្រូវ ក្នុងការវិនិយោគមកលើខេត្តកោះកុង ការវិនិយោគរបស់លោកឧកញ៉ា តឹង ភីពីង ដូចនឹងសុភាសិតចិនមួយឃ្លាថា «ប្រែដុំថ្មទៅជាមាស» ។
បើតាមលោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថាវិនិយោគិនចិន នឹងមកប្រទេសកម្ពុជាឡើងវិញក្នុងពេលឆាប់ៗដើម្បីស្វែងរកការវិនិយោកគបន្ថែមទៀត ក្រោយពេលវិបត្តិនៃជំងឺកូវីដ១៩បានថមថយ ។លោកថា៖« គោលដៅវិនិយោគរបស់វិនិយោគរបស់វិនិយោគិនចិន នៅក្នុងប្រទេសកម្ពុជា គេឃើញមានខេត្តព្រះសីហនុ ខេត្តកោះកុង និងរាជធានីភ្នំពេញ ។ ហើយកោះកុងនឹងក្លាយជាបណ្ដុំសហគមន៍វិនិយោគិនចិនដ៏ទាក់ទាញមួយនៅពេលអនាគតខណៈខេត្តនេះ មានអាកាសយានដ្ឋានអន្តរជាតិ តារាសាគរក្រោមការវិនិយោគរបស់ចិន នឹងដាក់ដំណើរការពេលឆាប់ៗ និងអាចទាក់ទាញវិនិយោគិនចិនបន្ថែមទៀតមកបណ្ដាក់ទុនក្នុងតំបន់ឆ្នេរមួយនេះ » ៕
ចែករំលែកព័តមាននេះ