រាជធានីភ្នំពេញ ៖ ប្រទេសនៅលើពិភពលោកកំពុងតែរៀបចំនូវផែនការនិងយុទ្ធសាស្ត្ររៀងខ្លួនក្នុងការស្ដារសេដ្ឋកិច្ចរបស់ខ្លួនឡើងវិញក្រោយវិបត្តិកូវីដ១៩ បន្ទាប់ពីវិបត្តិនេះបានទាញទំលាក់របស់ប្រទេសនីមួយៗ ធ្លាក់ចុះជាអវិជ្ជមាន ក្នុងនោះកម្ពុជាក៏បានត្រៀមរៀបចំនូវផែនការនិងគ្រោងដាក់ចេញដើម្បីស្ដារសេដ្ឋកិច្ចរបស់ខ្លួនសម្រាប់ឆ្នាំ២០២១ទៅឆ្នាំ២០២៣ ។
យោងតាមប្រសាសន៍សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីក្នុងសន្និសីទអន្តរជាតិលើកទី២៦ ស្ដីពីអនាគតរបស់អាស៊ីតាមវីដេអូអនឡាញនៅថ្ងៃទី២០ ឧសភា២០២១នេះថា រាជរដ្ឋាភិបាលកម្ពុជាបាននិងកំពុងរៀបចំ ហើយគ្រោងនឹងដាក់ចេញនូវផែនការស្ដារសេដ្ឋកិច្ចឡើងវិញ ពីវិបត្តិកូវីដ១៩ សម្រាប់ឆ្នាំ២០២១-២០២៣ ក្នុងគោលបំណងអូសទាញកំនើនសេដ្ឋកិច្ចឱ្យត្រលប់ទៅខិតជិតកំណើនសក្ដានុពលប្រកបដោយចីរភាព និងបិរយាបន្នកម្ម តាមរយៈការធានារក្សានូវសន្តិភាព សន្តិសុខ ស្ថិរភាពសង្គមនិងសណ្ដាប់ធ្នាប់សាធារណៈ លើគន្លងនៃប្រក្រតីភាពថ្មី ព្រមទាំងការលើកកម្ពស់ភាពប្រកួតប្រជែង និងជំរុញការធ្វើពិពិធកម្មសេច្ឋកិច្ចជាពិសេសមូលដ្ឋានឧស្សាហកម្មរឹងមាំដែលមានសមត្ថភាព នាំចេញខ្ពស់និងផ្សាភ្ជាប់កាន់តែខ្លាំងក្លាជាមួយច្រវ៉ាក់ផ្គត់ផ្គង់តំបន់និងពិភពលោក ។
សម្ដេចមានប្រសាសន៍ថា លើមូលដ្ឋានទាំងនេះ កម្ពុជានឹងផ្ដល់អាទិភាពលើការ ស្ដារឡើងវិញ ដោយកសាងមូលដ្ឋានរឹងមាំសម្រាប់សេដ្ឋកិច្ចវិលទៅមាគ៌ានៃកំណើនឡើងវិញ ដោយផ្ដោតលើការធានាសុវត្ថិភាពការគ្រប់គ្រងផលប៉ះពាល់ ការរក្សាលំនឹង និងការជំរុញឱ្យងើបឡើងវិញនៃធុរកិច្ចដែលមានសក្ដានុពលជាពិសេស ក្នុងវិស័យដែលទទួលរងផលប៉ះពាល់ខ្លាំង និងការបង្កើតការងារបន្ថែមឱ្យបានច្រើននិងឆាប់រហ័ស។ ការងារអាទិភាពមួយទៀត គឺកែទម្រង់ដោយបន្តការដាក់ចេញវិធានការកែតម្រង់ ដោយបន្តដាក់ចេញវិធានការកែទម្រង់សំខាន់ៗជារចនាសម្ព័ន្ធដែលមានរួមមានការធ្វើឱ្យប្រសើរឡើងវិញនូវបរិយាកាស និងកិច្ចសម្រួលពាណិជ្ជកម្ម ការវិនិយោគនិងធុរកិច្ច និងការជំរុញ ការអភិវឌ្ឍឌីជីថលរួបនីយកម្មក្នុងប្រព័ន្ធសេដ្ឋកិច្ច ទាំងវិស័យសាធារណៈ និងវិស័យឯកជន ។
សម្ដេចបន្ថែមថា ការងារអាទិភាពមួយទៀត គឺការកសាងភាពធន់ ដោយពង្រឹងការត្រៀមខ្លួន និងការឆ្លើយតបទៅនឹងជំងឺ ឬស្ថានភាពស្រដៀងគ្នា ដែលអាចផ្ទុះឡើងនាពេលអនាគត ដោយផ្ដោតលើការអភិវឌ្ឍប្រព័ន្ធសុខភាព និងប្រព័ន្ធគាំពារសង្គម ដែលរឹងមាំ មានប្រសិទ្ធភាពនិងការធានានូវចីរភាព និងបរិយាប័ន្នកម្មនៃការស្ដារនិងការអភិវឌ្ឍសេដ្ឋកិច្ចសង្គម ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ