កម្មករ កម្មការិនីរោងចក្រ ឃែនធើរេន អឹភែរឹល ខេមបូឌា ធ្វើបាតុកម្មបិទផ្លូវវ៉េងស្រេងជាង១ម៉ោង
- ភ្នំពេញ
រាជធានីភ្នំពេញ ៖ កម្មករ-កម្មការិនីរោងចក្រកាត់ដេរសម្លៀកបំពាក់យីហោ«ឃែនធើរេន អឹភែរឹល ខេមបូឌា» ដែលមានទីតាំង
រាជធានីភ្នំពេញ ៖ កម្មករ-កម្មការិនីរោងចក្រកាត់ដេរសម្លៀកបំពាក់យីហោ«ឃែនធើរេន អឹភែរឹល ខេមបូឌា» ដែលមានទីតាំងស្ថិតនៅក្នុងភូមិត្រពាំងថ្លឹងទី៣ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បានស្នើរសុំឲ្យថៅកែបើកប្រាក់ឈ្នួលជូន ។ ប៉ុន្តែដោយសារតែថៅកែមិនអើពើ ទើបនៅវេលាម៉ោង១២ថ្ងៃត្រង់ថ្ងៃទី២០ ខែឧសភា ឆ្នាំ២០២១ កម្មករទាំងនោះបានលើកគ្នាឈរបិទផ្លូវវ៉េងស្រេងបង្កឲ្យមានការកកស្ទះចរាចរណ៍ជាង១ម៉ោង ។រហូតដល់មានការសម្របសម្រួលពីសំណាក់អភិបាលរងខណ្ឌពោធិ៍សែនជ័យ២រូបទើបពួកគាត់ព្រមដកថយវិលចូលរោងចក្ររង់ចាំការដោះស្រាយជាក្រោយ។
កម្មករបាននិយាយថា រោងចក្រកាត់ដេរសម្លៀកបំពាក់យីហោ«ឃែនធើរេន អឹភែរឹល ខេមបូឌា»នេះមានកម្មករ កម្មការិនីបម្រើការងារសរុបចំនួនជាង៥០០នាក់ ហើយនេះគឺជាលើកទី២ហើយដែលពួកគាត់ធ្វើបាតុកម្មដោយនាំគ្នាបិទផ្លូវបែបនេះ ។ ដែលកាលពីប៉ុន្មានខែមុនបានកើតឡើងម្ដងរួចមកហើយ ដោយឡែកនៅពេលនេះកើតឡើងម្ដងទៀត ហើយមូលហេតុដែលពួកគាត់ធ្វើបាតុកម្មនេះគឺដើម្បីទាមទារឲ្យថៅកែបើកប្រាក់ឈ្នួលឲ្យពួកគាត់។
តាមប្រភពដដែលបានបន្តឲ្យដឹងទៀតថា ពួកគាត់ទាមទារប្រាក់ឈ្នួលនៅក្នុងខែមេសា ឆ្នាំ២០២១ ដោយខណៈនោះពួកគាត់ធ្វើការបានជិត២០ថ្ងៃទៅហើយ ស្រាប់តែមានការផ្ទុះឡើងខ្លាំងនូវជម្ងឺCOVID-19 ហើយរោងចក្រក៏ត្រូវបានផ្អាកដំណើរការជាបណ្ដោះអាសន្នដើម្បីទប់ស្កាត់ការឆ្លងរាលដាលជម្ងឺនេះ ។ ប៉ុន្តែតាមច្បាប់ការងារពួកគាត់ត្រូវទទួលបានប្រាក់ឈ្នួល ផ្ទុយទៅវិញរហូតមកដល់ពេលនេះនៅពុំទាន់បានប្រាក់ឈ្នួលក្នុងខែមេសានេះនៅឡើយ ខណៈដែលពួកគាត់កំពុងត្រូវការប្រាក់ចាយវាយផ្សេងៗជាចាបាច់បំផុត ។ដោយសារតែបែបនេះទើបពួកគាត់ធ្វើការស្នើរសុំឲ្យថៅកែជួយបើកប្រាក់ឲ្យ ប៉ុន្តែមិនបានដូចបំណង ទើបពួកគាត់សម្រេចនាំគ្នាធ្វើបាតុកម្មបិទផ្លូវទាំងបង្ខំចិត្តដើម្បីពន្លឿនឲ្យមានការការដោះស្រាយ។
តាមប្រភពព័ត៌មានបានឲ្យដឹងថា មុនដំបូងកម្មករ កម្មការិនីខាងលើបានបិទផ្លូវតែក្នុងគន្លងផ្លូវខាងទិសដៅចេញពីរាជធានីភ្នំពេញ ដែលបានបង្កឲ្យមានការកកស្ទះចរាចរណ៍តែម្ខាងប៉ុណ្ណោះ ។ លុះក្រោយមកក៏ឈានទៅបិទគន្លងផ្លូវចូលរាជធានីភ្នំពេញម្ខាងទៀត ទើបបង្កឲ្យមានការកកស្ទះទាំងសងខាងរយៈពេលជាង១ម៉ោង ហើយពេលនោះមានអភិបាលរងខណ្ឌពោធិ៍សែនជ័យ២រូបចុះទៅធ្វើការសម្របសម្រួលជាមួយកម្មករ ទើបក្រុមកម្មករព្រមដកថយចូលរោងចក្រវិញរង់ចាំការដោះស្រាយ ហើយចរាចរណ៍បានដំណើរការរលូនឡើងវិញ៕
ចែករំលែកព័តមាននេះ