ខេត្តស្វាយរៀង ៖ កម្លាំសមត្ថកិច្ចនគបាលស្រុកស្វាយជ្រំ បានចាប់ខ្លួនក្មេងទំនើង២នាក់ ដែលរពឹសដៃ បានធ្វើសកម្មភាពដកបង្គោលសុវត្ថិភាពនៅទីសាធារណៈ ស្ថិតនៅឃុំអង្គតាសូរ បញ្ជូនទៅតុលាការ នៃសាលាដំបូងខេត្តស្វាយរៀង ចាត់ការតាមនីតិវិធី…
ខេត្តស្វាយរៀង ៖ កម្លាំសមត្ថកិច្ចនគបាលស្រុកស្វាយជ្រំ បានចាប់ខ្លួនក្មេងទំនើង២នាក់ ដែលរពឹសដៃ បានធ្វើសកម្មភាពដកបង្គោលសុវត្ថិភាពនៅទីសាធារណៈ ស្ថិតនៅឃុំអង្គតាសូរ បញ្ជូនទៅតុលាការ នៃសាលាដំបូងខេត្តស្វាយរៀង ចាត់ការតាមនីតិវិធី លោកចៅក្រមបានចេញដីកាឃុំខ្លួនបណ្តោះអាសន្ន នៅពន្ធនាគារខេត្តស្វាយរៀងរួចហើយ ។
លោកអធិការនគរបាលស្រុកស្វាយជ្រំ សោម សុភណ្ឌ័ បានឲ្យដឹងថា កាលពីថ្ងៃទី០៦ ខែកក្កដា ឆ្នាំ២០២៥ កម្លាំងប៉ុស្តិ៍នគរបាលរដ្ឋបាលអង្គតាសូ ស្រុកស្វាយជ្រំ បានទទួលព័ត៌មានពីប្រជាពលរដ្ឋថា មានក្មេងទំនើងចំនួន០២នាក់ មិនស្គាល់អត្តសញ្ញាណ ជិះម៉ូតូ០១គ្រឿង ឌុបគ្នាមកដល់ចំណុចលើផ្លូវភ្លឺប្រឡាយ ស្ថិតនៅភូមិបឹងគ្រៀល ឃុំអង្គតាសូ ស្រុកស្វាយជ្រំ បានឈប់ម៉ូតូ ពេលនោះមាន០១នាក់ បានដើរទៅកាច់បង្កោលថ្មសុវត្ថិភាព (បង្គោលសញ្ញាផ្លូវគ្រោះថ្នាក់) នៅលើភ្លឺប្រឡាយ អោយបាក់រួចហើយជិះម៉ូតូគេចខ្លួនបាត់ និងបានបង្ហោះវីដេអូ និងរូបភាព តាមបណ្តាញសង្គមហ្វេសប៊ុក និង Tiktok ។
ក្រោយពីទទួលបានព័ត៌មានហើយ កម្លាំងជំនាញស្រុក ដឹកដោយរូបលោក ជាអធិការនគរបាលស្រុកស្វាយជ្រំ សហការជាមួយកម្លាំងប៉ុស្តិ៍នគរបាលរដ្ឋបាលអង្គតាសូ និងកម្លាំងប៉ុស្តិ៍នគរបាលរដ្ឋបាលក្រោលគោ ចុះធ្វើការស្រាវជ្រាវដល់កន្លែងកើតហេតុ រហូតដល់ថ្ងៃទី១៤ ខែកក្កដា ឆ្នាំ២០២៥ បានឃាត់ខ្លួនក្មេងទំនើងទាំង០២នាក់ រួមមាន ៖
១. ឈ្មោះ រ.វ.រ ភេទប្រុស អាយុ ១៥ឆ្នាំ មុខរបរសិស្ស
២. ឈ្មោះ ស រ.គ.ព.ធ ភេទប្រុស អាយុ ១៥ឆ្នាំ មុខរបរសិស្ស
ទាំង០២នាក់ មានទីលំនៅភូមិបន្លាស្អិត ឃុំក្រោលគោ ស្រុកស្វាយជ្រំ ខេត្តស្វាយរៀង ។
នៅចំពោះមុខសមត្ថកិច្ច ក្មេងទំនើងទាំង០២នាក់ បានឆ្លើយសារភាពថា ខ្លួន និងបក្ខពួក ពិតជាបានប្រព្រឹត្តសកម្មភាពដកបង្គោលនៅលើភ្លឺប្រឡាយ ខាងលើពិតប្រាកដមែន ។
ដោយមានឯកភាពពីលោកឧត្តមសេនីយ៍ទោ ស្នងការនគរបាលខេត្ត និងលោកព្រះរាជអាជ្ញា នៃអយ្យការអមសាលាដំបូងខេត្ត សមត្ថកិច្ចជំនាញ បានកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធីច្បាប់ និងត្រូវបានសាលាដំបូងខេត្ត ចេញដីកាឃុំខ្លួនក្នុងពន្ធនាគារខេត្តរួចហើយ នៅថ្ងៃ១៧ កក្កដានេះ ៕
ចែករំលែកព័តមាននេះ