រាជធានីភ្នំពេញ ៖ ដោយមើលឃើញថាស្ថានភាពឆ្លងថ្មីនៃកូវីដ១៩ នៅក្នុងរាជធានីភ្នំពេញ អាជ្ញាធររាជធានីបានបែងចែកតំបន់តែពីរប៉ុណ្ណោះ គឺតំបន់លឿង និងលឿងទុំ និងគ្មានតំបន់ក្រហមទៀតនោះឡើយ ។
យោងតាមសេចក្តីសម្រេចរបស់សាលារាជធានីភ្នំពេញ ក្នុងការដាក់វិធានការដើម្បីទប់ស្កាត់ការឆ្លងរាលដាលកូវីដ១៩ បានឱ្យដឹងថា ក្នុងភូមិសាស្ត្ររាជធានីភ្នំពេញ បែងចែកតែពីរតំបន់មានតំបន់លឿងទុំ ដែលសំដៅដល់ភូមិសាស្ត្រដែលមានការរាលដាលកម្រិតមធ្យម ក្នុងសហគមន៍ និងតំបន់លឿង សំដៅដល់ភូមិសាស្ត្រដែលមានការឆ្លងរាលដាលនៃជំងឺកូវីដ១៩កម្រិតស្រាលក្នុងសហគមន៍ ។
ក្នុងសេចក្តីសម្រេចនេះបានឱ្យដឹងថា សម្រាប់តំបន់លឿងទុំ មាន ៖
-ផ្នែកខ្លះនៃភូមិ ដើមចាន ក្នុងសង្កាត់ច្បារអំពៅទី២ ខណ្ឌច្បារអំពៅ
-ភូមិ២៣ នៃសង្កាត់បឹងកក់ទី២ខណ្ឌទួលគោក ភូមិត្រពាំងថ្លឹង១ ត្រពាំងថ្លឹង២ ភូមិត្រពាំងថ្លឹង៤ និងភូមិទួលពង្រនៃសង្កាត់ចោមចៅទី១ខណ្ឌពោធិ៍សែនជ័យ។
ផ្នែកខ្លះនៃភូមិចុងខ្សាច់ និងផ្នែកខ្លះនៃភូមិបាក់ទូក សង្កាត់ទួលសង្កែទី១ខណ្ឌឬស្សីកែវ ៖
-ផ្នែកខ្លះនៃភូមិ៥សង្កាត់ស្ទឹងមានជ័យទី២ និងផ្នែកខ្លះនៃភូមិដំណាក់ធំ២ ផ្នែកខ្លះនៃភូមិដំណាក់ធំ៣ ផ្នែកខ្លះនៃភូមិទ្រា សង្កាត់ស្ទឹងមានជ័យទី៣នៃខណ្ឌមានជ័យ ។ ក្រៅពីភូមិសាស្ត្រទាំងនេះ សាលារាជធានីភ្នំពេញ បានកំណត់ជាតំបន់លឿង ។
ក្នុងសេចក្តីសម្រេចបានបញ្ជាក់ថា វិធានការរដ្ឋបាលសម្រាប់អនុវត្តន៍ចំពោះតំបន់លឿងទុំនឹងត្រូវអនុវត្តន៍រយៈពេល៧ថ្ងៃ ពីថ្ងៃទី ២០ដល់ថ្ងៃទី២៦ខែឧសភា២០២១ ហើយវិធានការរដ្ឋបាលសម្រាប់តំបន់លឿងនឹងត្រូវអនុវត្តន៍រយៈពេល១៤បន្តទៀតពីថ្ងៃទី២០ខែឧសភា ដល់ថ្ងៃទី ២ខែមិថុនា ឆ្នាំ២០២១ ៕
ចែករំលែកព័តមាននេះ