បន្ទាប់ពីអាជ្ញាធររាជធានីភ្នំពេញ បានសម្រេចផ្អាកជាបណ្តោះអាសន្នចំពោះផ្សារររដ្ឋតូចធំ និងផ្សារមិនរៀបរយទាំងអស់ក្នុងរាជធានីភ្នំពេញ គេសង្គេតឃើញថា បងប្អូនអាជីវករលក់ដូរបន្លែផ្លែឈើ និងម្ហូបអាហារមួយចំនួនធំ
រាជធានីភ្នំពេញ ៖ បន្ទាប់ពីអាជ្ញាធររាជធានីភ្នំពេញ បានសម្រេចផ្អាកជាបណ្តោះអាសន្នចំពោះផ្សារររដ្ឋតូចធំ និងផ្សារមិនរៀបរយទាំងអស់ក្នុងរាជធានីភ្នំពេញ គេសង្គេតឃើញថា បងប្អូនអាជីវករលក់ដូរបន្លែផ្លែឈើ និងម្ហូបអាហារមួយចំនួនធំបានយកដងផ្លូវសាធារណៈជាទីតាំងលក់ដូរជំនួសវិញ ដោយសារតែកត្តាពុំមានកន្លែងលក់ដូរ ។
ជាក់ស្តែង នៅវេលាទាបភ្លឺថ្ងៃទី១៩ ខែឧសភា ឆ្នាំ២០២១នេះ គេសង្គេតឃើញបងប្អូនប្រជាពលរដ្ឋជាអាជីវករលក់ដូរបន្លែ និងម្ហូបអាហារជាច្រើន ដែលភាគច្រើនជាអាជីវករផ្សារច្បារអំពៅ បានយកកំណាត់ផ្លូវជាតិលេខ១ ធ្វើជាទីតាំងសម្រាប់លក់ ដោយដាក់លក់ប្របសងខាងផ្លូវតែម្តង ហើយការដាក់លក់នោះ គឺលក់គិតចាប់ពីចំណុចគល់ស្ពានព្រះមុន្នីវង្សត្រើយខាងកើត រហូតដល់ចំណុចស្តុបវត្តនិរោធ ស្ថិតក្នុងទឹកដី នៃខណ្ឌច្បារអំពៅ ។
ទន្ទឹមនឹងការលក់ដូរនោះ គេក៏សង្គេតឃើញមានវត្តមានបងប្អូនពលរដ្ឋពលរដ្ឋជាច្រើនរស់នៅក្បែរតំបន់ខាងលើ បាននាំគ្នាទៅទិញបន្លែ និងម្ហូបអាហារជាបន្តបន្ទាប់ ធ្វើអោយបណ្តោយផ្លូវជាតិលេខ១ មើលទៅហាក់មានមនុស្សយ៉ាងសន្ធប់ ដូចការដាក់ការដើរទិញម្ហូបអាហារនៅក្នុងផ្សារអញ្ចឹង ។
តាមប្រភពព័ត៌មាន ពីបងប្អូនក្រុមអាជីវករ អោយដឹងថា ៖ ពួកគាត់មិនចង់ដាក់លក់ដូរនៅលើដងផ្លូវសាធារណៈនោះទេ ប៉ុន្តែដោយសារពុំមានកន្លែងត្រូវលក់ ព្រោះទីតាំងលក់ដូររបស់ពួកគេ គឺស្ថិតក្នុងផ្សារ ហើយផ្សារត្រូវអាជ្ញាធរសម្រេចបិទជាបណ្តោះអាសន្នមិនទាន់មានការបើកអោយលក់ដូរវិញឡើយ ចឹងហើយប្រសិនបើការលក់ដូរនៅលើដងផ្លូវបន្តិចបន្តួចមិនអនុញ្ញាត្តិអោយពួកគាត់លក់ តើពួកគាត់ទៅរកអ្វីបានដើម្បីចិញ្ចឹមជីវិត? ក៏ដូចជាចិញ្ចឹមគ្រួសារទាំងមូល ។
ក្រុមអាជីវករបន្តថា កន្លងទៅ កាលពីមានការបិទខ្ទប់ភូមិសាស្ត្ររាជធានីភ្នំពេញ ដើម្បីទប់ស្កាត់ការរីករាលដាលនូវជំងឺកូវីដ១៩ រយៈពេល១ខែកន្លងទៅ គឺពួកគាត់មិនបានលក់ដូរដើម្បីរកលុយកាក់ចិញ្ចឹមគ្រួសារឡើយ លុះពេលបញ្ចប់ការបិទខ្ទប់ហើយនោះ បែរជាត្រូវផ្អាកផ្សារជាបណ្តោះអាសន្នវិញម្តងទៀត ជាហេតុធ្វើអោយពួកគាត់ដែលជាអាជីវករជួបផលលំបាកណាស់ជាមួយនឹងការមិនបានលក់ដូរ ប៉ះពាល់ចរន្តប្រាក់ចំណូលប្រចាំថ្ងៃ ដើម្បីចិញ្ចឹមគ្រួសារជាខ្លាំង ។
សូមបញ្ជាក់ថា ជុំវិញការលក់ដូរខាងលើ ក្រឡេកទៅមើលពីការការពារលើវិធានសុខាភិបាល ដើម្បីទប់ស្កាត់ការរីករាលដាល នៃជំងឺកូវីដ១៩វិញ ឃើញថា ទាំងបងប្អូនអាជីវករលក់ដូរ និងបងប្អូនប្រជាពលរដ្ឋដែលទៅទិញ គឺសុទ្ធតែពាក់ម៉ាស់ការពារគ្រប់ៗគ្នា ប៉ុន្តែចំពោះការរក្សានូវគម្លាតសុវត្ថិភាពវិញ គឺពុំបានគោរពអោយបានត្រឹមត្រូវល្អឡើយ ពោលគឺការដាក់លក់ គឺលក់នៅកៀកៗគ្នា ហើយពលរដ្ឋដែលទៅទិញភាគច្រើន ក៏នៅកៀកបង្កើយគ្នាជាមួយអ្នកទៅទិញដូចគ្នា ក៏ដូចជានៅលឪកជាមួយអ្នកលក់ជាដើម ។
ដោយឡែកចំពោះ ការបាញ់អាលកុលវិញ ឃើញថា បងប្អូនអាជីវករ និងពលរដ្ឋអ្នកទៅទិញមួយចំនួនមាននៅហ្នឹងខ្លួនសម្រាប់បាញ់សម្លា.ប់មេរោគ ហើយអ្នកខ្លះក៏ពុំមាននៅជាប់នឹងខ្លួនដើម្បីបាញ់ផងដែរ ។ កត្តាដែលមិនបានចូលរួមគោរពនូវវិធានសុខាភិបាលខាងលើ គឺងាយណាស់ក្នុងការឆ្លងពីមនុស្សម្នាក់ទៅមនុស្ស ក្នុងករណីប្រសិនបើមានបុគ្គលណាម្នាក់កើតមាននូវជំងឺកូវីដ១៩នោះ ខណៈដែលបច្ចុប្បន្ននេះ ជំងឺនេះនៅតែជាជំងឺដ៏គួរអោយខ្លាច និងជាជំងឺធ្ងន់ធ្ងរប៉ះពាល់ដល់សង្គមជាតិទាំងមូល ។
ជុំវិញការលក់ដូរនៅលើកំណាត់ផ្លូវជាតិលេខ១ខាងលើ គេសង្គេតឃើញថា ការលក់គឺចន្លោះចាប់ពីម៉ោង៤ទាបភ្លឺ រហូតដល់ម៉ោង៦និង៣០នាទីព្រឹកតែប៉ុណ្ណោះ លុះចាប់ពីម៉ោងនេះទៅគឺបងប្អូនអាជីវករបានរើរចេញពីលើដងផ្លូវជាតិដោយឯកឯង ព្រោះវេលានោះក្រុមសមត្ថកិច្ចដែនដីមិនអនុញ្ញាត្តិអោយមានជាការលក់ដូរនៅលើដងផ្លូវឡើយ ព្រោះប៉ះពាល់សណ្តាប់ធ្នាប់នៅលើដងផ្លូវជាតិ ម្យ៉ាងវេលានោះជាវេលារដ្ឋបាលដែលបងប្អូនប្រជាអ្នកដំណើរមានការចរាចរណ៍ធ្វើដំណើរឆ្លងកាត់ទៅមកច្រើនផងដែរ បើបន្តអោយមានការលក់ដូរនឹងបង្កជាការកកកុញស្ទះដល់លំហូរចរាចរណ៍ជាក់ជាមិនខានឡើយ ។
គួររំលឹកថា អាជ្ញាធររាជធានីភ្នំពេញ បានចេញសេចក្តីសម្រេចបន្តការផ្អាកដំណើរការបណ្តោះអាសន្នផ្សាររដ្ឋ និងផ្សារមិនរៀបរយទាំងអស់នៅក្នុងភូមិសាស្ត្ររាជធានីភ្នំពេញ រយៈពេល៧ថ្ងៃគិតចាប់ពីម៉ោងសូន្យ ថ្ងៃទី១៥ ខែឧសភា ឆ្នាំ២០២១ ដល់ថ្ងៃទី២១ ខែឆ្នាំដដែល បន្ទាប់ពីកន្លងទៅ អាជ្ញាធរធ្លាប់បានចេញសេចក្តីសម្រេចផ្អាកជាបណ្តោះអាសន្នម្តងរួចមកហើយដែលមានសុពលភាព៧ថ្ងៃដូចគ្នា ពោលគឺកាលពីថ្ងៃទី៨ឧសភា ដល់ថ្ងៃទី១៤ឧសភា ។
យ៉ាងណាមិញ សេចក្តីសម្រេចផ្អាកដំណើរការជាបណ្តោះអាសន្នផ្សាររដ្ឋ និងផ្សារមិនរៀបរយ ខាងលើ គឺនៅសល់តែរយៈពេល២ថ្ងៃទៀតប៉ុណ្ណោះ នឹងត្រូវបានបញ្ចប់ ប៉ុន្តែទន្ទឹមនឹងនោះ គេនៅពុំទាន់ដឹងថា អាជ្ញាធររាជរធានីភ្នំពេញ នឹងសម្រេចបន្តផ្អាកជាបណ្តោះអាសន្នបន្តទៀតដដែល ឬបើកអោយផ្សារដំណើរការវិញធម្មតា ឬយ៉ាងណាអោយប្រាកដឡើយ ពោលគឺត្រូវរងចាំសេចក្តីសម្រេចជាថ្មីរបស់អាជ្ញាធរជាមុនសិន ៕
ចែករំលែកព័តមាននេះ