ខេត្តសៀមរាប ៖ នៅថ្ងៃទី០១ វិច្ឆិកា ២០១៥នេះ ក្រុមគ្រូពេទ្យធ្មេញស្ម័គ្រចិត្តអង្គការមួយសម្រាប់មួយកម្ពុជា ដឹកនាំដោយលោកជំទាវឧត្តមសេនីយ៍ឯក តុប សារ៉ន អគ្គនាយករងអគ្គនាយកដ្ឋានភស្តុភា ហិរញ្ញវត្ថុនៃក្រសួងការពារជាតិ អមដំណើរដោយលោកឧត្តមសេនីយ៍ឯក ទេព សំអាន អគ្គនាយករង អគ្គនាយកដ្ឋានភស្តុភាហិរញ្ញវត្ថុ និងជាសមាជិកក្រុមការងារថ្នាក់ជាតិចុះជួយខេត្តសៀមរាប រួមទាំងឯកឧត្តម លោកជំទាវ អស់ លោក លោកស្រី បានចុះព្យាបាលជម្ងឺធ្មេញជូនប្រជាពលរដ្ឋនៅមន្ទីរពេទ្យយោធភូមិភាគទី៤ខេត្តសៀមរាប ។
តាមការបញ្ជាក់របស់លោក លី ហ៊ុយ ប្រធានអង្គការមួយសម្រាប់មួយកម្ពុជាបានឲ្យដឹងថា ក្នុងរយៈពេល១១ឆ្នាំមកនេះ អង្គការរបស់លោកបានរួមសហការជាមួយសុខាភិបាលក្រសួងការពារជាតិ ជាពិសេសលើការងារព្យាបាលជម្ងឺធ្មេញជូនប្រជាពលរដ្ឋនៅតាមបណ្តាខេត្តមានរយៈពេល៧ឆ្នាំមកហើយ ។
ក្នុងការព្យាបាលជម្ងឺធ្មេញនេះ ដោយមានក្រុមគ្រួពេទ្យជំនាញមកពីប្រទេសអង់គ្លេស, អូស្ត្រាលី , អាល្លឺម៉ង់ និងជប៉ុន រួមនិងក្រុមគ្រូពេទ្យកម្ពុជា ដោយព្យាបាលក្នុងមួយថ្ងៃបាន២០០នាក់ ។
មានប្រសាសន៍សំណេះសំណាលនោះ លោកជំទាវឧត្តមសេនីយ៍ឯក តុប សារ៉ន និង លោកឧត្តមសេនីយ៍ឯក ទេព សំអាន បានបញ្ជាក់ថា ការធ្វើអនាម័យមាត់ធ្មេញ គឺជាកត្តាចំបងដែលមនុស្សយើងគ្រប់រូប ដែលត្រូវយកចិត្តទុកដាក់ខ្ពស់ឲ្យបានជាប្រចាំថ្ងៃ ដូច្នេះសុខភាព គឺជាកត្តាដ៏សំខាន់បំផុតសម្រាប់មនុស្សជាតិគ្រប់រូបក្នុងការអនុវត្តន៍របៀបរស់នៅប្រកបដោយសុខុុមាលភាពរបស់យើងគ្រប់រូប៕
ចែករំលែកព័តមាននេះ