ខេត្តកំពង់ឆ្នាំង ៖ ផ្ទះឈើ២ខ្នងត្រូវបានអគ្គិភ័យឆាបឆេះ បណ្ដាលឱ្យរងការខូចខាតយ៉ាងដំណំ ។ ហេតុការណ៍នេះ បានកើតឡើងនៅវេលាម៉ោង៣និង៣០នាទីរសៀល ថ្ងៃទី១៧ ខែឧសភា ឆ្នាំ២០២១ នៅចំណុចភូមិចក ឃុំច្រេស ស្រុកកំពង់ត្រឡាច ។
បើយោងតាមសមត្ថកិច្ចនគរបាលស្រុកកំពង់ត្រឡាចបានអោយដឹងថា ផ្ទះដែលរងការខូចខាតទាំង២ខ្នងខាងលើនេះ មាន ៖
ផ្ទះទី១- មានទំហំ៧គុណនឹង៩ម៉ែត្រ ធ្វើអំពីឈើខាងលើថ្មខាងក្រោម ប្រក់ដំបូលស៊ីប្រូ ដែលមានម្ចាស់ផ្ទះឈ្មោះ ប៉ែន សាវ៉េត ភេទស្រី អាយុ៥២ឆ្នាំ រងការឆេះទាំងស្រុង ក្នុងនោះបានរងការខូចខាតម៉ូតូ១គ្រឿង ស្រូវ២តោនកន្លះ ម៉ាស៊ីនបូមទឹក៣គ្រឿង និងសម្ភារៈក្នុងផ្ទះជាច្រើនទៀត ។
ចំណែកផ្ទះទី២- មានទំហំ៨គុណនឹង៥ម៉ែត្រ ធ្វើអំពីឈើប្រក់ក្បឿង ជារបស់ជនរងគ្រោះឈ្មោះ សោម ជន បានរងការខូចខាតឆេះអស់ជញ្ជាំងអស់មួយចំហៀង ។
សមត្ថកិច្ចបន្តទៀតថា ក្នុងពេលអគ្គិភ័យឆាបឆេះឡើងនេះ រថយន្តពន្លត់អគ្គិភ័យរបស់អធិការនគរបាលស្រុកកំពង់ត្រឡាច បានចេញជួយអន្តរាគមន៍ ទើបមិនរាលដាលទៅផ្ទះអ្នកជិតខាងថែមទៀត ។ ចំពោះមូលហេតុ សមត្ថកិច្ចបានអះអាងថា គឺបណ្ដាលមកពីឆ្លងចរន្តអគ្គិសនី ។ ទោះយ៉ាងណា ក្នុងហេតុការណ៍ខាងលើ ពុំមាននរណាម្នាក់រងរបួសក្នុងហេតុការណ៍នោះអគ្គិភ័យឡើយ ៕
ចែករំលែកព័តមាននេះ