ប្រទេសសិង្ហបុរី ៖ អាកាសយានដ្ឋានអន្តរជាតិ Changi ដ៏ល្បីរបស់ប្រទេសសិង្ហបុរី បានទទួលអ្នកដំណើរចេញចូលចំនួន ៧០ លាននាក់ នៅឆ្នាំ ២០២៥…
ប្រទេសសិង្ហបុរី ៖ អាកាសយានដ្ឋានអន្តរជាតិ Changi ដ៏ល្បីរបស់ប្រទេសសិង្ហបុរី បានទទួលអ្នកដំណើរចេញចូលចំនួន ៧០ លាននាក់ នៅឆ្នាំ ២០២៥ ដែលជាចំនួនកំណត់ត្រាខ្ពស់បំផុតមិនធ្លាប់ពីមុន។ យោងតាមការចុះផ្សាយរបស់សារព័ត៌មានសិង្ហបុរី The Straits Times កាលពីថ្ងៃទី៥ ខែមករា ឆ្នាំ២០២៦។
តួលេខថ្មីៗនេះ បានបំបែកកំណត់ត្រាខ្ពស់បំផុត ៦៨,៣ លាននាក់ នៅឆ្នាំ ២០១៩ មុនពេលការធ្វើដំណើរតាមផ្លូវអាកាសទូទាំងពិភពលោកត្រូវបានរំខាន ដោយសារតែជំងឺរឹតត្បាតកូវីដ-១៩ ខណៈដែលចំនួនអ្នកដំណើរបានងើបឡើងវិញយ៉ាងខ្លាំងរួចទៅហើយនៅក្នុថឆ្នាំ ២០២៤ នៅពេលអាកាសយានដ្ឋានដ៏ល្បីលំដាប់ពិភពលោកមួយនេះ បានទទួលអ្នកដំណើរចេញចូលចំនួន ៦៧,៧ លាននាក់។
ថ្លែងនៅថ្ងៃទី៥ ខែមករា លោក Jeffrey Siow រដ្ឋមន្ត្រីស្តីទីក្រសួងដឹកជញ្ជូនសិង្ហបុរីបានថ្លែងថា ការងើបឡើងវិញយ៉ាងខ្លាំងនៃអាកាសចរណ៍សកលបានពង្រឹងការសម្រេចចិត្តរបស់រដ្ឋាភិបាលសិង្ហបុរីបន្តការសាងសង់ស្ថានីយទី ៥ (Terminal 5) ដែលគម្រោងនេះត្រូវបានផ្អាក អំឡុងពេលមានជំងឺកូវីដ-១៩។
លោកបានបន្ថែមថា ក្រុមហ៊ុន Changi Airport Group (CAG) នឹងចាប់ផ្តើមការដេញថ្លៃ សម្រាប់គម្រោងរចនាសម្ព័ន្ធនៃស្ថានីយទី ៥ ក្នុងរយៈពេលប៉ុន្មានសប្តាហ៍ខាងមុខ។ ដោយបានកត់សម្គាល់ថា ការសម្រេចចិត្តសាងសង់ស្ថានីយទី ៥ គឺជាទំនុកចិត្តមួយលើអនាគតរបស់ប្រទេសសិង្ហបុរី និងទំនុកចិត្តលើសមត្ថភាពរបស់ខ្លួនក្នុងការធានាតំណែងអាកាសយានដ្ឋានអន្តរជាតិល្អបំផុតលើពិភពលោក ដែលមានការប្រកួតប្រជែងខ្លាំង។
តាមការព្យាករណ៍របស់លោករដ្ឋមន្ត្រីបានឱ្យដឹងថា ចរាចរណ៍ផ្លូវអាកាសសកលត្រូវបានរំពឹងថានឹងកើនឡើងទ្វេដងនៅឆ្នាំ ២០៥០។ ស្ថានីយទី ៥ ដែលគ្រោងនឹងបើកនៅពាក់កណ្តាលទសវត្សឆ្នាំ ២០៣០ មានបំណងពង្រឹងតួនាទីរបស់ប្រទេសសិង្ហបុរីជាសកល។
ស្ថានីយដ៏ធំនេះ កំពុងត្រូវបានរចនាឡើងជាមជ្ឈមណ្ឌលបច្ចេកវិទ្យាពឹងផ្អែកខ្លាំងដោយប្រព័ន្ធស្វ័យប្រវត្តិកម្ម បញ្ញាសិប្បនិម្មិត (AI) យានយន្តស្វ័យប្រវត្តិ និងមនុស្សយន្ត ដើម្បីគាំទ្រប្រតិបត្តិការដូចជា ការដោះដូរឥវ៉ាន់ និងទំនិញ។ ប្រព័ន្ធ AI ក៏ត្រូវបានរំពឹងថានឹងធ្វើឱ្យប្រសើរឡើងនូវផែនការហោះហើរ សេវាកម្មអ្នកដំណើរ និងការឆ្លើយតបនឹងការរំខានប្រតិបត្តិការ រួមទាំងបញ្ហាអាកាសធាតុធ្ងន់ធ្ងរផងដែរ។
នៅពេលបញ្ចប់ការសាងសង់ ស្ថានីយទី ៥ នឹងបង្កើនសមត្ថភាពអ្នកដំណើរសរុបរបស់អាកាសយានដ្ឋាន Changi ជាង ៥៥% ពី ៩០ លាននាក់ទៅដល់ ១៤០ លាននាក់ក្នុង១ឆ្នាំ។ ស្ថានីយនេះ នឹងត្រូវបានភ្ជាប់ទៅនឹងស្ថានីយដែលមានស្រាប់ តាមរយៈប្រព័ន្ធដឹកជញ្ជូនអ្នកដំណើរក្រោមដីថ្មីមួយ អនុញ្ញាតឱ្យអ្នកដំណើរធ្វើដំណើររវាងស្ថានីយទី ៥ និងស្ថានីយទី ២ ក្នុងរយៈពេលប្រហែល ៤ នាទីប៉ុណ្ណោះ៕
ចែករំលែកព័តមាននេះ