Nikkei Asia ៖ វៀតណាមត្រៀមខ្លួនជាស្រេច ដើម្បីវ៉ាដាច់សេដ្ឋកិច្ចរបស់ថៃ នៅឆ្នាំនេះ
បរទេស ៖ ចំពេលមានកំណើនសេដ្ឋកិច្ចកើនឡើង កាសែតជប៉ុន Nikkei Asia កាលពីថ្ងៃទី៤ ខែមករា ឆ្នាំ២០២៥ បានចេញផ្សាយថា…
បរទេស ៖ ចំពេលមានកំណើនសេដ្ឋកិច្ចកើនឡើង កាសែតជប៉ុន Nikkei Asia កាលពីថ្ងៃទី៤ ខែមករា ឆ្នាំ២០២៥ បានចេញផ្សាយថា ប្រទេសវៀតណាមកំពុងស្ថិតនៅលើផ្លូវត្រូវ ដើម្បីវ៉ាដាច់សេដ្ឋកិច្ចរបស់ប្រទេសថៃឱ្យបានឆាប់បំផុតនៅក្នុងឆ្នាំនេះ ដោយសារតែកំណើនដែលគាំទ្រដោយការវិនិយោគសាធារណៈ។
យោងតាមការប៉ាន់ស្មានរបស់កាសែតជប៉ុន Nikkei សេដ្ឋកិច្ចវៀតណាមបានកើនឡើងប្រហែល ៨ % នៅឆ្នាំ ២០២៥ ហើយរដ្ឋាភិបាលកំពុងកំណត់គោលដៅលើសពី ១០ % នៅឆ្នាំ ២០២៦ ហើយនេះជាគោលដៅ ដែលនាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានកំណត់ទុកសម្រាប់ឆ្នាំ ២០២៧ ប៉ុន្តែលោកបានហៅវាថា អាចសម្រេចបាននៅឆ្នាំ ២០២៦។
ប្រសិនបើអត្រាកំណើននេះសម្រេចបានលទ្ធផល នោះផលិតផលក្នុងស្រុកសរុប (GDP) របស់ប្រទេសវៀតណាមអាចឈានដល់ប្រហែល ៥៥០ ពាន់លានដុល្លារអាមេរិក ដែលធ្វើឱ្យប្រទេសនេះក្លាយជាប្រទេសសេដ្ឋកិច្ចធំទី៣នៅអាស៊ីអាគ្នេយ៍ បន្ទាប់ពីឥណ្ឌូណេស៊ី និងសិង្ហបុរី ជាមួយនឹងផលិតផលក្នុងស្រុកសរុបសម្រាប់មនុស្សម្នាក់ (GDP per capita) កើនលើសពី ៥ ០០០ ដុល្លារ ខិតជិតកម្រិតរបស់ប្រទេសឥណ្ឌូណេស៊ី។
កំណើនសេដ្ឋកិច្ចវៀតណាម ត្រូវបានជំរុញជាចម្បងដោយហេដ្ឋារចនាសម្ព័ន្ធ។ ចំណែកនៅឆ្នាំ ២០២៦ ការវិនិយោគសាធារណៈត្រូវបានរំពឹងថានឹងកើនឡើងប្រហែល ២៦ % ដោយនឹងរួមចំណែកប្រមាណ ១,៦ % ដល់កំណើនសេដ្ឋកិច្ច។ គម្រោងសំខាន់ៗរបស់វៀតណាម រួមមានអាកាសយានដ្ឋានថ្មីនៅជិតទីក្រុងហូជីមិញ និងផ្លូវដែកគាំទ្រដោយប្រទេសចិននៅភាគខាងជើង។ ទោះយ៉ាងណាក៏ដោយ បញ្ហាប្រឈមផ្នែកបទប្បញ្ញត្តិនៅតែមាន។ ជាក់ស្តែង គម្រោងជាង ២ ០០០ នៅក្នុងប្រទេសវៀតណាមត្រូវបានរារាំង ឬពន្យារពេលដោយឧបសគ្គផ្នែកច្បាប់ និងរដ្ឋបាល។
ក្រឡេកទៅប្រទេសថៃឯណោះវិញ នៅតែជួបការលំបាក ដោយសារតែភាពមិនប្រាកដប្រជាខាងនយោបាយក្នុងស្រុក និងភាពតានតឹងតាមព្រំដែនជាមួយនឹងប្រទេសកម្ពុជាកំពុងតែជះឥទ្ធិពលដល់សេដ្ឋកិច្ចរបស់ប្រទេសមួយនេះ។ តួយ៉ាង អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) ព្យាករណ៍កំណើនពិតប្រាកដសម្រាប់ប្រទេសថៃមានត្រឹម ១,៥ % ប៉ុណ្ណោះ សម្រាប់ឆ្នាំ ២០២៦ ដែលធ្លាក់ចុះពីឆ្នាំមុន។
ការលំបាកនេះ ក៏កើតចេញបញ្ហាបំណុលគ្រួសារខ្ពស់ កម្សោយការប្រើប្រាស់ ការងើបឡើងវិញយឺតនៃវិស័យទេសចរណ៍ និងផលប៉ះពាល់ពន្ធគយរបស់សហរដ្ឋអាមេរិកលើឧស្សាហកម្មផលិតកម្មផងដែរ៕ ដកស្រង់ ៖ Nikkei Asia, Nova News និង Khaosod
ចែករំលែកព័តមាននេះ