រាជធានីភ្នំពេញ ៖ ជនសង្ស័យ១ក្រុមមានគ្នា៤នាក់បានធ្វើសកម្មភាពលួចរថយន្ត១គ្រឿងបានសម្រេច បន្ទាប់មកបានបើកចេញគេចខ្លួនពីរាជធានីភ្នំពេញ ទៅលាក់ខ្លួននៅឯខេត្តកំពត ប៉ុន្តែនៅតែត្រូវបាននគរបាលខណ្ឌដង្កោធ្វើការស្រាវជ្រាវដឹង ក៏ចុះទៅសហការជាមួយកម្លាំងនគរបាលខេត្តកំពតឃាត់បានទាំង៤នាក់រួចនាំមកសាកសួរនិងកសាងសំណុំរឿងចាត់ការតាមច្បាប់តែម្ដង ។
ហេតុការណ៍នោះបានកើតឡើងកាលពីវេលាម៉ោង០២និង២៥នាទីយប់រំលងអធ្រាត្រថ្ងៃទី០៥ ខែមករា ឆ្នាំ២០២៦ នៅត្រង់ចំណុចមុខផ្ទះលេខ៣៥B ផ្លូវលេខ២B បុរីលឹមឈាងហាក់ ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យទាំង០៤នាក់នោះរួមមាន ១-ឈ្មោះ ឈឹម បូរ៉ា អាយុ៣៧ឆ្នាំ ជនជាតិខ្មែរ ២-ឈ្មោះ លី រ៉ាវី អាយុ២៨ឆ្នាំ ជនជាតិខ្មែរ ស្នាក់នៅសង្កាត់ច្រាំងចំរេះទី១ ខណ្ឌឬស្សីកែវ រាជធានីភ្នំពេញ ។ ៣-ឈ្មោះ ពៅ ពេជ្រ អាយុ២៧ឆ្នាំ ជនជាតិខ្មែរ ៤-ឈ្មោះ ប្រាក់ អុល អាយុ២៣ឆ្នាំ ជនជាតិខ្មែរ ស្នាក់នៅភូមិទ្រា១ សងា្កត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
ពេលឃាត់ខ្លួនជនសង្ស័យខាងលើនោះនគរបាលដកហូតបានរថយន្ត០១គ្រឿងម៉ាក Toyota Prius ពណ៌ខៀវ ស៊េរីឆ្នាំ២០០៦ ពាក់ស្លាកលេខភ្នំពេញ2BK-0148 លេខតួJTDKB20U367081254 លេខម៉ាស៊ីន1NZU051712 ។ រថយន្តនេះត្រូវបានលោកជឹម សុីថា អធិការនគរបាលខណ្ឌដង្កោ ប្រគល់ជូនម្ចាស់ឈ្មោះ គ្រី រីកូ អាយុ៤៦ឆ្នាំ មានទីលំនៅផ្ទះលេខ៣៥B ផ្លូវលេខ២B បុរីលឹម ឈាងហាក់ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញវិញហើយ។
នគរបាលបានប្រាប់ថា កាលពីថ្ងៃទី០៤ ខែមករា ឆ្នាំ២០២៦ វេលាម៉ោង២១និង៣០នាទីយប់ ជនរងគ្រោះបានទុករថយន្ត០១គ្រឿងខាងលើ នៅមុខផ្ទះដោយបានចាក់សោទ្វាររថយន្តត្រឹមត្រូវ រួចក៏បានចូលសម្រាកក្នុងផ្ទះ ។ ខណៈនោះជនសង្ស័យក៏បានធ្វើសកម្មភាពលួចយករថយន្តនោះបានសម្រេច ហើយក៏ជិះគេចខ្លួនទៅបាត់ស្រមោល ចំណែកជនរងគ្រោះបានដេកលង់លក់រហូតដល់វេលាម៉ោង០៤និង១៥នាទីជិតភ្លឺ ថ្ងៃទី០៥ ខែមករា ឆ្នាំ២០២៦ទើបភ្ញាក់ ។
នគរបាលបានប្រាប់បន្តទៀតថា ក្រោយពេលក្រោកពីដេកជនរងគ្រោះបានចេញទៅមើលរថយន្ត ស្រាប់តែបាត់មិនឃើញក៏បានទៅរាយការណ៍ប្រាប់នគរបាលប៉ុស្តិ៍ដង្កោ ឱ្យជួយអន្តរាគមន៍ស្វែងរករថយន្តរបស់ខ្លួនត្រលប់មកវិញ ។បន្ទាប់មកកម្លាំងនគរបាលប៉ុស្តិ៍ដង្កោ រួមជាមួយនគរបាលព្រហ្មទណ្ឌនៃអធិការដ្ឋាននគរបាលខណ្ឌដង្កោ ដឹកនាំដោយ លោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ និងលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានធ្វើការស្រាវជ្រាវភ្លាមៗ ។
នគរបាលខាងលើបានបញ្ជាក់ប្រាប់ថា តាមរយៈកាមេរ៉ាសុវត្ថិភាព នគរបាលបានឃើញអំពីសកម្មភាពក្រុមជនសង្ស័យចូលទៅលួចរថយន្ត១គ្រឿងនោះនៅវេលាម៉ោង០២និង២៥នាទីយប់រំលងអធ្រាត្រឈានចូលថ្ងៃទី០៥ ខែមករា ឆ្នាំ២០២៦ ។ បន្ទាប់មកនគរបាលបានស្រាវជ្រាវបន្តរហូតកំណត់បានគោលដៅដែលក្រុមជនសង្ស័យកំពុងលាក់ខ្លួន ទើបចុះទៅសហការជាមួយស្នងការដ្ឋាននគរបាលខេត្តកំពត ធ្វើការឃាត់ខ្លួនជនសង្ស័យបានទាំង០៤នាក់ខាងលើនោះ ។ មិនតែប៉ុណ្ណោះនគរបាលក៏បានដកហូតរថយន្តព្រូសដែលក្រុមនេះលួចបានមកវិញផងដែរ រួចនាំខ្លួនត្រលប់មកភ្នំពេញវិញ ដើម្បីធ្វើការសាកសួរនិងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ