ខេត្តតាកែវ ៖ ប្រជាពលរដ្ឋរស់នៅខេត្តតាកែវ បើទោះបីបានអនុវត្តទៅតាមការណែនាំរបស់ក្រសួងសុខាភិបាល ជាពិសេសបានអនុវត្តតាមវិធានការ «៣កុំ ៣ការពារ» របស់ប្រមុខរាជរដ្ឋាភិបាលយ៉ាងម៉ឺងម៉ាត់យ៉ាងណាក៏ដោយ ក៏ពី១ថ្ងៃទៅ១ថ្ងៃការរីករាលដាលនៃជំងឺកូវីដ១៩ នៅតាមស្រុកមួយចំនួនចេះតែបន្តកើនឡើងជាលំដាប់។
ហើយនៅព្រឹកថ្ងៃទី១៦ ខែឧសភា ឆ្នាំ២០២១នេះ រដ្ឋបាលសាលាខេត្តតាកែវ ក៏ដូចជាមន្ទីរសុខាភិបាលខេត្ត បានចេញលិខិតជូនដំណឹងមួយស្ដីពី មន្ត្រីជំនាញសុខាភិបាល បានធ្វើតេស្តរកឃើញអ្នកផ្ទុកជំងឺកូវីដ១៩ ចំនួន៧០នាក់ទៀតនៅថ្ងៃនេះ ។ ហើយភាគច្រើននៃអ្នកផ្ទុកមេរោគកូវីដ១៩ទាំងអស់ គឺមានទីលំនៅក្នុងស្រុកបាទី ស្រុកព្រែកប្បាស ដែលអ្នកឆ្លងជំងឺកូវីដ១៩ មានចំនួនច្រើនជាងគេបង្អស់ចំណែកស្រុកសំរោង ស្រុកអង្គរបូរី ស្រុកត្រាំកក់ មានចំនួនឆ្លងជំងឺកូវីដ១៩ តិចជាងគេ។
ហើយសេចក្ដីជូនដំណឹងរបស់រដ្ឋបាលខេត្តតាកែវ បានឲ្យដឹងថា យោងតាមលទ្ធផលនៃការវិភាគវត្ថុសំណាករកមេរោគកូវីដ១៩ នៅល្ងាចថ្ងៃទី១៥ ខែឧសភា ឆ្នាំ២០២១ នេះ បានរកឃើញអ្នកជំងឺកូវីដ១៩ថ្មី ដែលជាករណីឆ្លងនៅក្នុងសហគមន៍ចំនួន៧០នាក់។ អ្នកវិជ្ជមានជំងឺកូវីដទាំង៧០នាក់នេះ គឺជាអាជីវករ កម្មករ និងក្រុមគ្រួសារ ព្រមទាំងបងប្អូនប្រជាពលរដ្ឋ ក៏ដូចជាអ្នកពាក់ព័ន្ធនានាផងដែរ។ ដើម្បីទប់ស្កាត់ការឆ្លងរីករាលដាលជំងឺកូវីដ១៩ រដ្ឋបាលខេត្តតាកែវសូមអំពាវនាវដល់អាជីវករបងប្អូនប្រជាពលរដ្ឋ និងក្រុមគ្រួសារ ដែលធ្លាប់បានប្រាស្រ័យទាក់ទងដោយផ្ទាល់ និងប្រយោលជាមួយអ្នកវិជ្ជមានកូវីដ១៩ ខាងលើ ត្រូវបានរាយការណ៍មកអាជ្ញាធរមូលដ្ឋានជាបន្ទាន់ និងប្រញាប់រួសរាន់ទៅដល់សំណាក ដើម្បីវិភាគរកវីរុសកូវីដ១៩ នៅតាមមន្ទីរពេទ្យបង្អែក ឬមណ្ឌលសុខភាពនៅជិតផ្ទះរៀងរាល់ម៉ោងធ្វើការ ហើយត្រូវធ្វើចត្តាឡីស័កឲ្យបានត្រឹមត្រូវតាមការណែនាំរបស់ក្រសួងសុខាភិបាល ក៏ដូចជា វិធានការ «៣កុំ ៣ការពារ» របស់សម្តេចប្រមុខរាជរដ្ឋាភិបាលអោយបានល្អបំផុត។
រដ្ឋបាលខេត្តតាកែវក៏ដូចជា មន្ទីរសុខាភិបាលខេត្ត ក៏បានរួមគ្នា ធ្វើការអំពាវនាវដល់អ្នកពាក់ព័ន្ធដទៃទៀត ត្រូវតាមដានសុខភាពរបស់ខ្លួនជាប្រចាំ ត្រូវពិនិត្យកំដៅអោយបានច្រើនដងបំផុតក្នុងមួយថ្ងៃ ត្រូវសម្រាកនៅផ្ទះ ឬបន្ទប់តែឯង និងត្រូវថែរក្សាអនាម័យខ្លួនជានិច្ច។ ជាមួយគ្នាផងដែរ ត្រូវពាក់ម៉ាស់ជាប្រចាំ និងលាងដៃជាមួយអាកុល ឬសាប៊ូឱ្យបានញឹកញាប់។
ប្រធានមន្ទីរសុខាភិបាលខេត្តតាកែវ លោកវេជ្ជបណ្ឌិត នុត ស៊ីណាត បានអោយដឹងថា អ្នកផ្ទុកមេរោគកូវីដ១៩ ទាំង៧០នាក់ខាងលើ ត្រូវបានដាក់អោយសម្រាកព្យាបាលនៅមន្ទីរពេទ្យបង្អែកបាទី មន្ទីរពេទ្យបង្អែកស្រុកព្រែកប្បាសមួយចំនួន និងមួយចំនួនទៀតត្រូវបញ្ជូនមកព្យាបាលនៅមន្ទីរពេទ្យបង្អែកខេត្តតាកែវ ចំណែកអ្នកដែលជាប់ពាក់ព័ន្ធត្រូវយកមកធ្វើចត្តាឡីស័កនៅតាមសាលារៀន នៅតាមស្រុកនីមួយៗដែលនៅជិតផងដែរ។
ចែករំលែកព័តមាននេះ