ខេត្តពោធិ៍សាត់៖ រដ្ឋបាលខេត្តពោធិ៍សាត់ រសៀលថ្ងៃទី១១ ឧសភា ឆ្នាំ២០២១ បានសម្រេចបិទមន្ទីរសម្រាកព្យាបាលឯកជនចំនួន០៣កន្លែង បន្ទាប់ពីរកឃើញជាប់ពាក់ព័ន្ធជាមួយអ្នកជំងឺកូវីដ-១៩មកពីខេត្តបន្ទាយជ័យចូលសម្រាកព្យាបាលនៅទីនោះ។
លោកវេជ្ជបណ្ឌិត ច័ន្ទ សុខា ប្រធានមន្ទីរពេទ្យបង្អែកខេត្តបានអោយដឹងថា កាលពីថ្ងៃទី០២ ខែឧសភា ឆ្នាំ២០២១ ស្ត្រីឈ្មោះ ណាំ អាយុ ៦២ ឆ្នាំ និងគ្រួសារនៅខេត្តបន្ទាយមានជ័យ បានមកកាន់ខេត្តពោធិ៍សាត់ សម្រាកនៅផ្ទះប្រជាពលរដ្ឋឈ្មោះ ហួត ចន្ថា ភេទប្រុស ត្រូវជាបងបង្កើត ស្ថិតនៅភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ។
ក្នុងការស្នាក់នៅនេះ ឈ្មោះ ណាំ បានទៅមើលចំការនៅឃុំអន្លង់រាប ស្រុកវាលវែង ពេលនោះមានអាការៈមិនស្រួលខ្លួនក៏បានចូលទៅមន្ទីរសម្រាកព្យាបាលគន្វាវាលវែង ស្រុកវាលវែង ដើម្បីឲ្យគេពិនិត្យជំងឺ។ បន្ទាប់មក បានត្រឡប់មកកាន់ទីរួមខេត្តពោធិ៍សាត់វិញ ហើយបានចូលទៅមន្ទីរសម្រាកព្យាបាលលមុត សារុន ប៉ុន្តែមិនបានពិនិត្យនិងព្យាលជំងឺនៅទីនោះនោះទេ គឺមកពិនិត្យនិងព្យាបាលជំងឺនៅមន្ទីរសម្រាកព្យាបាលវឌ្ឍនៈពោធិ៍សាត់ ដែលនៅជិតគ្នានោះ ស្ថិតក្នុងភូមិពាលញែក២ សង្កាត់ផ្ទះព្រៃ ក្រុងពោធិ៍សាត់។ មិនបានប៉ុន្មានថ្ងៃផងឈ្មោះ ណាំ និងគ្រួសារបានវិលត្រឡប់ទៅកាន់ខេត្តបន្ទាយមានជ័យវិញ ហើយបានទៅពិនិត្យសុខភាពទើបដឹងថា វិជ្ជមានកូវីដ១៩តែម្ដង។
ក្រោយពីទទួលបានព័ត៌មាននេះភ្លាម រដ្ឋបាលខេត្តបានចាត់តាំងមន្ត្រីមន្ទីរសុខាភិបាលខេត្ត រដ្ឋបាលសាលាស្រុកវាលវែង រដ្ឋបាលសាលាក្រុងពោធិ៍សាត់ រួមជាមួយសមត្ថកិច្ចពាក់ព័ន្ធ ចុះទៅពិនិត្យស្ថានភាពជាក់ស្តែងនិងសម្រេចបិទទីតាំងទាំង០៣កន្លែងនោះជាបណ្តោះអាសន្ន ដើម្បីរង់ចាំលទ្ធផលសំណាកចំពោះអ្នកពាក់ព័ន្ធផ្សេងៗទៀត។
តាមរយៈនេះ លោក វេជ្ជបណ្ឌិត ច័ន្ទ សុខា បានអំពាវនាវដល់ប្រជាពលរដ្ឋដែលមានការពាក់ព័ន្ធដោយប្រយោលឬដោយផ្ទាល់ក្តី សូមអញ្ជើញមកពិនិត្យ សំណាកនៅមន្ទីរពេទ្យដែលនៅជិតផ្ទះអោយបានទាន់ពេលវេលា ។ ចៀសវាងការចម្លងរីករាលដាលនៅក្នុងក្រុមគ្រួសារនិងសហគមន៍ ព្រមទាំងអនុវត្ត ទៅតាមវិធានការ ០៣ការពារ០៣កុំរបស់ប្រមុខរាជរដ្ឋាភិបាលនិងក្រសួងសុខាភិបាលឲ្យបានខ្ជាប់ខ្ជួនជានិច្ច។
លោកឲ្យដឹងដែរថា គិតត្រឹមថ្ងៃទី១១ ឧសភា នៅខេត្តពោធិ៍សាត់មានអ្នកឆ្លងជំងឺកូវីដ១៩សរុប៣៨នាក់ ជាសះស្បើយ០៤នាក់ កំពុងសម្រាកព្យាបាល៣៤នាក់ និងមិនទាន់មានអ្នកស្លាប់នៅឡើយទេ ៕ ដោយ៖ សែម សុគន្ធ
ចែករំលែកព័តមាននេះ