- ភ្នំពេញ
ភ្នំពេញ៖ ម្ចាស់ផ្ទះ បានឡាយបង្ហោះវីដេអូលើបណ្តាញសង្គមពីករណីចោរចូលគាស់ផ្ទះរបស់គាត់ ដែលត្រូវចាក់សោឃ្លុំបេ ហើយទុកចោល។ មូលហេតុម្ចាស់ផ្ទះ និងសមាជិកគ្រួសារ សរុបចំនួន ៧នាក់ ត្រូវបានរកឃើញវិជ្ជមានកូវីដ១៩…
ភ្នំពេញ៖ ម្ចាស់ផ្ទះ បានឡាយបង្ហោះវីដេអូលើបណ្តាញសង្គមពីករណីចោរចូលគាស់ផ្ទះរបស់គាត់ ដែលត្រូវចាក់សោឃ្លុំបេ ហើយទុកចោល។ មូលហេតុម្ចាស់ផ្ទះ និងសមាជិកគ្រួសារ សរុបចំនួន ៧នាក់ ត្រូវបានរកឃើញវិជ្ជមានកូវីដ១៩…
ភ្នំពេញ៖ ម្ចាស់ផ្ទះ បានឡាយបង្ហោះវីដេអូលើបណ្តាញសង្គមពីករណីចោរចូលគាស់ផ្ទះរបស់គាត់ ដែលត្រូវចាក់សោឃ្លុំបេ ហើយទុកចោល។ មូលហេតុម្ចាស់ផ្ទះ និងសមាជិកគ្រួសារ សរុបចំនួន ៧នាក់ ត្រូវបានរកឃើញវិជ្ជមានកូវីដ១៩ និងត្រូវបានបញ្ជូនទៅព្យាបាល នៅមណ្ឌលម៉ូដែន២ ក្នុងសង្កាត់ចាក់អង្រែ ក្នុងខណ្ឌមានជ័យ រាជធានីភ្នំពេញ។
ផ្ទះ ដែលចោរចូលគាស់យកទ្រព្យសម្បត្តិ រហូតដល់ ៥០ម៉ឺនដុល្លារនោះ ជាផ្ទះរបស់ស្ត្រីឈ្មោះ មករា មុំ អាយុ ៣២ឆ្នាំ ដែលជាតំណាងចែកចាយធំក្រុមហ៊ុន DW សាខាបឹងសាឡាង លក់ដុំ និងរាយឡេមុខ និងឡេខ្លួន នាំចូលពីប្រទេសថៃ និងកូរ៉េ។ ផ្ទះ ដែលចោរលួចគាស់នោះ នៅផ្ទះលេខ៣៥B ផ្លូវលេខ២២៨ សង្កាត់បឹងសាឡាង ខណ្ឌទួលគោក រាជធានីភ្នំពេញ។
ជុំវិញករណីនេះ កាលពីវេលាម៉ោង ១០ និង ៥០នាទីព្រឹក ថ្ងៃទី១២ ឧសភា ឆ្នាំ២០២១ សមត្ថកិច្ចនគរបាលនៃស្នងការរាជធានីភ្នំពេញ និងនគរបាលប៉ុស្តិ៍ខណ្ឌទួលគោក បានចុះមកស្រាវជ្រាវ ទៅដល់ផ្ទះរងគ្រោះ។ តែសមត្ថកិច្ច មិនអាចចូលក្នុងផ្ទះបានទេ ដោយសារតែត្រូវឃ្លុំ បិទដោយសារតែម្ចាស់ផ្ទះ ឆ្លងកូវីដ១៩។
យ៉ាងណាក៏ដោយ តាមការឡាយវីដេអូលើបណ្តាញសង្គម ស្ត្រីជាម្ចាស់ផ្ទះ បានយំរៀបរាប់ទាំងទួញសោក ដោយអះអាងថា ទ្រព្យសម្បត្តិ ដែលត្រូវចោរគាស់ផ្ទះយកទៅនោះ គឺលុយ ដែលដាក់ក្នុងទូដែកអស់ប្រមាណជា ៥០ម៉ឺនដុល្លារ ហើយចោរ បានគេចខ្លួនបាត់។
ហេតុការណ៍ចោរគាស់ផ្ទះនេះ ត្រូវបានបងស្រីរបស់ម្ចាស់ផ្ទះរងគ្រោះ ឱ្យដឹងថា រហូតដល់ទៀបភ្លឺថ្ងៃទី១១ ខែឧសភា ទើបដឹង ខណៈពេលដែលអ្នកហាត់ប្រាណ ធ្វើដំណើរឆ្លងកាត់ ក៏ស្រាប់តែឃើញផ្ទះខាងលើ បើកទ្វារចំហរ ហើយបានរាយការណ៍ទៅម្ចាស់ផ្ទះ និងបង្កឱ្យមានការភ្ញាក់ផ្អើលកើតឡើងតែម្តង។ ទោះបីយ៉ាងណា ស្ត្រីជាម្ចាស់ផ្ទះ មិនអាចមកផ្ទះបានឡើយ ដោយសារគាត់ កំពុងសម្រាកព្យាបាលជំងឺកូវីដ។
ជុំវិញករណីនេះ អាជ្ញាធរសមត្ថកិច្ច កំពុងស្រាវជ្រាវនៅឡើយ។ តែបើជាករណីពិតមែននោះ គួរជារឿងសង្វេគមួយ ដែលមិនគួរកើតឡើងទាល់តែសោះ។ ម្ចាស់ផ្ទះមួយគ្រួសារ ឆ្លងកូវីដទៅហើយ ថែមទាំងមកជួបករណីចោរចូលគាស់ផ្ទះ លួចយកលុយរហូតដល់ ៥០ម៉ឺនដុល្លារថែមទៀត។
ករណីនេះទៀត ក៏ត្រូវបានអ្នកតាមដានបណ្តាញសង្គមហ្វេសប៊ុក មើលឃើញថា ស្ត្រីអ្នកលក់ឡេ តែងតែឡាយហ្វេសប៊ុក លើកបង្ហាញលុយដុល្លារទាំងបាច់ៗ ដែលជាការអួតបង្ហាញ។ ក្នុងពេលវឹកវររឿងកូវីដនេះ ក៏ជាឱកាសរបស់ក្រុមចោរតែម្តង។
យ៉ាងណាក៏ដោយចុះ បើសិនជាករណីចោរគាស់ផ្ទះយកលុយពីទូដែកអស់ ៥០ម៉ឺនដុល្លារនេះ ជាការពិតមែននោះ គួរតែជាការធ្វេសប្រហែសមួយរបស់ម្ចាស់ផ្ទះ រួមទាំងអាជ្ញាធរសមត្ថកិច្ច ដែលទាមទារឲ្យបង្កើនការយកចិត្តទុកដាក់ថែមទៀត នៅកន្លែងបិទឃ្លុំផ្ទះ ដែលកើតកូវីដ។
កន្លងមក មិនថា ផ្ទះអត់មនុស្សរស់នៅ ឬក៏មានអ្នករស់នៅក្នុងនោះទេ ដែលត្រូវបិទខ្ទប់ ពាក់ព័ន្ធនឹងកូវីដ គឺអាជ្ញាធរសមត្ថកិច្ចមូលដ្ឋាន ប្រើតែខ្សែ ឬក៏បង់ស្អិត ហើយទាញបាំងមាត់ទ្វារ ឬរបងផ្ទះតែប៉ុណ្ណោះ។ ផ្ទះបិទខ្ទប់ដោយច្រើន គឺមិនទាំងមានអាជ្ញាធរសមត្ថកិច្ច នៅយាមប្រចាំការឡើយ។
ការគេចវេះចេញពីការធ្វើចត្តាឡីស័ក ឬកន្លែងបិទខ្ទប់ ប្រព្រឹត្តិដោយអ្នកជាប់ធ្វើចត្តាឡីស័ក គឺជារឿង ដែលមិនអាចកើតឡើងនោះទេ នៅផ្ទះដែលត្រូវបិទខ្ទប់។ មូលហេតុ ដោយសារតែមានអ្នកជិតខាង បានធ្វើជាភ្នែកជាច្រមុះរបស់អាជ្ញាធរសមត្ថកិច្ច ក្នុងការឃ្លាំមើលជាប្រចាំ ព្រោះអ្នកជិតខាង ក៏ខ្លាចឆ្លងកូវីដដែរ បើសិនជាអ្នកនៅក្នុងផ្ទះបិទខ្ទប់នោះ ចេញមកក្រៅ។ ម្យ៉ាងទៀត ក៏មានច្បាប់កំណត់រួចហើយ ដាក់ទោស រហូតដល់ជាប់ពន្ធនាគារ និងត្រូវផាកពិន័យទឹកប្រាក់ច្រើនម៉ឺនរៀល ចំពោះអ្នកគេចចេញពីកន្លែងធ្វើចត្តាឡីស័ក។
ប៉ុន្តែករណីចោរចូលគាស់ផ្ទះ នៅផ្ទះបិទខ្ទប់ ដោយសារតែម្ចាស់ ត្រូវទៅព្យាបាលជំងឺកូវីដ១៩ ឬក៏ផ្ទះទុកចោលដូច្នេះ គឺអ្នកជិតខាង មិនអាចជួយបានគ្រប់ពេលនោះឡើយ។ អាជ្ញាធរសមត្ថកិច្ចភូមិសង្កាត់ និងខណ្ឌ គួរតែបង្កើនកិច្ចការពារជាងនេះ។ អាចចាត់កម្លាំង ជាប៉ូលិស ជាប្រជាការពារ ឬក៏អាជ្ញាធរនៅភូមិ និងសង្កាត់ ដាក់វេនគ្នាយាម ពិសេសនៅពេលយប់ នៅផ្ទះ ដែលបិទខ្ទប់ ហើយមិនមានមនុស្សនៅ។
មួយវិញទៀត អាជ្ញាធរសមត្ថកិច្ច ក៏គួរតែនិយាយជាមួយម្ចាស់ផ្ទះ ដើម្បីរកអ្នកចាំផ្ទះ អាចជួលសន្តិសុខឯកជន ឬក៏អ្នកទុកចិត្តណាម្នាក់ ដើម្បីមើលការខុសត្រូវ យាមផ្ទះ ក្នុងអំឡុងពេលចាក់សោទុកចោល ទៅព្យាបាលជំងឺកូវីដ១៩។ ក្នុងករណីនេះ ម្ចាស់ផ្ទះ ដែលមានទ្រព្យសម្បត្តិ មានតម្លៃ ឬលុយកាក់ ក៏មិនគួរទុកចិត្តលើសោ ឬទូដែកនោះទេ។ ទ្រព្យសម្បត្តិ និងលុយកាក់ គួរតែផ្ញើនៅធនាគារ ទើបមានសុវត្ថិភាពខ្ពស់បំផុត។ បើថាទុកនៅផ្ទះ ក៏ទុកលុយតិចតួច ល្មមប្រើការចាយវាយប្រចាំថ្ងៃ ហើយបើមិននៅផ្ទះ ក៏គួរតែយកទ្រព្យសម្បត្តិទាំងនោះ ជាប់ខ្លួនដែរ ឲ្យសមពាក្យថា «ប្រហែសបាត់ ប្រយ័ត្ន គង់»។
ការទុកទ្រព្យសម្បត្តិ លុយកាក់ នៅក្នុងផ្ទះច្រើន បើទោះបីជាមិនមានចោរលួច ក៏ឧបមាថា មានគ្រោះអគ្គិភ័យ ដោយប្រការណាមួយ នោះក៏បាត់បង់ទ្រព្យសម្បត្តិមានតម្លៃ និងលុយកាក់ ដែលម្ចាស់ផ្ទះ ទុកចិត្តទូដែក ឬក៏ចាក់សោលាក់ក្នុងបន្ទប់ ក្រោមពូកនោះបានដែរ។
យ៉ាងណាមិញ ករណីចោរលួចគាស់ផ្ទះថៅកែឡេនៅបឹងសាឡាងនេះ អាជ្ញាធរសមត្ថកិច្ច គួរតែបើកការស៊ើបអង្កេតឲ្យត្រឹមត្រូវ ព្រោះថា កាំម៉ារ៉ាសុវត្ថិភាព អាចជួយបាន ក្នុងករណីនេះ។ បើរកឃើញថា ជាការពិត ឬក៏មិនពិតក៏ដោយ ក៏ករណីនេះ អាជ្ញាធរសមត្ថកិច្ច ដកពិសោធន៍ជាមេរៀនថ្មីមួយទៀត សម្រាប់បង្កើនការប្រុងប្រយ័ត្ន និងកិច្ចការពារសុខសុវត្ថិភាពដល់ប្រជាពលរដ្ឋ មិនថាតែអ្នកឆ្លងជំងឺកូវីដ១៩ ដែលត្រូវចាក់សោផ្ទះ ទុកចោលនោះទេ គឺអាជ្ញាធរសមត្ថកិច្ច គួរតែបង្កើនសន្តិសុខសុវត្ថិភាពឲ្យបានប្រសើរចំពោះប្រជាពលរដ្ឋគ្រប់គ្នា មិនថា អ្នកមាន ឬអ្នកក្រនោះទេ។ ម្យ៉ាង បើគ្នាជួបបញ្ហារឿងឆ្លងកូវីដហើយ បែរជាមកជួបករណីចោរគាស់ផ្ទះថែមទៀតនោះ គឺជារឿងមួយ ដែលគួរឲ្យអាសូរ ព្រោះទុក្ខជាន់ទុក្ខ៕
ចែករំលែកព័តមាននេះ