ខេត្តតាកែវ ៖ បើតាមសេចក្តីរាយការណ៍បានឱ្យដឹងថា រថយន្តយីឌុបដឹកខ្លាញ់គោកែច្នៃរួចមួយគ្រឿងត្រូវបានកម្លាំងការិយាល័យផលិតកម្ម និងបសុព្យាបាលខេត្តតាកែវ ធ្វើការឃាត់ទុក ក្នុងហេតុផលដឹកជញ្ជូនគ្មានច្បាប់អនុញ្ញាតិត្រឹមត្រូវ ។ សេចក្តីរាយការណ៍បន្តថា រថយន្តដែលមានការដឹកជញ្ជូនខ្លាញ់គោកែច្នៃរួចខាងលើ…
ខេត្តតាកែវ ៖ បើតាមសេចក្តីរាយការណ៍បានឱ្យដឹងថា រថយន្តយីឌុបដឹកខ្លាញ់គោកែច្នៃរួចមួយគ្រឿងត្រូវបានកម្លាំងការិយាល័យផលិតកម្ម និងបសុព្យាបាលខេត្តតាកែវ ធ្វើការឃាត់ទុក ក្នុងហេតុផលដឹកជញ្ជូនគ្មានច្បាប់អនុញ្ញាតិត្រឹមត្រូវ ។
សេចក្តីរាយការណ៍បន្តថា រថយន្តដែលមានការដឹកជញ្ជូនខ្លាញ់គោកែច្នៃរួចខាងលើ បានលោតឆ័ត្រមកពីរាជធានីភ្នំពេញ ដើម្បីឆ្ពោះទៅលក់នៅប្រទេសវៀតណាម មិនតិចជាង២០តោននោះទេ តែក៏ត្រូវបានក្រុមមន្ត្រីជំនាញខេត្តតាកែវ មានការសង្ស័យ ក៏ធ្វើការឃាត់ទុក រួចសួររកច្បាប់អនុញ្ញាតដឹកជញ្ជូននាំចេញតែម្តង។
ផ្អែកតាមសម្តីមន្ត្រីផលិតកម្ម និងបសុព្យាបាលខេត្តតាកែវ បានឲ្យដឹងថា ការឃាត់រថយន្តខាងលើនេះធ្វើឡើងកាលពីយប់ថ្ងៃទី០៩ ខែឧសភា ឆ្នាំ២០២១ម្ល៉េះ នៅចំណុចច្រករបៀងឫស្សី៣គុម្ភ ក្នុងទឹកដីស្រុកគីរីវង់ ព្រំប្រទល់ប្រទេសវៀតណាម។
មន្ត្រីដដែលបង្ហើបថា ខ្លាញ់គោដែលកែច្នៃរួចទាំងអស់ គឺមិនមានសារធាតុគីមីប៉ះពាល់សុខភាពនោះទេ តែដែលឃាត់ទុកនេះ គឺក្នុងគោលបំណងឲ្យម្ចាស់ទៅរត់ការសុំច្បាប់អនុញ្ញាតត្រឹមត្រូវពីមន្ត្រីជំនាញពាក់ព័ន្ធសិន ព្រោះតាមការពិនិត្យជាក់ស្តែង គឺពុំមានច្បាប់អ្វីទាំងអស់។
ជុំវិញករណីខាងលើនេះ គិតមកដល់ព្រឹកថ្ងៃទី១២ ខែឧសភា ឆ្នាំ២០២១នេះ ក៏នៅមិនទាន់មានការអនុញ្ញាតឲ្យនាំចេញខ្លាញ់គោកែច្នៃរួចយកទៅលក់នោះទេ បន្ទាប់ពីឃាត់ទុករយៈពេលប៣ថ្ងៃមកហើយ ដោយមហាជនសង្ស័យថា តើអាចទេ? ដែលឈ្មួញដឹកជញ្ជូនខ្លាញ់គោខាងលើ បង់លុយមិនគ្រប់ជាមួយមន្ត្រីពេទ្យសត្វខេត្តតាកែវ ទើបឃាត់រថយន្តទុកចរចាគ្នា ព្រោះរថយន្តធ្វើចរាចរណ៍តាំងពីភ្នំពេញមិនចាប់ ទាំងដែលប៉ូលិសចរាចរណ៍ដាក់គោលដៅត្រួតពិនិត្យមិនតិចកន្លែងនោះទេ ហេតុអ្វីមកជាប់ទើរត្រឹមពេទ្យសត្វនៅខេត្តតាកែវទៅវិញ?
គួរបញ្ជាក់ថា បច្ចុប្បន្ននេះ ទាំងរថយន្ត និងវត្ថុតាងខ្លាញ់គោកែច្នៃរួចខាងលើ កំពុងរក្សាទុកនៅការិយាល័យផលិតកម្ម និងបសុព្យាបាលខេត្តតាកែវ ដើម្បីដោះស្រាយតាមផ្លូវច្បាប់៕
ចែករំលែកព័តមាននេះ