នាងជាប់ចោទពីបទលួចទូរសព្ទដៃលោកឧកញ៉ា ហើយចា.ក់ម្ចាស់ទូរស័ព្ទ២កាំបិទទៀត
- ភ្នំពេញ
រាជធានីភ្នំពេញ ៖ តំណាងអយ្យការ កញ្ញា សុង ឆវ័ន្ត ព្រះរាជអាជ្ញារងអមសាលាដំបូងរាជធានីភ្នំពេញ កាលពីព្រឹកថ្ងៃទី១១ ឧសភា ឆ្នាំ២០២១…
រាជធានីភ្នំពេញ ៖ តំណាងអយ្យការ កញ្ញា សុង ឆវ័ន្ត ព្រះរាជអាជ្ញារងអមសាលាដំបូងរាជធានីភ្នំពេញ កាលពីព្រឹកថ្ងៃទី១១ ឧសភា ឆ្នាំ២០២១ បានសម្រេចធ្វើការចោទប្រកាន់ស្ត្រីម្នាក់ឈ្មោះ មាន ពេជ្រ រីតា ហៅយូប៊ី អាយុ២០ឆ្នាំ ពីបទលួចមានស្ថានទម្ងន់ទោស (លួចទូរស័ព្ទដៃ ដោយប្រើអំពើហិង្សាបណ្តាលឲ្យរងរបួសដល់ជនរងគ្រោះ) ។
ក្រោយពីតំណាងអយ្យការបានសម្រេចធ្វើការចោទប្រកាន់ជាផ្លូវការហើយនោះ សំណុំរឿងបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
តាមប្រភ័ពព័ត៌មានបានឲ្យដឹងថា កាលពីវេលាម៉ោងជាង៣រសៀលថ្ងៃទី៤ ខែឧសភា ឆ្នាំ២០២១ ជនសង្ស័យឈ្មោះ មាន ពេជ្រ រីតា ហៅ យូប៊ី បានធ្វើសកម្មភាពលួចយកទូរស័ព្ទដៃម៉ាកអាយហ្វូន១១ ប្រូម៉េក ពណ៌ខ្មៅ របស់លោកឧកញ៉ាម្នាក់ នៅចំណុចផ្លូវលេខ១៣៨ កែងផ្លូវលេខ២៥៩ ភូមិ១០ សង្កាត់ទឹកល្អក់ទី២ ខណ្ឌទួលគោក ពេលនោះជនរងគ្រោះឃើញក៏មកឆក់យកទូរស័ព្ទមកវិញ ទើបមានការប្រតាយប្រតប់គ្នា ធ្វើឱ្យជនសង្ស័យទាញបានកាំបិតចុងស្រួចចាក់ទៅលើលោកឧកញ៉ានោះ២កាំបិតត្រូវត្រង់ពោះ បណ្តាលឲ្យរងរបួសជាទម្ងន់ នឹងបានបញ្ជូនទៅសង្គ្រោះនៅមន្ទីរពេទ្យ ។
ក្រោយកើតហេតុ ទើបបានសមត្ថកិច្ចឈានទៅឃាត់ខ្លួនជនសង្ស័យនិងបានកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញ តាមនីតិវិធី ៕ ដោយ ៖ ឃឹម ប៊ុនណាក់
ចែករំលែកព័តមាននេះ