រាជធានីភ្នំពេញ ៖ កម្ពុជាទើបតែបាននាំចេញស្វាយស្រស់ទៅកាន់ទីផ្សារប្រទេសចិនលើកដំបូងកាលពីថ្ងៃទី០៧ ខែ ឧសភា ឆ្នាំ២០២១កន្លងទៅនេះ ក្រោយពេលភាគីបានចរចាដើម្បីបើកច្រកទីផ្សារស្វាយស្រស់ទៅកាន់ប្រទេសចិនអស់រយៈពេលជាច្រើនឆ្នាំកន្លងមក ។ ដើម្បីឱ្យការនាំចេញស្វាយស្រស់ទៅកាន់ទីផ្សារអន្តរជាតិកាន់តែបានច្រើននោះ អគ្គនាយកដ្ឋានកសិកម្មនៃក្រសួងកសិកម្មរុក្ខាប្រមាញ់និងនេសាទ កម្ពុជាបានស្នើឱ្យកសិករដៃស្វាយ និងអ្នកពាក់ព័ន្ធក្នុងការនាំចេញស្វាយស្រស់ជួយរក្សាលំនឹងទីផ្សារប្រទេសចិនឱ្យបានគង់វង្ស ។
លោកងិន ឆាយអគ្គនាយកនៃអគ្គនាយកដ្ឋានកសិកម្មនៃក្រសួងកសិកម្មរុក្ខាប្រមាញ់និងនេសាទ បានមានប្រសាសន៍ថា ការនាំចេញស្វាយស្រស់ពីកម្ពុជាទៅកាន់ប្រទេសចិនត្រូវមានភូតគាមអនាម័យ និងស្ដង់ដារខ្ពស់ ។ ស្ដង់ដារផ្លែស្វាយ គឺមានទាំងពីទំហំ មានទាំងពីរូបរាង គឺត្រូវមានទំហំធំសមស្រប មានពណ៌សំបុរស្អាត និងដាំដុះទៅតាមស្ដង់ដារសុវត្ថិភាព ដោយត្រូវប្រើប្រាស់បច្ចេកទេសដាំដុះស្របទៅតាមគោលការណ៍នៃការអនុវត្តកសិកម្មល្អ ដោយសង្កត់ធ្ងន់ការប្រើប្រាស់ថ្នាំគីមីពុល ដោយមិនប្រើលើសកំណត់ ។
មួយវិញទៀតការដាំដុះក៏មិនត្រូវឱ្យជាប់ជាមួយនឹងសមាសភាពចង្រៃណាមួយនោះឡើយទាំងសមាសភាពសត្វល្អិតចង្រៃ និងជំងឺជាដើម ។ លោកថា៖« បើសិនជាភាគីចិន គេសង្កេតឃើញស្វាយកម្ពុជាទៅដល់ប្រទេសចិន មានជំងឺឬក៏មានពងដង្កូវ គេនឹងបដិសេធហើយលែងឱ្យកម្ពុជានាំចូលប្រទេសគេ »។
លោកបន្តថាដោយសារតែលក្ខខណ្ឌតម្រូវរបស់ភាគីចិនគឺមានស្ដង់ដារអនាម័យខ្ពស់បែបនេះ ហើយគេក៏បានយល់ព្រមនិងទទួលយកទាំងគុណភាព សុវត្ថិភាពស្វាយរបស់កម្ពុជា ដូច្នេះភាគីដាំដុះ ម្ចាស់ចំការស្វាយដែលមានចុះបញ្ជីទទួលស្គាល់នាំចេញទៅចិន សូមអនុវត្តន៍ឱ្យបានជាប្រចាំនូវបទដ្ឋានបច្ចេកទេសដែលអគ្គនាយកដ្ឋានបានណែនាំ បើសិនជាមានបញ្ហាអ្វីសូមទាក់ទងទៅកាន់អគ្គនាយកដ្ឋានជាបន្ទាន់ដើម្បីដោះស្រាយ ។ ចំណែកអ្នកវេចខ្ចប់ជាពិសេសអ្នកដែលមានរោងចក្រសម្រាប់ធ្វើប្រព្រឹត្តិកម្មសម្លាប់ពងដង្កូវ រុយសមាសភាពចង្រៃក៏ត្រូវអនុវត្តន៍ទៅតាមបច្ចេកទេសឱ្យបានខ្ជាប់ខ្ជួនដែរ បើពុំនោះទេ នឹងធ្វើឱ្យគុណភាព ផ្លែស្វាយនោះនឹងមិនត្រូវនឹងភូតគាមអនាម័យតម្រូវរបស់ទីផ្សារចិន ហើយនឹងបាត់បង់ទីផ្សារវិញ ។
បើតាមឯកឧត្តមវេង សាខុនរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានឱ្យដឹងថាផលិតផលផ្លែស្វាយគឺជាផលិតផលសំខាន់មួយសម្រាប់នាំចេញ ហើយបើសិនជាអាចចេញបានកាន់តែច្រើន វានឹងនាំចំណូលមកកាន់ប្រទេសកម្ពុជាវិញកាន់តែច្រើនផងដែរ ជាក់ស្ដែងបើសិនជាកម្ពុជានាំចេញបានខ្ទប់លានតោន នោះចំណូលពីស្វាយនេះក៏អាចបានមកវិញរាប់ពាន់លានដុល្លារអាមេរិកផងដែរ ។
ឯកឧត្តមបន្តថា រហូតមកដល់ពេលនេះ ផ្លែឈើស្រស់របស់កម្ពុជាពីរមុខហើយ រួមមានចេកអំបូងលឿងស្រស់ និងផ្លែស្វាយស្រស់បាននាំចេញទៅកាន់ទីផ្សារប្រទេសចិន។បន្តបន្ទាប់ទៅទៀតកម្ពុជានឹងចរចាបើកច្រកនាំចេញ មៀនប៉ៃលិន ឬហៅថាតាង៉ែន និងផ្លែស្រកានាគទៅកាន់ទីផ្សារប្រទេសចិនបន្តទៀត នៅពេលចរចាទីផ្សារបានរួចហើយ ខណៈផ្លែឈើទាំងនេះ សុទ្ធតែមានតម្រូវការខ្ពស់នៅក្នុងទីផ្សារប្រទេសចិន ។
ឯកឧត្តមបន្ថែមថា រយៈពេល៤ខែដើមឆ្នាំ២០២១នេះ កម្ពុជាបានាំចេញផ្លែស្វាយស្រស់ទៅកាន់ទីផ្សារអន្តរជាតិបានប្រមាន ១៤២.៥៥៦តោន បើធៀបនឹងរយៈពេលដូចគ្នាក្នុងឆ្នាំ ២០២០មានការកើនឡើង២៣៩,១៣ភាគរយ ៕
ចែករំលែកព័តមាននេះ