អាហ្សង់ទីន ៖ ក្រោយឆ្លងកាត់ការស៊ើបអង្កេតជាច្រើនកន្លងមក ក្រុមជំនាញផ្នែកវេជ្ជសាស្ត្របានសន្និដ្ឋានថា វីរៈបុរសបាល់ទាត់អាហ្សង់ទីន លោក Diego Maradona មិនទទួលបានការថែទាំសុខភាពត្រឹមត្រូវ និងខ្វះការប្រុងប្រយ័ត្ន មុនពេលគាត់ស្លា.ប់បាត់បង់ជីវិត។ គួររំលឹកថា អាហ្សង់ទីនកោះប្រជុំក្រុមប្រឹក្សាវេជ្ជសាស្ត្រជុំវិញការស្លា.ប់ស្តេចបាល់ទាត់ Maradona
ព្រះរាជអាជ្ញាប្រទេសអាហ្សង់ទីន បានស្នើឱ្យក្រុមមន្ត្រីជំនាញបើកការស៊ើបអង្កេតលើក្រុមគ្រូពេទ្យផ្ទាល់ខ្លួនរបស់លោក Maradona បន្ទាប់ពីមរណភាពគាត់កាលពីថ្ងៃទី២៥ ខែវិច្ឆិកា ឆ្នាំ២០២០ ដោយសារជំងឺគាំងបេះដូងត្រឹមអាយុ៦០ឆ្នាំ នៅឯផ្ទះរបស់គាត់ក្នុងតំបន់ Buenos Aires។
នៅក្នុងរបាយការណ៍របស់ក្រុមជំនាញមាន៧០ទំព័រ ដែលបានចេញផ្សាយកាលពីថ្ងៃទី៣០ ខែមេសា បានឱ្យដឹងថា Maradona បានធ្លាក់ខ្លួនឈឺធ្ងន់ប្រហែល ១២ម៉ោងមុនពេលគាត់ស្លា.ប់។ ហើយក្នុងអំឡុងពេលនោះ គាត់មិនទទួលបានការត្រួតពិនិត្យសុខភាពត្រឹមត្រូវនោះទេ។
អ្នកជំនាញផ្នែកវេជ្ជសាស្ត្របាននិយាយថា Maradona អាចមានឱកាសប្រសើរក្នុងការរស់រានមានជីវិត ប្រសិនបើគាត់ត្រូវបានព្យាបាលនៅឯមន្ទីរពេទ្យ។ ជាងការព្យាបាលនៅផ្ទះរបស់គាត់។ គណៈកម្មាធិការបានសន្និដ្ឋានថា សកម្មភាពរបស់ក្រុមគ្រូពេទ្យផ្ទាល់ខ្លួនរបស់គាត់គឺមិនគ្រប់គ្រាន់ និងខ្វះការប្រុងប្រយ័ត្ន។
លោកវេជ្ជបណ្ឌិត Leopoldo Luque អាយុ ៣៩ឆ្នាំដែលជាវេជ្ជបណ្ឌិតផ្ទាល់ខ្លួនរបស់ Maradona ក៏ស្ថិតក្នុងចំណោមអ្នកជំនាញវេជ្ជសាស្ត្រដែលត្រូវបានស៊ើបអង្កេតដោយព្រះរាជអាជ្ញាផងដែរ។ ហើយបច្ចុប្បន្នព្រះរាជអាជ្ញា កំពុងធ្វើការពិចារណាលើសេចក្តីសម្រេចចំពោះបទចោទប្រកាន់លើអ្នកដែលពាក់ព័ន្ធទាំងអស់។
សូមរំលឹកថា មរណភាពលោក Diego Maradona បានធ្វើឱ្យរំជើបរំជួលពិភពលោក ជាពិសេសនៅក្នុងប្រទេសអាហ្សង់ទីន។ ដោយក្នុងនោះស្ថាប័ន និងអង្គភាពកំពូលបាល់ទាត់ជាច្រើន រួមទាំងថ្នាក់ដឹកនាំ, អ្នកមុខអ្នកការ និងបុគ្គលល្បីឈ្មោះគ្រប់វិស័យ ជាពិសេសអ្នកគាំទ្រនៅជុំវិញពិភពលោក បានសម្តែងការសោកស្តាយជាទីបំផុត៕ (ដកស្រង់ចេញពី BBC)
ចែករំលែកព័តមាននេះ