ពាក្យនិយាយរបស់មនុស្សគឺជារឿងសំខាន់ណាស់ និយាយយ៉ាងណា ត្រូវធ្វើឱ្យបានយ៉ាងនោះ ហេតុនេះកូនត្រូវប្រយ័ត្នចំពោះចំណុច២យ៉ាងគឺ ១-មុននិយាយ និង២-និយាយរួចហើយ ។ មុននិយាយ កូនត្រូវគិតមុខគិតក្រោយឲ្យល្អ និងកាលនិយាយរួចហើយ…
ពាក្យនិយាយរបស់មនុស្សគឺជារឿងសំខាន់ណាស់ និយាយយ៉ាងណា ត្រូវធ្វើឱ្យបានយ៉ាងនោះ ហេតុនេះកូនត្រូវប្រយ័ត្នចំពោះចំណុច២យ៉ាងគឺ ១-មុននិយាយ និង២-និយាយរួចហើយ ។
មុននិយាយ កូនត្រូវគិតមុខគិតក្រោយឲ្យល្អ និងកាលនិយាយរួចហើយ កូនត្រូវរក្សាពាក្យនិយាយនោះឱ្យបាន ។
ពាក្យដែលយើងនិយាយចេញទៅហើយគឺជាចៅហ្វាយនាយរបស់យើងណាកូន នឹងបង្គាប់ឲ្យយើងត្រូវតែធ្វើតាមសន្យា ទោះបីជាត្រូវស្លាប់ក៏ត្រូវព្រមដែរដើម្បីរក្សាសម្តីដែលពោលទៅនោះ ។
កូនអើយ រឿងពាក្យសម្តីនេះមនុស្សទាំងឡាយគេកាន់យកណាស់ បើបង់សម្តីទៅហើយ អ្វីៗដទៃទៀតសូម្បីល្អយ៉ាងណាក៏រមែងខូចកេរ្តិ៍ឈ្មោះក្នុងការមិនរក្សាសម្តី ដូច្នេះហើយទើបបុរាណពោលថា មនុស្សគេយកសម្តី ដំរីគេយកភ្លុក ។
ព្រោះហេតុនេះ នៅពេលកូនគិតថា ខ្លួនឯងត្រូវលំបាកព្រោះហេតុតែត្រូវរក្សាសម្តី ហើយបើកូនមិនចង់លំបាក គឺកូនកុំចេះតែទទួលពាក្យគេដោយងាយៗនោះ ត្រូវពិចារណាឲ្យល្អជាមុនថា កាលទទួលពាក្យគេហើយ អាត្មាអញក៏ត្រូវធ្វើបានយ៉ាងនោះដែរឬទេ គឺត្រូវគិតល្អិតល្អន់ស្រួលបួលហើយជាមុនសិន ។
មនុស្សយើង បើរក្សាសម្តីខ្លួនឯងទុកមិនបានទៅហើយ តើអាចរក្សាអ្វីបានទៅព្រោះអម្បាលពាក្យសម្តីជាសម្បត្តិមានតម្លៃក្នុងខ្លួន រក្សាមិនបានផង ចំណង់បើរបស់ដទៃក្រៅខ្លួនធ្វើដូចម្តេចនឹងអាចរក្សាបាន ។ ដូច្នេះទើបម៉ែឪដាស់តឿនឲ្យកូនពិចារណាឲ្យល្អមុននិយាយ មុនសន្យាអ្វីៗជាមួយអ្នកណាៗ ហើយត្រូវកូនកុំជាមនុស្សភ្លេចពាក្យសន្យាដោយងាយ ៗ ឡើយ ។
មនុស្សដែលបង់ពាក្យបង់សម្តីហើយ សូម្បីដោះស្រាយយករួចខ្លួនបានម្តងក៏ពិតមែន តែលុះដល់តទៅកាលបើមានហេតុការណ៍ចាំបាច់ត្រូវសន្យាធ្វើឲ្យបានយ៉ាងណានោះ ក៏គេដកសេចក្តីទុក្ខចិត្តដែរ ។
ចូរកូនកុំជាមនុស្សនិយាយឡេះឡោះ ឬនិយាយកុហកសូម្បីតែដើម្បីសើចលេងឡើយ និងចូរកូនចាំទុកថា ពាក្យសម្តីសំខាន់សម្រាប់មនុស្សយើងខ្លាំងណាស់ ៕ សាន សារិន
ចែករំលែកព័តមាននេះ