រាជធានីភ្នំពេញ ៖ ដោយមានការណែនាំពីលោក ឃួង ស្រេង អភិបាលរាជធានីភ្នំពេញ ក្រុមការងារជំនាញបានចុះទៅបាញ់ថ្នាំសម្លាប់មេរោគក្នុងផ្សារកាប់គោ ក្រោយពីផ្សារនេះត្រូវបានបិទ កាលពីថ្ងៃទី២៤ ខែមេសា ដើម្បីតម្រូវឱ្យក្រុមអាជីវករទៅយកសំណាក ។
យោងតាមប្រភពព័ត៌មានក្រៅផ្លូវការបានឱ្យដឹងថា គិតត្រឹមថ្ងៃទី០១ ខែឧសភានេះ អាជីវករផ្សារកាប់គោចំនួន០៦នាក់ហើយ ដែលរកឃើញវិជ្ជមានកូវីដ១៩ ប៉ុន្តែទោះជាយ៉ាងណា ពួកគាត់នៅមិនទាន់ទៅយកសំណាកគ្រប់គ្នានោះទេ ។
លោក ហាស់ ឆេន ប្រធានគណៈកម្មការផ្សារកាប់គោបានឱ្យដឹងថា ក្រុមអាជីវករលក់ដូរនៅក្នុងផ្សារកាប់គោ សរុបមានចំនួន២៨៦នាក់ ក្នុងនោះអាជីវករតាមតូបមានចំនួន១៨៦តូប គ្រែចល័តមានចំនួន៧៧ គ្រែ និងលក់តាមកញ្ច្រែងមានចំនួន២៣ ។
លោកបន្តថា ដោយមានការណែនាំពីរដ្ឋបាលរាជធានីភ្នំពេញ និងការសំណូមពរពីគណៈកម្មការផ្សារកាប់គោក្រុមអាជីវករទាំងអស់បានស្ម័គ្រចិត្តឈប់លក់ និងបិទផ្សារទាំងស្រុង កាលពីថ្ងៃទី២៤ ខែមេសា ព្រមទាំងបានអំពាវនាវឱ្យពួកគាត់ទៅយកសំណាករកមេរោគកូវីដ១៩ ដើម្បីចូលរួមទប់ស្កាត់ការរីករាលដាលជំងឺកូវីដ១៩ជាមួយរាជរដ្ឋាភិបាល ។
លោក ហាស់ ឆេន បានបញ្ជាក់ថា បើអាជីវកណាមិនទៅយកសំណាក ដែលមិនមានឯកសារបញ្ជាក់ថា បានយកសំណាកត្រឹមត្រូវនោះនៅពេលបើកផ្សារវិញគណៈកម្មការផ្សារមិនឱ្យចូលលក់វិញទេ ៕
ចែករំលែកព័តមាននេះ