រាជធានីភ្នំពេញ ៖ អាជីវករផ្សារកាប់គោក្បែរវិមានឯករាជ្យចំនួន០៣នាក់ ហើយមានវិជ្ជមានកូវីដ-១៩ ក្នុងនោះ០២នាក់បានរកឃើញភ្លាមៗនៅវិទ្យាល័យបឹងត្របែក ចំណែកម្នាក់ទៀតបានរកឃើញនៅតំបន់ក្រហម ពិនិត្យតាមភូមិ។ រយៈពេល៤ថ្ងៃហើយ បើគិតចាប់ពីថ្ងៃទី២៦ ដល់ថ្ងៃទី២៩…
រាជធានីភ្នំពេញ ៖ អាជីវករផ្សារកាប់គោក្បែរវិមានឯករាជ្យចំនួន០៣នាក់ ហើយមានវិជ្ជមានកូវីដ-១៩ ក្នុងនោះ០២នាក់បានរកឃើញភ្លាមៗនៅវិទ្យាល័យបឹងត្របែក ចំណែកម្នាក់ទៀតបានរកឃើញនៅតំបន់ក្រហម ពិនិត្យតាមភូមិ។ រយៈពេល៤ថ្ងៃហើយ បើគិតចាប់ពីថ្ងៃទី២៦ ដល់ថ្ងៃទី២៩ ខែមេសានេះ ក្រុមអាជីវករផ្សារកាប់គោ ប្រមាណជាង៧០នាក់ បានទៅយកសំណាករកមេរោគកូវីដ-១៩ នៅវិទ្យាល័យបឹងត្របែក ក្នុងចំណោមអាជីវករសរុបជិត៣០០នាក់ គឺពួកគាត់មានភាពយឺតយ៉ាវក្នុងការទៅយកសំណាក ដែលគណៈកម្មការផ្សារកាប់គោ បន្តទទូចអង្វរសុំឱ្យអាជីវករ និងអ្នកពាក់ព័ន្ធទាំងអស់រួសរាន់ទៅយកសំណាកឱ្យបានគ្រប់ៗគ្នា។
លោក ហាស់ ឆេន ប្រធានគណៈកម្មការផ្សារកាប់គោ បានឱ្យដឹងថា ក្រុមអាជីវករលក់ដូរនៅក្នុងផ្សារកាប់គោ សរុបមានចំនួន២៨៦នាក់ ក្នុងនោះ អាជីវករតាមតូបមានចំនួន១៨៦តូប គ្រែចល័តមានចំនួន៧៧គ្រែ និងលក់តាមកញ្ច្រែងមានចំនួន២៣។ លោកបន្តថា ដោយមានការណែនាំពីរដ្ឋបាល រាជធានីភ្នំពេញ និងការសំណូមពរពីគណៈកម្មការផ្សារកាប់គោ ក្រុមអាជីវករទាំងអស់បានស្ម័គ្រចិត្តឈប់លក់ និងបិទផ្សារទាំងស្រុងកាលពីថ្ងៃទី២៤ ខែមេសា ព្រមទាំងបានអំពាវនាវឱ្យពួកគាត់ទៅយកសំណាករកមេរោគកូវីដ-១៩ ដើម្បីចូលរួមទប់ស្កាត់ការរីករាលដាលជំងឺកូវីដ-១៩ តាមការណែនាំរបស់រាជរដ្ឋាភិបាល។
លោក ហាស់ ឆេន បានឱ្យដឹងទៀតថា សម្រាប់នៅថ្ងៃទី២៦ ខែមេសា ក្រុមអាជីវករចំនួន៤១នាក់ បានទៅយកសំណាកនៅវិទ្យាល័យបឹងត្របែក។ ក្នុងចំណោមអាជីវករទាំង៤១នាក់នោះ បានរកឃើញភ្លាមៗអ្នកផ្ទុកកូវីដ-១៩ ចំនួន០២នាក់ និងសម្រាប់ថ្ងៃទី២៧ ថ្ងៃទី២៨ និងថ្ងៃទី២៩នេះ ក្រុមអាជីវករបានទៅយកសំណាកតិចណាស់សម្រាប់នៅវិទ្យាល័យបឹងត្របែក គឺក្នុង១ថ្ងៃមានតែពី៨ទៅ១០នាក់ប៉ុណ្ណោះ ទោះជាមានការអំពាវនាវក្តីតែពួកគាត់ហាក់មានការយឺតយ៉ាវណាស់។ លោកបានអំពាវនាវដល់ក្រុមអាជីវករផ្សារកាប់គោ និងអ្នកពាក់ពន្ធ័ទាំងអស់ត្រូវរួសរាន់ទៅយកសំណាកឱ្យបានគ្រប់គ្នា។
លោក ហាស់ ឆេន បានបញ្ជាក់ថា បើអាជីវករណាមិនទៅយកសំណាកដែលមិនមានឯកសារបញ្ជាក់ថា បានយកសំណាកត្រឹមត្រូវនោះ នៅពេលបើកផ្សារវិញគណៈកម្មការផ្សារមិនឱ្យចូលលក់វិញទេ។ ប្រធានគណៈកម្មការផ្សារកាប់គោ បានបញ្ជាក់ថា ផ្សារកាប់គោចាប់ផ្តើមបិទកាលពីថ្ងៃទី២៤ ខែមេសា ហើយចំពោះការបើកវិញយ៉ាងតិចរយៈពេល១៤ថ្ងៃក្រោយ និងត្រូវរងចាំការណែនាំ និងការអនុញ្ញាតពីរដ្ឋបាលរាជធានីភ្នំពេញ ទើបអាចបើកវិញបាន។
សូមបញ្ជាក់ថា ផ្សារកាប់គោ ក្បែរវិមានឯករាជ្យ ស្ថិតក្នុងខណ្ឌចំការមន ត្រូវបានបិទកាលពីថ្ងៃទី២៤ ខែមេសា ដោយក្រុមអាជីវករបានព្រមព្រៀងគ្នាដោយស្ម័គ្រចិត្តបិទខ្លួនឯងតាមការសំណូមពររបស់គណៈកម្មការផ្សារ ដើម្បីចូលរួមទប់ស្កាត់ការរីករាលដាលជំងឺកូវីដ-១៩ផងដែរ ទោះមិនទាន់មានពាក់ពន្ធ័ជាមួយអ្នកកូវីដក៏ដោយ ប៉ុន្តែជាក់ស្ដែងសម្រាប់នៅថ្ងៃទី២៦ ដែលជាថ្ងៃដំបូងនោះ ក្រុមអាជីវករចំនួន០២នាក់បានរកឃើញវិជ្ជមានកូវីដ-១៩ ក្នុងចំណោម៤១នាក់ តាមរយៈម៉ាស៊ីនពិនិត្យលឿន តែសម្រាប់ថ្ងៃក្រោយបន្តបន្ទាប់ទៀត គឺការពិនិត្យតាមរយៈម៉ាស៊ីនផ្សេង ដែលអាចដឹងលទ្ធផលក្នុងរយៈពេលប៉ុន្មានថ្ងៃក្រោយ៕ ដោយ ៖ ចន ណារិទ្ធ
ចែករំលែកព័តមាននេះ