រាជធានីភ្នំពេញ៖ ស្ថិតក្នុងមួយរយៈកាលចុងក្រោយនេះ គេសង្កេតឃើញថាកម្មករនិយោជិតក្នុងវិស័យកាត់ដេរ ទទួលបានការចាក់វ៉ាក់សាំងការពារ ការឆ្លងជំងឺកូវីដ១៩ជាបន្តបន្ទាប់។ ប៉ុន្តែទោះជាយ៉ាងនេះក្តីសម្រាប់វិស័យកាត់ដេរមួយនេះ ត្រូវបានខាងសហជីពក្នុងស្រុកមួយសង្កេតឃើញថាវានៅតែប្រឈមហានិភ័យខ្ពស់នៅឡើយ ព្រោះកម្មករនិយោជិតដែលបានចាក់វ៉ាក់សាំងហើយមានចំនួនតិចតួច ទាមទារឱ្យមានការសម្រុកចាក់វ៉ាក់សាំងឱ្យលឿន។
ពាក់ព័ន្ធនិងចំនួនៃការចាក់វ៉ាក់សាំងដូសទី២ការពារជំងឺកូវីដ១៩នេះ បើយោងតាមក្រសួងការងារ និងបណ្តុះបណ្តាលវិជ្ជាជីវៈកាលពីថ្ងៃទី២៧ មេសាឆ្នាំ២០២១បានបង្ហាញលទ្ធផលក្នុងថ្ងៃទី២៧ មេសា ចាក់បានចំនួន១.៨៤០នាក់ ហើយលទ្ធផលគិតត្រឹមថ្ងៃនេះចាក់បានចំនួន៩.៩១១នាក់។អនុគណៈកម្មការចំពោះកិច្ចនឹងបន្តរៀបចំទីតាំងចាក់វ៉ាក់សាំងជូនបងប្អូនកម្មករនិយោជិតនៅតាមរោងចក្រ សហគ្រាស ជាបន្តបន្ទាប់ទៀត។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានឱ្យដឹងនៅថ្ងៃទី ២៨មេសានេះថា ការចាក់វ៉ាក់សាំងការពារជំងឺកូវីដ១៩ តាមខ្ញុំធ្វើការតាមដានក្នុងចំណោមកម្មករទើបចាក់វ៉ាក់សាំងបានប្រមាណ១០%ប៉ុណ្ណឹងទេនៃកម្មករសរុប ហើយកន្លងមកនៅក្នុងវិស័យនេះ មិនទាន់មានការរីករាលឆ្លងខ្លាំង អីចឹងការចាក់វ៉ាក់សាំងនៅក្នុងវិស័យកាត់ដេរនេះ យើងមើលទៅចំនួននេះ វាហាក់នៅមានចំនួនតិចតួចនៅឡើយ។
លោក អាត់ធន់ មានប្រសាសន៍ថា«ខ្ញុំមើលឃើញថា វានៅមានកម្រិតហានិភ័យធំនៅឡើយ ដោយសារចំនួនអ្នកដែលបានចាក់វ៉ាក់សាំងមានប្រហែល១០%នៅឡើយ ហើយកម្មករវាមានចំនួនច្រើន ហើយជំងឺនេះ បើមានការឆ្លងនៅកន្លែងណាវា ពិបាកទប់ស្កាត់»។
លោកសង្កត់ធ្ងន់ថា«ការចាក់វ៉ាក់សាំងដល់កម្មកនៅក្នុងវិស័យកាត់ដេរបានកាន់តែច្រើន វាចូលរួមកាត់បន្ថយហានិភ័យបានច្រើន។ការចាក់វ៉ាក់សាំងនេះ ខ្ញុំសង្កេតឃើញថាវាហាក់នៅមានភាពយឺតយាវបន្តិចសម្រាប់តំបន់ដែលមានការឆ្លងជំងឺកូវីដ១៩ តួយ៉ាងតំបន់ដែលមានការឆ្លងម្តុំផ្លូវវេងស្រេង និងតំបន់កំបូល។តែនៅកន្លែងផ្សេងៗទៀត ខ្ញុំគិតថាវាមិនទាន់ហួសពេលទេ អីចឹងយើងគួរសម្រុកចាក់វ៉ាក់សាំងដល់កម្មករ»។
តាមលោកអាត់ធន់ ដើម្បីបង្ហាហានិភ័យពីជំងឺកូវីដ១៩នេះ បើនៅកន្លែងមិនទាន់មានការឆ្លងទេយើងត្រូវចាក់វ៉ាក់សាំងឱ្យបានមុន ហើយកន្លែងណាមានការឆ្លងហើយត្រូវចាក់ការពារផងនិងព្យាបាលផល អីចឹងខ្ញុំគិតថាអាចទប់ស្កាត់ហានិភ័យបាន។
វិស័យកាត់ដេរ ជាសសរស្តម្ភសំខាន់មួយក្នុងការជំរុញកំណើននៃសេដ្ឋកិច្ច តែអស់រយៈពេលជាង១ឆ្នាំមកនេះបានទទួលរងផលប៉ះពាល់ពីជំងឺកូវីដ១៩។សម្រាប់វិស័យកាត់ដេរ បើតាមទស្សនៈ លោកអាត់ធន់ យើងប៉ះពាល់តែបញ្ហាEBA ២០% និងGSP របស់អាមេរិកទេ តែGSP របស់អាមេរិកអាចដោះស្រាយបានក្នុងករណីដែលរដ្ឋាភិបាលអាមេរិកគិតឡើងវិញគឺអាចដោះស្រាយបាន។ប៉ុន្តែGSPរបស់អឺរ៉ុបវាហាក់មានការពិបាក។បើសិនយើងបានចំណែកទីផ្សារមកវិញហើយ កម្មករយើងមានសុខភាពល្អ អាចផលិតបានលឿន ខ្ញុះគិតថា យើងរត់បានទាន់សភាពការ វាអាចធ្វើឱ្យកំណើននៃការនាំចេញបានល្អ ។តែបើសិនជាយើងមានឱកាសហើយតែមិនអាចនាំចេញបាននោះនិងមានបញ្ហាមិនដឹងថាត្រូវធ្វើយ៉ាងម៉េចនោះទេ។
យោងតាមរបាយការណ៍របស់ធនាគារអភិវឌ្ឍន៍អាស៊ីហៅកាត់ថា ADB បានបង្ហាញថា ផលិតកម្មឧស្សាហកម្មត្រូវ បានគេរំពឹងថានឹងកើនឡើង ៧,១% ក្នុងឆ្នាំ ២០២១ និង ៧,០% នៅឆ្នាំ ២០២២ ដោយសារការសងើប ឡើងវិញនៃវិស័យកាត់ដេរសម្លៀកបំពាក់ ស្បែកជើង និងទំនិញសម្រាប់ការធ្វើដំណើរ ក៏ដូចជាកំណើន នៃ ឧស្សហកម្មធនស្រាលផ្សេងទៀត ដូចជាផលិតផលអេឡិចត្រូនិច និងកង់។ វិស័យកសិកម្មត្រូវបានរំពឹង ថានឹងកើនឡើង ១,៣% ក្នុងឆ្នាំ ២០២១ និង ១,២% ក្នុងឆ្នាំ ២០២២ ដោយមានការកើនឡើងនៃ ផលិតកម្មកសិផល បន្ទាប់ពីរងការខូចខាត ដោយទឹកជំនន់កាលពីឆ្នាំមុន ការបន្តមានកំណើននៃ វារីវប្បកម្ម និងការហក់ឡើង នៃការនាំចេញផលិតផលកសិកម្ម ទៅកាន់សាធារណរដ្ឋប្រជាមានិតចិន៕
ចែករំលែកព័តមាននេះ